الموضوع: الحمد لله علي كل حال ... البريليانس اللي حيلتي باااظت

المشاركة الأصلية كتبت بواسطة sonasteel

واسف مرة تانية لو أسأت أدبي .... وربنا ييسرلك كل خير ويباركلك في عربيتك ويرزقك خيرها ويكفيك شرها و الف حمد لله علي سلامتكم كلكم
اقعد بالعافية :))

أخي الكريم لا داعي للأسف بالمرة, وربنا يكرمك يا رب ويحفظك ويحفظ كل الإخوة هنا ف المنتدي من كل شر. بجد مشاركاتكم بتهون علي الواحد كتير من الأحزان.

المشاركة الأصلية كتبت بواسطة abomuslm

بارك الله لك فى سيارتك ورزقك خيرها وكفاك شرها ، الحقيقة رغم فداحة الحادث إلا أن الأسلوب الرائع الذى تكتب به يجعلنى ارتبط أكثر بهذا المنتدى الجميل، وفى شوق لمعرفة التفاصيل وخصوصا مدى قناعتك بهذه السيارة واعتماديتها رغم ما حدث، وفقك الله دائما لما يحب ويرضى، وكل عام وجميع من فى المنتدى بخير وسعادة

سعادة الباشا, شاكر ليك مرورك ومشاركتك ليا في مشكلتي.
وبالنسبة لمدي ارتباطك بالمنتدي, فاطمئن. أنا عن نفسي لما بيحصلي أي مشكلة سواء ف العربية أو ف غير العربية باجري علي طول عشان أحكيها لعيلتي التانية هنا في المنتدي.

المشاركة الأصلية كتبت بواسطة aboshehab

الف حمد لله على سلامتك انت و العائلة
و ربنا يعوض عليك و عموما دا شغل سمكرة و دكو و ترجع زى الفل
العربية متامن عليها و لا لا
علشان تعمل محضر و توديها التامين يصلحها فى التوكيل

لا يا كبير العربية مش متأمن عليها, ومش عايز أقول للأسف عشان موضوع الحلال والحرام واللي لحد دلوقتي مش عارف القول الفصل فيه إيه. بس الحمد لله الحاج وقف جنبي في جزء من المبلغ, والتكلفة لم تؤثر علي مستوي المعيشة بالمرة.

اللي حصل بأه معايا بعد كده إني نزلت بالعربية ع الحرفيين بعد اليومين الأجازة اللي كنت واخدهم م خلصوا (واللي والله مروا علي الواحد كانهم سنتين من كتر الهم والنكد), عشان ادور علي سمكري محترم تكون إيده حلوة ويقدر يطلعلنا شوية شغل حلوين. وده كان طبعا بعد م اتصلت بكذا واحد صاحب ليا هناك عشان لو كان حد فيهم يعرف حد كويس أصلا أو اتعامل مع حد قبل كده يقوم يدلني عليه عشان محدش يضحك عليا ف المصنعية واللي مكنتش عارف ساعتها تتكلف ف حدود قد إيه.

طبعا ده وقت السؤال اللي المفروض عدد من الناس متحفزين جدا من بداية الموضوع عشان يسألوه, ألا وهو (طب ومبعتهاش التوكيل تتصلح هناك أحسن ليه؟ دي العربية لسه زيرو وكان الأحسن الوكيل هو اللي يشتغل فيها عشان ترجع زي الأول).

إنتوا عارفين معناه إيه إني أدخل توكيل زي البافارية بخبطة زي دي وأطلب منهم إنهم يصلحوهالي؟ السيناريو المحتمل للي ممكن يحصل معايا ساعتها هو إني أدفعلي مبلغ قد يصل لحوالي 10000 جنيه وهو المبلغ اللي أنا شايفه كتير جدا علي عربية أصلا ب 70000 جنيه (حوالي 15% من تمن العربية) ده غير إن أصلا سعر إعادة البيع للعربية كده كده ف النازل وبالذات بعد الحادث.

