جه اليوم اللي أقول فيه أنا عملت حادثة

**Khaled Online** · 28-08-2011 11:44 PM

الحمد لله على كل حال
أنا نازل من شغلي وراجع البيت النهاردة الساعة 5 عشان الطريق يبقى فاضي شوية
على طريق الكورنيش وانت رايح شبرا مصر وفاضل أقل من كيلو على روض الفرج
الطريق فاضي وأنا ماشي على ستين
ألاقي ست منقبة ومعاها بنتها ولا أختها لابسة إسدال واقفين في الحارة الوسطانية مش عارف مستنيين إيه بالضبط
وشايفني جاي لا بيكملوا طريقهم ولا يرجعوا لورا لا فضلوا محلك سر
الحارة الشمال فيها تاكسي ماشي أقل مني على الرغم من إن قدامه فاضي
أهو ده اللي أنا أفتكره قبل ما أحود يمين والموتوسيكل يكمل كام متر قدام وأتشقلب أنا مرتين تلاتة بفعل القصور الذاتي على الأسفلت قبل ما أقف خالص
والحمدلله أنا على طول لابس سيقتي جير فالإصابات خفيفة بدرجة ملحوظة

فيه تلفيات وطبعا معناه إني أروح للميكانية اللي مابطيقش حد فيهم و90 % منهم عايزين الجلد
وال10% الباقيين عاملين زي العنقاء كدة تسمع عنهم بس عمرك ما تشوفتهم

اللي مجنني إني كل مرة بيكون فيه ناس متخلفة في وسط الطريق لا بتعدي ولا هي فضلت على الرصيف إن مفيش أي داعي للي هم بيعملوه ده
يعني في المكان اللي وقعت فيه لا فيه إشارة ولا علامات بيضا على الأسفلت للمشاة ولا موقف أتوبيس ولا حتى الميكروباصات ولا التكاتك العرة بتقف فيها
يبقى ازاي الناس تيجي في نص الشارع وتقف؟

ياإما تاخد الشارع تعدية سريعة لما مايكونش فيه عربيات يا إما تستنى لما الطريق يقف خالص وبعديها تبقى تتمشى في وسط الشارع
الناس ما بتعرفش تعدي
وأنا مابخصصش على فكرة
إن كان الشباب بتناكتهم ولا الستات ببرودهم ولا ولا ولا

أنا دمي محروق ودي مش أول مرة أختار الأسفلت على إني أخبط بني آدم من لحم ودم
بس شكلي كدة غلطان
دول لازم ياخدوا ترخيص عشان يسمح ليهم يمشوا في الشارع والله
غير كدة يفضلوا في بيتهم ويرتاحوا ويريحونا

أنا قلت أفضفض شوية أحسن معبعب على الآخر
وربنا يسلم طريقكم

**beshomilan** · 29-08-2011 12:35 AM

الحمد لله على سلامتك استاذى ومش عارف اقولك ايه..العنوان فعلا صادم اوى وانا حسيت بيه اوى وبيك وباللى حصل
بجد انا حاسس بكلامك اوى وربنا يرحمنا من الستات بكل انواعهم سواء فى السواقة او المشى فى الشارع..

وكويس انك اخترت انك تفادى نفسك مكانهم لانك لو عملت العكس كان زمانك فى القسم دلوقتى ومعمولك محضر والناس هتشهد انك كنت ماشى بتهور وخبطت الاتنين وانك اللى غلطان على اساس انك من الاغنية اللى راكبين للرفاهية والتباهى..الحمد لله انك فاديت كل ده وربنا هداك للصح فى الوقت المناسب

وفعلا حاجة مستفزة اوى بعض التاكسيات والملاكى لما يكون قدامه فاضى ومهدى اوى وشايف حد جنبه مزنوق وولا يعديه وولا يعدى هو ويجيبه ورا..ياااااااااه هقولك ايه بس انا جوايا كتير زيك

كلنا تعبانين بجد وبقيت بكره العربية بسبب الشوارع واللى فيها

طلع اللى جواك احنا كلنا هنا هنخفف عليك
والحمد لله على كل حاجة اولا واخيرا ونشكر ربنا ونحمد فضله على نعمة الحياه
وطمنا عليك اكتر وان شاء الله تكون افضل دلوقتى

**Khaled Online** · 29-08-2011 01:00 AM

متشكر قوي على كلامك وذوقك
فيه شوية كشوط في الجلد عند الكوعين والركبتين
والجوانتي اللي كنت لابسه اتهري والجينز اتقطع من الركبة اليمين ومابقاش ينفع

كل ده كلام فاضي
أنا مضايق نفسيا أكتر من أي حاجة تانية وحقيقي الدنيا مضلمة في وشي من ناحية السواقة في البلد دي

وزي ما بتقول كدة السواقة في مصر مشكلة
وملهاش حل
ملهاش حل نهائي
هنعيد تخطيط الطرق؟
هنغسل أمخاخ الناس اللي واخدينها فهلوة؟
هندي كورسات مشاة للناس اللي مابتسوقش؟
هنمنع العربيات الي عدى عليها عشرين سنة تمشي؟
هنمنع الرشوة في رجال المرور؟
هنرجع رجال المرور ازاي للالتزام اللي يوم تلاقيهم ويوم لأ؟
هنبني مراكز إسعاف على الطرق؟
هنعمل إيه ولا إيه؟

أنا متعلم على عربية والدي الله يرحمه من أكتر من 8 سنين ومطلع رخصة سواقة العربية من أربع سنين وبرضه اخترت أشتري موتوسيكل بدل عربية عشان أقلل مشاكل السواقة من ناحية الركنة وغيره
لكن مفيش فايدة لا بالموتوسيكل ولا بالعربية

