الموضوع: تقرير عن الصنى 2007 بعد 200000 كيلو على الطريق :)

انا حبيت احتفل هنا فى المنتدى بوصول العداد عندى فى الصنى موديل 2007 لـ 200000 كيلو متر بالتمام والكمال
وفكرت انى اضيف بعض الملاحظات فى العربيه لتوصيل الافاده للى بيفكر فى الشراء

اولا من ناحية العافشة : هى ممتازه لاصحاب القيادة الرياضية لانها فعلا ناشفة حبتين فده بيخلى فى امكانية للمناورة و فى نفس الوقت بحقق ثبات واتزان ممتاز على السرعات العالية (اعلى سرعة وصلت ليها كان 190 كيلو وخفت ازود اكتر من كده)

ثانيا استهلاك البنزين : معتدل الى حد ما وخاصتا انى بروح لـ 6 اكتوبر من المعادى كل يوم ومع استخدام التكيف بستمرار فمن وجهة نظرى المتواضعة ان الاستهلاك جيد (لم استطع حساب معدل الاستهلاك لان ده بيعتمد على اذا كنت متاخر على الشغل ولا لا
لان القياده اعلى من 130 مع سرعة الرياح العالية بتنسف التنك

ثالثا قطع الغيار : من ناحية توافرها فهى فعلا متوافره والحمد لله ومع الوقت عرفت مكان او اتنين الى بتعامل معاهم بستمرار واسعارهم مناسبة
اما من جهة السعر فممكن تيل الفرامل يبدء من 35 جنيه (والله كان احسن من الاصلى 100 مره بس ) بس دى كانت صدفة نصيحة عدم الاسترخاص فى قطع الغيار ، اما عن باقى الاسعار فمش هتختلف كتير عن الاسعار للعربيات نفس الفئة.

رابعة الصالون : العربيه ممتازة لعدد 2 راكب فقط لاكن اكترمن كده هتكون فعلا ضيقة ودى وجهة نظرى الشخصية ، قرب العربيه من الارض مخليها مريحة جدا وخاصة فى القيادة لمسافات طويلة الفرش والتقفيل الداخلى ممتاز الدركسيون تقيل حبتين مختلف تماما عن الهيونداى مثلا بس الميزه انه بيدى تحكم اكتر فى المواقف الطارئة

خامسا التكيف: ممكن ياخد 7 من 10 معقول ويفى بالغرض بس الميزه انى مبحسش باى علاقة مابين السحب فى العربيه والتكيف يعنى السحب ممتاز سواء مشغل التكيف او لا

معلش انى مش جيد فى السرد او الوصف بس انا تحت امر اى حد عنده اى سؤال عن العربيه

اولا سبب الـ 200000 انى بحب السفر لمسافات طويلة بالاضافه انى شغلى فى اكتوبر وبروح من المعادى كل يوم يعنى بمعدل تقريبا 100 كيلو يوميا

اما عن الاشياء التى تم تغيرها فهى قطع الغيار قصيرة العمر زى تيل الفرامل والطنابير طقم السيور (الكاتينة لا يحتاج تغير لانه جنزير) انا لا اتعامل مع التوكيل للاسف بس عن اسعار اخر صيانة ودى كانت من اسبوع تقريبا فكانت:
اربع فرد مساعدين يابانى (750 امامى - 450 خلفى)
طقم بطاحات 120 جنيه
سير دينامو و باور 70 جنيه
طنابير امامى 270 جنيه تيلاندى
تيل فرامل امامى 75 جنيه كورى
طرمبة بنزين استيراد 250جنيه (غيرتها علشان كان نفسى بس اشوف فلتر البنزين شكله ايه )
جوز كلاكس يابانى استيراد من التوفيقية 70 جنيه
جلب مقصات امامى 90 جنيه تيلاندى
يعنى الاجمالى تقريبا كان 2200 جنيه صيانة الـ 200000 كيلو
وطبعا صقر قريش المعادى بقت تقريبا احسن من الحرفيين وكانت تكلفة المصنعية 250 جنيه بظبط الزوايا كمان
والحمد لله لم يتم تغيير اى قطعة فى الماتور حتى الان بس للاسف حاسس ان عزم الماتور قل شوية بس مش بطال
قطع الغيار متوافره بره التوكيل بس انا عن نفسى بتعامل مع محل كويس فى البحر الاعظم
للاسف انا ضد فكرة التوكيل بعد الضمان لانى بحس ان فى استغلال حبتين (وجهة نظرى الشخصية)
بس اكيد التوكيل اريح واضمن بكتير من بليه المكانيكى بس انا بشوف انه اوفر بكتير انى اعمل الصيانة بره
اما النقطة الاخيره والخاصة بعدد الركاب فانا بكره انى اعد مزنوق علشان كده بحب ارجع الكرسى جامد وده بيكون على حساب الى راكب فى الكنبه الى ورا بيكون مش مستريح وخاصتا لو كان صحابك مشاء الله من اصحاب الوزن الثقيل