سؤال يطرح نفسه: تحط فلوسك تحت البلاطة ولا في البنك!

**kondor** · 20-08-2011 07:50 AM

البنوك
مفيش حاجة اسمها الفلوس تضيع حتى لو البنك المركزى نفسة فلس حتى لو البلد فلست البرازيل و الارجنتين فلست قبل كده
لو عاوز اقل مخاطر مقابل عائد مقبول يبقى البنوك و اى بنك مفيش فرق بين الاهلى و cib و hsbc و saib ...الخ
كله زى بعض حتى بنك المصرف العربى الدولى برضو مضمون اما لو عاوز عائد مرتفع بس فى نفس الوقت مخاطر مرتفعة عندك حاجات كتير ذهب بورصة عملات عقارات....الخ بس كنصيحة ماتدخلش اى حاجة من دول لو معندكش خبرة كويسة و كويسة جدا كمان
و بالتوفيق ان شاء الله

**amrrashed** · 20-08-2011 11:09 PM

الوضع فى مصر غير امريكا فى امريكا لو البنوك فلست خلاص شكرا العملاء ملهمش حاجة وده اللى حصل فى الازمة المالية ولكن فى مصر الوضع مختلف لان الاقتصاد ميستحملش ان الناس تخاف من البنوك وبالتالى محدش هيحط فلوس فى بنوك وبالتالى مفيش مشاريع ... الخ

**kondor** · 21-08-2011 06:04 AM

المشاركة الأصلية كتبت بواسطة amrrashed

الوضع فى مصر غير امريكا فى امريكا لو البنوك فلست خلاص شكرا العملاء ملهمش حاجة وده اللى حصل فى الازمة المالية ولكن فى مصر الوضع مختلف لان الاقتصاد ميستحملش ان الناس تخاف من البنوك وبالتالى محدش هيحط فلوس فى بنوك وبالتالى مفيش مشاريع ... الخ

الكلام ده مش صح فى امريكا الاحتياطى الفدرالى بيضمن ودائع الافراد فقط المؤسسات لا
فى مصر البنك المركزى بيضمن كل الودائع افراد و مؤسسات
تحياتى

**sayed911** · 21-08-2011 06:32 AM

للأسف احنا في ثقافة مجتمع 90% منه بيشيل فلوسه تحت البلاطة !! ولكن انا شايل في 3 بنوك مختلفين ليه مش عارف او ايه السبب برضه مش عارف !! 2 اجنبي وواحد وطني

**Zika9909** · 21-08-2011 02:51 PM

المشاركة الأصلية كتبت بواسطة sayed911

للأسف احنا في ثقافة مجتمع 90% منه بيشيل فلوسه تحت البلاطة !! ولكن انا شايل في 3 بنوك مختلفين ليه مش عارف او ايه السبب برضه مش عارف !! 2 اجنبي وواحد وطني

"لا تضع البيض كله في سلة واحدة" هو ده إللي يخليك تحط فلوسك في 3 بنوك مختلفين.

**نور القمر** · 21-08-2011 04:55 PM

لو مش هتقدر تشغل فلوسك في مشروع بنفسك يبقى احسن طريقة هي الدهب او عقارات
بتحافظ على قيمة الفلوس لكن البنوك بالاضافة لحرمانية فوائدها الفلوس قيمتها بتقل من سنة للتانية
انا عن نفسي ندمانة جدا ان كان معايا قرشين ومسمعتش كلام جوزي واشتريت بيهم دهب من زمان كان زمان قيمتهم تضاعفت 7 مرات !!!!!!!!!!!
ومقررة ان شاء الله اي فلوس هاشتري بيها دهب حتى لو جرام جرام

**Deshahcoka** · 04-09-2011 06:59 AM

يعني مش عارف ليه الموضوع مش مقنع ... سمعت خبر هنا انوا البلد حتسحب فلوس الناس تسد العجر و رجعوا نفوه ..

المهم افرد حصل اي حاجة و الاجازات و كدة يعني و البنك قافل و السستم واقع وووو الكلام الفاضي ده

يبقى البنك ملوش عوزة صح ؟

**أحمد كمال** · 04-09-2011 10:26 AM

بغض النظر عن صحة او عدم صحة الخبر ما انت فلوسك كده كده بتتسلف و هي في البنك امال القروض الشخصية و قروض السيارات و الكريدت كارد فلوسها منين؟ ماهي من فلوسك و فلوس غيرك

و مش معنى ان الحكومة تستلف انك مثلا تلاقي ال 100 الف بتوعك بقوا خمسين و تلاقي مدير الفرع بيقول لك معلش يا كوتش د. عصام شرف اتزنق في سبوبة هتجيب خير كتير للبلد فسلفناه من فلوسك :)