الموضوع: رانجلر موديل ٢٠١٢ - معلومات من التوكيل

المشاركة الأصلية كتبت بواسطة sherifbmw

1. محدش بيحكى ملابسات الحادث بالتفصيل لاننا مش محققيق شرطة ! لكن تحليل الموضوع المستنتج ان الكيدج يطبق على حد ف ليها عده امور منها ان العربيه وقعت من مرتفع عالى جدا - طريقه القلبه مستهدفتش نقاط التركيز فى الدعامات الفولاذية واصابت الخطوط المستقيمة - طبيعه الارض حجريه - رمليه - صخريه رمليه
طبعا فيه حد اقصد للاختبارات دى بالنسبه للحمولة يعنى مثلا مش كل عربيه فئة 5-7 فى بى ام دابيلو مش حتطبق او الى جوه بيموت علشان فيها 16 ايرباج ! دى اسمها عوامل الامن والسلامة السيفتى عموما مش حامى 100 % الحامى هوا الله اولا واخيرا لكن دى بتقلل خطر الاصابة
الكيدج الى حضرتك بتقول اتطبق لازم يكون اطبق لو حصل فيه الى ذكرته فوق ولكن بنسبه مش لدرجه انه لازق ف العربيه والا كان الراجل مطلعش ولا حد قدر يطلعه !
احب اعلق على نقطه انه الوحيد الى لابس الحزام بعكس اللي كانوا راكبين معاه و اللي كلهم طلعوا بإصابات طفيفة.. انا توقعت انهم طلعو بره العربيه اساسا مع القلبة مش مجرد اصابات ! خصوصا ان الازاز هيبقى مفتوح ولو مقفول كان اتكسر !

القلبة كانت من على غرد رملي ... ولا صخر ولا أرض ناشفة.... و كان معاه نيسان باترول 2006 اتقلب جمبه... و كل الناس طلعت سليمة يومها الا صاحب العربية....

و زي ما بتقول فيه 16 ايرباج مع احترامي للايرباجز دي كلها... بس الواقع و النتيجة الملموسة ايه؟؟

شخص أصيب بالشلل نتيجة تطبيق الكيدج علي ضهره...

و خرجناه من الناحية التانية بالمناسبة....

المشاركة الأصلية كتبت بواسطة sherifbmw

2. انا متكلمتش عن السقف بيتكسر , حضرتك اتكلمت عن حامل الاستبن انه فيبر !
حبيت اوضح لحضرتك ان الفيبر مش شئ يستهان بيه و وضحت نقطة انه داخل ف أجزاء كتيره فى السياره من بره زى الرفارف والسقف ووضحت بس ان الرفارف مش بتتكسر وفيه فيديوهات ع اليوتيوب ف اختبارات التصادم او غيرها

مع احترامي لكل الحقائق العلمية عن الفايبر.... فيه حامل استبن فايبر مكسور و ديه حقيقة واقعة....

المشاركة الأصلية كتبت بواسطة sherifbmw

3. العربية فعلا اوف رود بلا شك لكن جيب انتجت الرانجلر ف ثوب جديد تستهدف بيها شريحة محبى Off Road- Suv cars- و غيرهم كمان من الفئة الى مش كانت منضمة لجيب قديما .
بنتكلم عن تطوير وليس تقليد للموديالات القديمة الى حضترك ذكرت محاسنها ونسيت عيوبها الشديدة
الرانجلر بتجمع بين الرفاهية والقوة ف وقت واحد وحالا هيا السيارة الاكثر مبيعا فى جيب وحققت ارباح قوية
موديل 2010 فى مصر هوا شبيه موديل 2007 بره _ اول موديل يظهر لها طبعا ميتركبش
من اول 2011 جيب عدلت فى المقصوره
2012 ثورة جيب ف المحرك بينتا ستار

هقول تاني النقطة اللي سبق ووضحتها....

كل شركة بتنتج حاجة luxurious زي الجراند و حاجة city و ممكن تمشي off-road زي الشيروكي و حاجة off-road بحته زي الرانجلر

أو عندك مثال تاني

Lexus و ديه الluxurios أوي
Land Cruiser 100-200 series و ديه اللي on / off
Land Cruiser 70 series و ديه التعلبة اللي هي 100% off road

وجهة النظر اللي بحاول أوصلها و أرجو انها توصل.... أن الرانجلر ديه تعتبر extreme الoff-road يعني أعلى عربية ممكن تدخل off-road في شركة جيب حاليا....

باختصار.... أعلى عربية.... كآداء....و بما أنها عربية لسة جديدة فمفيش مشاكل major ظهرتلها ميكانيكيا....

لكن كأمان... فهي لا يمكن أن يعتمد عليها اطلاقا... و أنا مش هعتمد على crash test في الyoutube في حين أني أكون شفت بنفسي حادثة في الرملة و أقول لا دا هو اللي حظة وحش....