التوكيل طبعا كان هيعمل الأتي: هيغير الشنطة ب 1900 جنيه + إكصدام خلفي ب 1150 جنيه + فانوس خلفي شمال ب 400 جنيه + ظهر خلفي (اللي هو عتب الشنطة, حيث إنه كان متضرر جدا من جراء الخبطة) ب 2000 جنيه + تكلفة الدهان في حدود 1000 جنيه كمان. (لاحظ إني محسبتش الرفرف الشمال واللي ممكن يدخله ف حوالي 2000 جنيه كمان), وطبعا مصنعية الدكاترة اللي شغالين واللي ممكن جدا تبقي ف حدود 2000 جنيه كمان.
إذن التكلفة الإجمالية بدون حساب الرفرف الشمال هتساوي 8450 جنيه. (والأسعار بتاعة قطع الغيار دي طبعا أنا سألت عليها ف التوكيل وبره التوكيل. الحاجة الوحيدة اللي لقيتها بره هي الفانوووووووووووس بس ب 340 جنيه يعني أرخص حوالي 60 جنيه عن التوكيل).

الخلاصة توكلت علي الله, وقلت الف مع نفسي الأول واسأل عشان أبقي عارف برضه السوق أسعاره إيه, عشان ميبقاش أول واحد أروحله هو اللي اصلح عنده. اللي قاللي هاصلحلك الشنطة والظهر والإكصدام وتشتريلي فانوس وياخد 1500 جنيه (بدون مصنعية الدهان). واللي قاللي هاصلحلك الظهر والإكصدام وتشتريلي شنطة وفانوس وياخد 2000 جنيه (بدون مصنعية الدهان). واللي قاللي هاصلحلك الظهر وتشتريلي إكصدام وشنطة وفانوس وياخد 3000 جنيه (بدون مصنعية الدهان). الأخير ده كان صاحب ورشة كبيرة أوي شغال ف البي إم والكوبر بسسسس, وكان ف منتهي التناكة لدرجة إني بسأله باقوله هتاخد 3000 جنيه عشان تركب إكصدام وشنطة وفانوس جداد ؟؟؟ قام قاللي وكمان هتسيبهالي 12 يوم (هو حسبها لقاها 12 يوم بالثانية) عشان عندي شغل كتير. إسمه عبدالسلام حسن بالمناسبة محدش يبقي يروحله, وربنا يكفيكوا شر الحوادث من الأساس.

المهم من بعده إستنتجت إن كل م حجم الورشة يكون أكبر كل م المصنعية تكون أغلي, وده طبيعي زي الفرق م بين سعر تذكرة السينما ف سيتي ستارز ف مدينة نصر و سينما تانية ف وسط البلد مثلا. سعر استراتيجي عشان يجذب زبون معين مش عشان شغل أنضف ولا حاجة مع العلم إن نفس المكن والزراجين والعدة الموجودة عند عبدالسلام هي نفسها اللي شغال بيها وليد (السمكري اللي انا روحتله).

قررت إن خير الأمور الوسط, واشتريت الشنطة والفانوس وخليت السمكري يشتغل ف الظهر مع الرفرف. وكنت مقتنع إني لازم اشتري الشنطة أو الظهر الخلفي واحد منهم ع الأقل عشان السمكري يعرف يظبط شغله عليه, عشان لو فوق بايظ وتحت بايظ كمان مش هتعرف تاخد شغل مظبوط ف الأخر.

الكوميدي بأه والهزلي ف الموضوع هو اللي جاي بس لحظات أحفظ الموضوع عشان النت هنا ف الشغل مش مضمون.

إتصلت بالتوكيل عشان أسأله ع الشنطة والظهر والفانوس, قاللي لا والله اللي موجود بس الفانوس وباقي الحاجة تيجي بعد العيد. أكيد يا جماعة؟, قالك مش قبل العيد خالص بأي حال م الأحوال. إيـــــــــــــــــــــــ ــه ؟!!!

طب ياأهل الخير ساعدوني, (مع العلم إن مفيش حد ف الحرفيين خالص لقيت عنده الحاجة, وكله شغال ف الإسبيرنزا وباقي الصيني التاني, ولو كان في حد بالصدفة ف مستحيل تلاقي عنده شنطة وظهر خلفي بل بالكتير تلاقي عنده تيل فرامل أو فلتر زيت أو طلمبة بنزين) + إني سألت عند بتوع الجديد والمستعمل ولكن لا حياة لمن تنادي.

