السلام عليكم ورحمة الله وبركاته

اخباركوا ايه شباب نايل موتورز.اتمنى الجميع يكون بخير بامر الله.

كنت من فترة بحاول اركب فوانيس شبورة للنيو اكسنت ولخوفى من التوكيل واللعب فى الضفيرة ولغلو اسعار الفوجات والمفتاح والتركيب فكنت ماجلها.لحد ما ربنا كرمنى وقريت موضوع عمله اخ فاضل فى قسم الكيا عن تركيب ليدات زى المرسيدس والسكودا الجديدة.

وقد كان نزلت التوفيقية اشتريت الفوجات وروحت للكهربائى وركبتهم الحمد لله.

التفاصيل والاسعار :

سعر الفوجات 125 على شكل حرف L وفيه منهم مسطرة ب 110 ومصنعيه الكهربائى 45 جنيه

- كان اودامى اختيارين : اركبهم مع النور الواطى على الدراع او اشترى مفتاح لنور الفوجات من التوكيل او مركز معتمد وسعره 105 جنيه

-بعت ايميل للشركة فى الصين وسالتهم عن افضل طريقة لتركيب فوجاتهم وهل محتاجين كتاوت ولا توصليتهم بالسلوك اللى معاهم كافية والرد كان بسلوكها زى ما هى لان تحميلها مش عالى وبتستهلك 11-12 فولت وده برده مكتوب على العلبة.

-رحت على الكهربائى وخرملى فى الفيبرة السودا فى الاكصدام بشنيور مكان للمسمارين اللى فى كل فوج وركبهم وبعد كدة ربطهم بالصامولة اللى جايه معاهم.

-وصلهملى من البطارية علطول على مفتاح الشبورة من غير لعب فى الضفيرة مع انه قاللى ملهاش لازمة المفتاح وتكلفة على الفاضى وسحبهم قليل وعلى التور الصغير مش هتعمل مشاكل بامر الله.

وديه كانت النتيجة :


الملاحظات :

ان نورهم فى شارع ضلمة كويسين وبينوروا تقريبا متر لمتر ونص اودامى ولكن فى الاول والاخر هما منظر اكتر منهم اضاءة اعتمادية.ولو كان الكهربائى قربهم من بعض شوية كنت هشوف بيهم احسن لانهم كدة فارشين على جنب الطريق.

واى استفسار انا تحت امركوا والله الموفق.