الموضوع: الريجاتا عند الدكتور

انا كنت بواجه نفس المشكلة فى ريجاتتى العزيزة
وعملت كل الأفلام اللى قد تخطر على بال اى حد

غيرت ماسورة خرج الطرمبة بتاعة الموتور لأنها كانت مصدية
غيرت الكوعة لأنها كانت على وشك الانهيار
غيرت بتاع 3-4 خراطيم مية
غيرت غطاء القربة

وبرضه المية بتنقص

فى النهاية اكتشفت ان المية بتنقص من القربة لأن المية بتسخن الى درجة الغليان وبالتالى بتتبخر وتضغط على غطاء القربة وتخرج (وكما يعرف كل ركاب الريجاتا ان القربة بتاعتها مضغوطة والغطاء بتاعها غطاء ردياتير لأن الردياتير مالوش غطاء ، وهو ما تختلف به الريجاتا عن باقى الفيات)

فعملت حل بسيط جدا، شلت ثرموستات الردياتير العالى 88-92 وجبت ثرموستات واطى 82-68 تمنه 15 جنيه بالوردة بتاعته، ومن ساعتها المروحة بقت تشتغل بدرى ولا تسمح للميه بالوصول لدرجة الغليان وبالتالى المياه لا عادت تتبخر ولا تنقص

جرب الحل ده بعد ما تتأكد ان معندكش تسربات فى المية

لو الحل ده منفعش يبقى عليك بردياتير جديد

المشاركة الأصلية كتبت بواسطة محمدعيسى

ممكن تكون سربنتينة التكييف مسدودة و ممكن يكون وش السلندر عايز يتغير (لو في زيت بيتسرب من عند وش السلندر من قدام غيره احسن) و قبل دا كله راجع على دورة التبريد و اتاكد ان مفيش تسريبات و ان المروحة شغالة كويس
معلش في سؤال هو مش الموتور ليه درجة حرارة لازم يوصلها عشان يبقى شغال كويس و تبريد الموتور زيادة غلط برضو؟ طبعا انا عمري ما هوصل ل 1/8 من معلومات المهندس خالد بس انا عايز افهم

كلامك طبعا لا غبار علية وصح مليون فى المية ، ولذلك لما العربية بتكون جديدة بيكون الثرموستات مصمم انه يلقط على درجة حرارة 88 مثلا، ومع اعتبار ان الثرموستات متركب فى قاع الردياتير، ابرد نقطة فيه فباتالى معنى كدة انه بيتأثر بأبرد نقطة فى الدورة، لما بتكو ن العربية جديدة بيكون الفرق بين اسخن نقطة فى الدورة -وهى نقطة وش السلندر التى نتلقى قرائتها على التابلوه- وابرد نقطة والتى يعمل عليها ثرموستات المروحة، يكون الفرق بينهم قليل جدا، فى حدود من درجتين الى اربعة درجات وذلك لكفائة نظام التبريد من ردياتير وطلمبة مياه وخلاف ذلك

لكن مع قدم المحرك وتآكل ريشات طلمبة المياه جزئيا وتكون الرواسب على الردياتير تصبح حركة المياه فى دورة التبريد بطيئة جدا مما يؤدى الى سخونة المياه بشدة فى المحرك وبرودتها درجات عديدة فى الردياتير ولكن بكميات قليلة لا تكفى لخدمة المحرك، وهذا يؤدى الى ان درجة حرارة وش السلندر المقاسة على التابلوه اعلى بكثير من درجة حرارة قاع الردياتير التى يعمل عليها ثرموستات الرموحة، مما يؤدى الى انه بينما تكون درجة حرارة وش السلندر 100 تكون درجة حرارة الثرموستات 85، وبالتالى لا تعمل المروحة سوى متأخرا جدا

وبالتالى عندما نستعمل الثموستات الواطى فأنه يسمح بعمل المروحة مبكرا لتعويض النقص الأدائى فى دورة التبريد، لكن فى نفس الوقت فأن المياه بداخل المحرك لا تبرد لدرجة اقل من المسموح به لتشغيل صحى للمحرك ، ولكن تعود لوضعها الطبيعى بدلا من السخونة المفرطة

يعنى انا عندى لما ركبت الثرموستات الواطى اصبحت درجة حرارة مياه المحرك فى حدود 80 ، وهو المعقول والذى يشابه حالة السيارة وهى جديدة، لكن قبل كدة كان العداد بيعدى ال 100 قبل ما المروحة تقوم

ارجو ان كدة الصورة تكون وضحت

المشاركة الأصلية كتبت بواسطة sab3aawy

فى النهاية اكتشفت ان المية بتنقص من القربة لأن المية بتسخن الى درجة الغليان وبالتالى بتتبخر وتضغط على غطاء القربة وتخرج (وكما يعرف كل ركاب الريجاتا ان القربة بتاعتها مضغوطة والغطاء بتاعها غطاء ردياتير لأن الردياتير مالوش غطاء ، وهو ما تختلف به الريجاتا عن باقى الفيات)

فعملت حل بسيط جدا، شلت ثرموستات الردياتير العالى 88-92 وجبت ثرموستات واطى 82-68 تمنه 15 جنيه بالوردة بتاعته، ومن ساعتها المروحة بقت تشتغل بدرى ولا تسمح للميه بالوصول لدرجة الغليان وبالتالى المياه لا عادت تتبخر ولا تنقص

جرب الحل ده بعد ما تتأكد ان معندكش تسربات فى المية

لو الحل ده منفعش يبقى عليك بردياتير جديد

هل الحل الجميل ده بتطبق مع الشاهين ياستاذ سبعاوى
عندى درجه الحرارة بتعدى 90 بكتير والغريب مع التكييف بتثبت عند 90