الموضوع: Car Detailing

معلش يا جماعة أنا ملقيتش موضوع زى ده معمول قبل كده بس لو كان معمول أنا بعتذر مقدماً

موضوع ال Car Detailing عشان اللى ميعرفهوش هو غسيل شامل للسيارة يتضمن الأتى

1- غسيل السيارة من الداخل كالمعتاد فى جميع محطات البنزين + غسيل الأرضية والأبواب والفرش والسقف
2- غسيل السيارة من الخارج
3- عمل بوليش للسيارة من الخارج

الموضوع ده مفيد جداً خصوصاً للى مش مركبين فرش و عندهم أطفال زيي كده :-)

غسيل السيارة من الداخل هو أهم حاجة فيه و الأماكن اللى بتعمل كده بيبقى عندهم أدوات بسيطة بتساعدهم على الوصول الى اماكن تجمع الأتربة اللى بيصعب الوصول ليها بفوطة أو بضغط الهواء لأن فى بعض الأتربة ممكن تكون لازقة و بيستعملوا مياه و معاها منظف مخصوص ( لأن الصابون العادى بيجير و ده عن تجربة شخصية بس فى عربية مراتى مش فى عربيتى )

أنا أعرف 5 أماكن بيعملوا الموضوع ده وأسعارهم متفاوتة

1- موبيل الدائرى ( شيراتون - م.نصر ) 100 جنيه للصالون وتقريباً 180 للعربية كلها
2- وطنية اللى جنب ستى ستارز 180 جم صالون + غسيل بودى من غير بوليش ( معندهمش بوليش)
3- موبيل الحجاز بس مش عارف السعر بس واحد صاحبى بيشكر فيهم
4- موبيل اللى فى شارع النادى الأهلى و برضه معرفش السعر
5- Bright Car على ناصية أحمد فخرى مع كامل الحارونى ( أخر شمال لو جاي من الأتوستراد ) والسعر مفاجأة 475 جم بس ( كنت هنط فى كرش الراجل لما قالى كده)

أنا عن نفسى مجرب موبيل الدائرى ( Car Care ) مرتين مرة كاملة و مرة صالون بس و هما ممتازين

أرجو أنى أكون أفدتكم