الموضوع: التجربه الاولى مع لوجان 2012

السلام عليكم و رحمه الله و بركاته

كل سنه و انتم طيبين بمناسبه العيد اعاده الله على الجميع بالخير و البركات

لى زميل و صديق عزيز جداً كان عايز يشترى لوجان فول اوبشن موديل 2012 بالسعر الحالى قبل ما تغلى تانى فسأل فى التوكيل فقالو له مفيش بضاعه حاضره دلوقتى انت تحجز بمبلغ 10 الاف جنيه و تستلم على اخر شهر 10 القادم (بعد شهرين تقريباً) و السعر هيكون 71 الف جنيه للعربيه وارده من المغرب و لو فيه زياده فى السعر هتدفعها طبعاً يا باشا

المهم الراجل كان عايز يلحق يشترى قبل العيد فاتصل بمعرض سيارات سمير ريان اللى عند نادى المقاولين فقالوا له موجود بضاعه حاضره لوجان 2011 بسعر 71500 ادفع و استلم فوراً بس هو كان عايز اللون البترولى او الرمادى الغامق و مش موجودين دلوقتى الموجود احمر و نبيتى و ابيض و كحلى ( هو ازرق مش فاكر اسم الدرجه بتاعته)

اتصلنا بمعرض محمد زكى بصفته موزع معتمد من التوكيل فقالوا له البضاعه الحاضره دلوقتى هى لوجان 2012 اصدار Black Line جميع الالوان متوافره بسعر 71500 ادفع و استلم فوراً
و تفرق عن اللوجان العاديه بتاعت التوكيل فى 6 حاجات
1- رومانى مش مغربى
2- الكاسيت نفس النوع بلوبنكت بس شكل و امكانيات مختلفه عن موديل التوكيل
3- فيه فى الطاره ازرار تحكم فى الكاسيت Multifunction
4- التابلوه مفيهوش الحليات الرمادى فى الاجناب و الوسط اغلبه اسود عدا هوايات التكييف
5- فرش العربيه اسود مخملى (مش فاهم يعنى ايه مخملى دى)
6- شكل العدادات مختلف شويه بسيطه جدا

طبعاً صاحبى اول ما لقى الموضوع كده اخد رقم مندوب المبيعات بتاع المعرض و اتصل بيه و رحت معاه النهارده القطاميه و دفع و اشترى و الحمد لله اللون البترولى و انا اللى سقت له العربيه لغايه بيته و فطرت معاه كمان

الانطباع الاولى عن العربيه على الارض :

عداد العربيه عامل 230 كم (شكلها اتساقت من مكان التسليم الى المعرض)

فيه تجريحه بسيطه فى الباب الشمال (البويه) ممكن جدا تتشال بالبوليش و دى نتيجه التخزين و عدم الاهتمام برص العربيات جنب بعضها كويس

الكاسيت جربناه بيشغل اسطوانات و جربنا عليه FM Modulator بفلاشه صوته كويس جدا و الزراير من الدركسيون بتعلى و توطى الصوت و تغير التراك و تعمل Mute للصوت كمان

التكييف جربنا نشغل المروحه فقط مجربناش نشغله علشان التليين

الطاسات مش راكبه فى العجل موجوده فى كيس لوحدها و معاها تاى راب يمسكها عليه علامه رينو

انطباع القياده لاول مره :
طبعاً العربيه كان فيها ربع لتر بنزين مثلاً خرجنا اول حاجه فولناها بخمسه و ثمانين جنيه بنزين 92 و ظبطنا الكاوتش على 30 و ادينا بتوع البنزينه حلاوه العربيه الجديده

مشينا نزله المقطم و طريق الاوتوستراد لغايه المعادى و عينيا فى وسط راسى ماشى و اخرى 90 و جربت الفرامل كذا مره لما يبقى قدامى ميكروباص بعدى و ما شاء الله افرامل 10 على 10

صوت الموتور عالى

مش شايف ورا كويس من مرايه الصالون

انطباع عام عن معرض محمد زكى :

ناس محترمه جدا و بتاعت شغل و امناء و مش مشكله تدفع 500 جنيه اوفر برايس فى مقابل حاجات مش موجوده فى سيارات التوكيل ده غير ان الورق هناخده بكره قبل اجازه العيد بحيث اول ماتخلص اجازه العيد الراجل يرخص على طول

الخلاصه :

اصعب حاجه تتخيلها انك تاخد يوتيرن على الاوتوستراد من جنب عربيه نقل بعربيه لسه خارجه من المعرض و انت اول مره تسوقها الساعه 4 العصر فى عز الزحمه و متكونشى عربيتك كمان لا عربيه اعز اصدقائك و هو ميت على الكرسى اللى جنبك من التعب

الحمد لله على نعمه الوصول بالسلامه و ربنا يبارك لصديقى محمد فى عربيته الجديده و يحفظهالو من كل شر و يديه خيرها و يكفيه شرها و يجعلها وش السعد عليه يارب

لو حد مهتم بشراء اللوجان 2012 تسليم فورى بدون انتظار التوكيل يتصل بمعرض محمد زكى (ده مش اعلان ده مجرد تقرير و الله يعلم بنيتى) و الفرق 500 جنيه الاوفر برايس هياخدهم فى اضافات البلاك لاين

اسف انى طولت عليكم

و كل سنه و انتم طيبين