واضح إن أسهل حاجة أرجع للتاكسيات والمترو
حقيقي والله
وطز في الفلوس

**Medo007** · 29-08-2011 02:08 AM

حمدلله على سلامتك والحمدلله انها جت على قد كده
قدر الله وماشاء فعل
بجد انا كمان حاسس بيك معلش
وبالنسبة للناس اللى بقت سايقة معظمها عايزين غسيل دماغ وتوعية لانهم في الضياع
وبالنسبة لسواق التاكسي ده راجل بارد ومش هامه اللى ماشي جنبه
وبالنسبة للى كانوا بيعدوا بقى هنقول ايه
المفروض الواحد وهو ماشي يخلي باله من اللى حواليه
انا مره كنت ماشي عالطريق الزراعي في الحره اللى في النص وهو جاي شمالي ومره واحدة وهو جنبي اتفاجيء بعربية عطلانة انا بصيت علي العربية العطلانة بسرعة وبعدين بصيت لقيت التويوتا محشور جنبي وبيضرب فرامل ومكنش هيلحق انا بصيت يمين وملقتش حد رحت بسرعة يمين وهو كان لازق فيا وجيه في حارتي اللى هيا في النص ولقيته بيبص كده وبيشكرني مع ان ده واجب عليا بدل لاقدر الله كان خبط وتبقى خساير كبيرة
لازم الواحد يكون متعاون مع اللى حواليه
وكل سنة وانت طيب

**love7amada** · 29-08-2011 03:40 AM

الناس بتعدي بضهرها و بيبقي فيها بروووووووووووووووود رهيب

**hpxp** · 29-08-2011 06:52 AM

والله لسه مخبوط مفيش 5 سعات كل ده علشان البق.. مداش اشاره ودخل عندي في الاكصدام الحمدلله جت سليمه بس بشويه خدوش

**Khaled Online** · 29-08-2011 02:27 PM

المشاركة الأصلية كتبت بواسطة medo007

حمدلله على سلامتك والحمدلله انها جت على قد كده
قدر الله وماشاء فعل
بجد انا كمان حاسس بيك معلش
وبالنسبة للناس اللى بقت سايقة معظمها عايزين غسيل دماغ وتوعية لانهم في الضياع
وبالنسبة لسواق التاكسي ده راجل بارد ومش هامه اللى ماشي جنبه
وبالنسبة للى كانوا بيعدوا بقى هنقول ايه
المفروض الواحد وهو ماشي يخلي باله من اللى حواليه
انا مره كنت ماشي عالطريق الزراعي في الحره اللى في النص وهو جاي شمالي ومره واحدة وهو جنبي اتفاجيء بعربية عطلانة انا بصيت علي العربية العطلانة بسرعة وبعدين بصيت لقيت التويوتا محشور جنبي وبيضرب فرامل ومكنش هيلحق انا بصيت يمين وملقتش حد رحت بسرعة يمين وهو كان لازق فيا وجيه في حارتي اللى هيا في النص ولقيته بيبص كده وبيشكرني مع ان ده واجب عليا بدل لاقدر الله كان خبط وتبقى خساير كبيرة
لازم الواحد يكون متعاون مع اللى حواليه
وكل سنة وانت طيب

الله يسلمك والحمدلله فعلا
ياريت لما نسوق نراعي بعض أكتر ماكانش حد تعب
وعيد سعيد عليك

المشاركة الأصلية كتبت بواسطة love7amada

الناس بتعدي بضهرها و بيبقي فيها بروووووووووووووووود رهيب

أيوة واللي بيتكلم في المحمول وفي نفس الوقت باصص للناحية اللي مش جاية منها العربيات
ارحمنا يارب منهم

المشاركة الأصلية كتبت بواسطة hpxp

والله لسه مخبوط مفيش 5 سعات كل ده علشان البق.. مداش اشاره ودخل عندي في الاكصدام الحمدلله جت سليمه بس بشويه خدوش

حصل خير
وسيبك من الخدوش
ده مفيش عربية في البلد دي سليمة
بص حواليك وانت سايق وهتعرف
فماتشيلش في نفسك وربنا يعوض عليك

**Elawany13** · 29-08-2011 02:37 PM

حمد الله على السلامة
وربنا يسترها معانا ومعاك

**SYD** · 30-08-2011 07:49 AM

الف حمدلله علي سلامتك
مايقع الا الشاطر ، وانت بجد شاطر انك فديت ناس بس مش بفلوسك بنفسك

هي دي بلدنا ولازم نتحملها بكل مشاكلها وسلبياتها، طالما مش احنا الي اختارناها تكون بلدنا يبقي لازم نرضي بحالنا ونحاول نتأقلم عليها ونظبط دماغنا عليها

الف حمدلله علي سلامتك

انا كمان حاسس بيك، لأني من اكتر الناس الملتزمة في حياتي وفي السواقة بالزات وكنت دايما متخيل ان السواقة لو ليها كبير يبقي انا الكبير بتاعها بس اتضحلي بعد حادثتي اني مش كبير ولا حاجة ويموت المعلم ولا يتعلم وللأسف لتاني مرة هقولها انا عملت حادثة يا رجالة (اصلي عملت حادثة مرتين في حياتي مرة اول ما سوقت من عشر سنين والتانية في اول رمضان)

كل سنة وانت طيب

وحمدلله علي سلامتك

والله المستعان
،
،