المشاركة الأصلية كتبت بواسطة sherifbmw

4.طبعا تقدر تاخد معاك معداتك كلها ومنها فئه الروبيكن الفئه الاعلى مش هنتكلم عن التيكنيكال لان ده موضوع يصعب شرحه
الاعتمادية هنا ف الصحرا ترفيهى يعنى مايكفى لرحلات الترفيه والسفارى مش دى سياره الحروب !
حتى تخاف عليها من الخربشه والتجريح او الانقلاب هيا تطوير وجيل جديد وليس تقليد لما سبق
السيارة نازله اربعة ابواب عائلية رياضية متعدده الاستخدام بس من كل شئ جيب بتوفرلك مكان ونسبة
مهياش luxury بس فخمه مش رياضيه من الدرجه الاولى بس سريعة هيا اوف رود ولكن ف ثوب ال SUV

مش عارف ليه حاسس زي ما اكون بقرأ اعلان في جرنال السيارات...

بس على فكرة السفاري مش مجرد مدقات ولا رملة تغرز فيها....
ديه مطالع جامدة لازم تطلعها... و منازل شديدة الانحدار...

و لو بتتابع شركة زي ARB و شفت مثلا الاكصدام ... هتلاقيه بيقولك أن من مميزاته أنك تقدر تطلع مطلع زاويته أزيد من اللي تقدر تطلعه باكصدام العربية stock

المقصود أن الانقلاب و المطالع و المنازل ... الخ... كل الحاجات ديه مفروض يكون معمول حسابها....

المشاركة الأصلية كتبت بواسطة sherifbmw

اخر جزئية السيارة مش اوف رود فقط ! هيا كمان هايبرد بين اوف رود و SUV وبالفعل هيا من شريحة ال SUV الاساسية يعنى منافس للبى ام دابيليو x3 او الجيب شيروكى و غيرهم , لو قارنت للاعتمادية والصحرا هيا الى تكسب من وسط اغلى وافخم السيارات ال SUV
القديمة من رانجلر بس هيا الى Off road

يعني شركة كرايسلر أنتجت رانجلر عشان تنافس بيها شيروكي ؟؟!!
اللي هي تعتبر احدى منتجاتها برضو؟؟

معلومة جديدة ...!

و على حد كلامك لو قارنتها للاعتمادية و الصحرا هي تكسب من وسط أغلى و أفخم السيارات القديمة من رانجلر هي بس اللي off-road

مش فاهم الجزئية دي...

يعني أقارنها بالسيارات الفخمة و الغالية (نيسان باترول - لاند كروزر - لاند روفر)
ولا أقارنها بالرانجلر القديم؟؟

أرجو التوضيح...

المشاركة الأصلية كتبت بواسطة sherifbmw

الكلام ده كله فيها يختص السيارة انا بقى عايز اقول كومنتى انا بتضايق من ناس تدخل تقارن السياره ب اوبل ويقول هيا بتجيب ال 220 زى الاوبل بتاعتى ! ايش جاب لجاب بس, واشمعنا عايز تسوايها ف السرعة القصوى , طيب تعالى شد بيها واطلع منها ! تعالى قارنها كعربيه لعربيه مفيش وجه مقارنه اساسا بين مشنه وبين اسطول بيجرى

حضرتك بتضايق من دي مشكلة تخصك.... احنا بنتناقش مناقشة من شأنها أن كل الأعضاء يستفيدوا بيها....

أنا شخصيا مش بتضايق لو حد قال شيء عن عربيتي أو أي عربية تانية...لأني ببساطة مش أنا اللي صنعتها... أنا اشتريتها و عارف ان كل عربية في العالم لها عيوبها و مميزاتها....

كمان أرجو ملاحظة أني موضعتش العربية في مقارنة.... أنا بتكلم عن جزئية محددة و هي جزئية الoff-roading متكلمتش عن الشد و الجري....

سؤال أخير....

شفت أو طلعت أي رحلة مع jeep club؟؟

ياريت لو تروح معاهم و تشوف العربيات اللي بيدخلولها ونش عشان عيب حصل في الكمبيوتر نتيجة للسخونة... أو نتيجة لخبطة أو صدمة أو مطب عنيف...

دي بتكون رحلات يوم واحد و بترجع آخر النهار.... مش رحلات long range


أنا مش مستفيد بأي شكل من الأشكال أني أقول للناس الرانجلر حلوة أو وحشة...
أو أقول اللاند كروزر ولا لاند روفر حلوة... أو وحشة....

كل اللي بعمله أني بما يرضي الله بنقل بأمانة اللي بيحصل.... علشان لو حد عايز يجيب العربية بغرض الoff-roading يجيبها ... بس يكون حذر و على علم بأن القفص مش بيشكل حماية كاملة....

عشان فيه ناس بتجيب العربية و تفتري... في المطالع و المنازل الشديدة.... معتمدين على ال16 اير باج السابق ذكرهم... أو الكيدج اللي من شأنه حماية الكابينة الداخلية بالكامل....