النهاردة رحت التوكيل الصبح على الساعة 8 و نص و سبتلهم العربية عشان أغير طقم الدبرياج

بصراحة طقم الدبرياج كان وصل لمرحلة صعبة اوى... العربية سحبها ضعيف و الموتور بإستمرار عالى
لما رحتلهم فى الأول طقم الدبرياج مكانش موجود فى الإسكندرية ..و جابوه تانى يوم من القاهرة

بس عشان يغير طقم الدبرياج فك حاجات كتير اوى.. مدادات الإسكترا و فك علبة البطارية و فلتر الهواءو أخيرآ نزل الجيربوكس و تم تغيير المحروس:)
و فى السكة غيرت شوية حاجات زى كابل الدبرياج و اويل سيل و رومان بلى الكوبلن و زراع الإتزان شمال بس الحمد لله اليمين كان كويس

الموضوع ده أخد حوالى سبع ساعات بس طبعآ انا رحت بصيت عليها الساعة 1 و روحت و رجعتلهم تانى على الساعة 4 زى ما قالوللى

الحمد لله العربية رجعت زى زمان .. سحبها اتحسن جدآ .. دواسة الدبرياج كانت بقت تقيلة اوى دلوقتى بقت خفيفة زى العربيات اليابانى كده

بصراحة انا مش عارف ليه الناس بتقول ان التوكيل مش كويس .. الناس محترمين جدآ و الميعاد اللى قالولى عليه فعلآ لقيت العربية خالصة فيه و محدش دخل وسخ الصالون او بهدل حاجة جوة العربية بالرغم انى مكنتش واقف معاهم طول الوقت

و نييجى بقى للجزء الصعب اللى بينسيك فرحت الحاجات الجديدة... الأسعار

طقم الدبرياج (إسطوانة و ديسك و بلية الدبرياج): 1790جنيه
اويل سيل : عدد 2 :70 جنيه
رولمان بلى الكوبلن: 65 جنيه
كابل الدبرياج: 245 جنيه
ذراع الميزان: 315 جنيه

و بالنسبة للمصنعية : 393 جنيه

يعنى المبلغ النهائى اللى اول ما سمعته ضحكت قدام الموظف و حسيته عايز يقول إيه المجنون ده:D:2929 جنيه مصرى غرقان

هل الأسعار دى تعتبر مرتفعة اوى؟
مع العلم انى مغير الكلام ده كله لأول مرة و العربية عاملة دلوقتى 124 الف كيلو

و سؤال فنى .. يعنى إيه الديسك يطبع مع الإسطوانة؟؟ و هل ده بيفرق فى السحب بعد فترة من التركيب؟؟

ربنا يبارك فيها و يا رب متفتحش فى حاجة تانية