كان لازم بأه أتبع الأساليب الملتوية واللي كان كلي أمل إني محتجلهاش وخصوصا بعد الثورة. عدد من الإتصالات لشخص يكون أخوه أو صاحبه أو حتي صاحب صاحبه شغال ف البافارية, وفعلا وصلت لواحد مش هاقول إسمه طبعا شغال ف المخازن بتاعة أبورواش وقدرت معاه أتأكد من إن الحاجة اللي انا عايزها موجودة لدي التوكيل بس محتاجين زي إكرامية بسيطة لشخص ما تاني داخل المخازن لا أدري ما هي طبيعة عمله بالضبط (وواضح إنه شخص حقير عشان الإكرامية كانت 250 جنيه بس) وبعدها يمكن الإفراج عن المهمات المطلوبة.
عدد أخر من الإتصالات قمت به ف اتجاه أخر وفعلا وصلت لشخص تاني ف ابورواش برضه, بس ده كان عايز يخدمني فعلا وقاللي هاقدر أطلعلك الشنطة والفانوس بس وبفاتورة بيع معتمدة من البافارية وكمان عليهم خصم 10% لكن الظهر فعلا مش موجود حاليا ومش هييجي غير بعد العيد. طبعا كده يبقي أنا وفرت ال 250 جنيه الرشوة اللي كنت هادفعهم للراجل الأولاني + قيمة ال 10% الخصم اللي عملوا حوالي 200 جنيه .يبقي وفرت كله كله450 جنيه.

السخافة إني بعد م اشتريت الفانوس الشمال (الفانوس اليمين مكنش معايا للأسف كان راكب مكانه والعربية مكنتش معايا). رجعت أقارنهم ببعض لقيت الجديد لونه أحمر فاتح شويه من ناحية فانوس الإشارة والمارشدير, في حين إن القديم لونه أبيض من عند نفس المنطقة.

كان معايا الفاتورة رجعت تاني بالفانوسين لابو رواش وطلبت منهم إن الجديد يبقي زي القديم, قالولي لا إحنا أسفين جدا دي أصلها بتيجي دفعات وكل الدفعة بتبقي نفس الشكل ونفس اللون, فلو حضرتك تحب ترجعه ممكن مفيش مشكلة. رحت جاي مرجعه عشان فعلا شكله كان مختلف وباين أوي لما ركبناه ف العربية إنه مش شبه القديم. نفس المقاس والتقسيمة بس اللون أغمق شويه.

واحد سامعه هناك بيقوللي طب وبعدين هتمشي بالعربية ازاي من غير فانوس ورا شمال؟ هاجاوبه واقوله وانا خارج لقيت في ورشة الصيانة عربية نفس عربيتي برضه عاملة حادثة من ورا. والظاهر إن الباشا كان مأمن ع العربية, لإني لقيتهم بيشيلوا الحاجات من العربية وهي تقريبا سليمة وبيحطوا مكانها جديد. بصيت من بعيد لقيت فانوس ورا شمال مرمي ع الأرض وواضح إنه كان هيترمي ف الزبالة, مسكته وقلبت فيه يمين وشمال 3 أو 4 مرات لقيته سليم تماما, والله سليم تماما ما عدا كسر طوله 4 مللي في أسفل الزجاج الخارجي للفانوس. وهابقي أصورهولكوا عشان تصدقوني.

المهم كلمت العامل اللي واقف باقوله أنا عايز الفانوس ده, قاللي خده. كويس طب عايز إيه؟ قاللي اللي تجيبه. إديتله 100 جنيه وقولتله, طب لو مش شغال أعمل إيه؟ قاللي لا ساعتها معرفكش. طبعا جريت وانا مليان فرحة بالصفقة اللي أنا شايفها من وجهة نظري رابحة جدا, لإنه حتي لو كان في لمبة أو اتنين محروقين, فسهل جدا إني أغيرهم بعدين. المهم الجسم الخارجي وقواعد الفانوس اللي كانت كلها سليمة وده اللي خلاني أجيبه وانا مغمض.

باقي بس إني أرفعلكوا صور العربية بعد م اتعملت. وشكرا ليكو كتير يا جماعة لمشاركاتكم وربنا يكفينا كلنا شر الطريق ويسهلنا كل أمورنا بإذن الله. وكل سنة وانتوا طيبين

"واحد سامعه هناك"
هههههههه انت عسل
متشكرين على المعلومات القيمة ربنا ميحرمناش منك ومن مواضيعك

قدر الله وما شاء فعل

والحمد لله علي سلامة الجميع