الموضوع: الشرطه السعوديه في الحرم النبوي الشريف..حدث امام عيني

السلام عليكم ورحمة الله وبركاته ...عيد سعيد عليكم وعلى كل المسلمين ..

انا بقضي الاجازه الصيفيه بقالي شهر ونصف في مكه المكرمه عند اهلي ..والحمد لله والشكر له ...قضيت رمضان على افضل وجه في الحرم المكي ..وده فضل من ربي سبحانه وتعالى
وخلال تلك الفتره كانت احتكاكاتي خفيفه بالاخوه السعوديين ولكن كانت احتكاكات كويسه .. في الحرم كان فيه مواطنيين سعوديين يمرون عليك بعد صلاة التراويح بالتمر والقهوه والعيش والمأكولات الخفيفه ..والحمدلله قضي رمضان وانا في غاية الرضى عن السعوديه ....لكن للاسف لم تمر الايام كما كنت اتوقع
ففي ثاني ايام عيد الفطر قررت اصطحاب جدتي وامي للذهاب للمدينه المنوره
والحمد لله نزلت النهارده اصلي الظهر في الحرم النبوي الشريف ..ولحقت مكان في الروضه الشريفه وصليت فيه ..وبينما كنت في طريقي للخروج ..اذا بمشهد لم اكن اتوقعه ...ففي الحرم النبوي يتم فصل الروضه الشريفه عن باقي الحرم بقطع قماش كبيره لمنع التكدس داخل الروضه ولاغلاقها على من فيها حتى لايحدث ازدحام ..وبعد انتهاء الصلاه كان هناك تكدس على الفاصل القماش فالجالسين في الروضه يريدون الخروج لباقي الحرم والجالسين في الحرم يريدون الدخول الى الروضه ..المهم ..شاب مصري في العشرينات وشكله من المقيمين يتبرع بفعل فهلوي مصري ويقوم بفعل اغبى من الغباء ..وهو فصل الستار القماشي الفاصل بنفسه ..مما سيتسبب في حدوث تكدس رهيب ..المهم ان عسكري سعودي شافه ..وقام نط من فوق الستار ونزل ضرب في الشاب المصري ..وضربه في وشه بالبوكسات وضربه في صدره وجرجره الى مكتب الشرطه وهو بيضرب فيه بمنتهى الوحشيه ..لدرجه ان الشاب لما دخل انهار من البكاء ..انا كنت مراقب الموضوع من اوله ..وبصراحه دمي كان بيغلي من منظر الضرب ..والمصريين كانوا كلهم بيتفرجوا وبيترجوا العسكري انه يسامحه ويعفو عنه ..وبعد لما ادخله مكتب الشرطه ..انتهت حكايته وابتدت حكايتي انا

انا دمي كان بيغلي وحاسيت اني لو سكت هبقى سلبي ..وحتى لو الواد المصري عمل فعل غبي ..لكن مايستحقش الضرب والاهانه الوحشيه دي لدرجة انها تخلي شاب يبكي

روحت ل2 عساكر واقفين على باب الروضه بجانب مكتب الشرطه (باب الحرم الخارجي للروضه ) روحت كلمت واحد منهم بأنفعال لكن بمنتهى الادب والاحترام وقولتله ...ازاي عسكري يضرب المصلي كده بالوحشيه دي وازاي يعتدي عليه ..لقيته رد عليا وبيقولي

يستحق اللي حصل له لانه حيوان مش انسان ..وانت ايه دخلك ..
قولتله لا هو انسان مش حيوان
قالي انجلع من قدامي (يعني غور من هنا ) قبل لما اخدت واعمل فيك زيه ووقفك جمبه ..ومسك دراعي وشدني وشتمني
قولتله احترم نفسك ونزل ايدك وانا مش همشي من هنا لان ده مش حرمك دي حرم المسلمين..وروحت ناطر ايده
قالي هديك بالبوكس في وجهك ..والناس اتدخلت والعساكر زملاؤه اتدخلو وفضو
واول لما مسكوه قال يعني اتعصب وقال يعني بيجري عليا وماسك ايده وقال ايه عايز يضرب بالبوكس في وشي ..وبيجز على سنانه قال يعني متعصب وقعد يشتم فيا وهما ماسكينه .. (نظام سيبوني عليه هموته ) لان الحمد لله جسمي وشكلي لا يشجع على ان اي بني ادم يتخانق معايا
والمصريين اتلمو وشدوني بره ..وقعدو يقولولي دي بلدهم واحنا غلابه وده حرمهم واحنا ضعفاء وسيبك منه ..والحمد لله ان ربنا الهمني ان اكظم غيظي ..وان متطلعش كلمه واحده غلط مني لاني كنت خارج من جو روحاني عظيم وكنت بالقرب من الحبيب المصطفى صلى الله عليه وسلم .. واكتفيت بأني وقفت بره بنظر له عيني في عينه لاعرفه اني مش خايف منه لحد ما اداره وجهه وهو بينظر لي بنظرات سخريه ..وقام العساكر على الفور بعمل كردون حول الباب وتجمعه حوله خوفا من القيام بأعمال شغب واغلقوه بالشريط البلاستيك .. ولا اعلم مصير الشاب المصري ..والحمد لله رجعت بيتي في مكه في انتظار ان يتم اخر اسبوع ليا على خير ..
وارجع البلد تاني

الرجاء عدم ادخال الدين في الموضوع ..فمن فعل ذلك هو ابعد مايكون عن ديننا الاسلامي الحنيف

المصرين في السعوديه هما الي عملوا في نفسهم كده
شوفهم وهما بيلموا الاكل وبيشحتوا في العمره والحج وانت حتعرف ليه المعامله دي بالاضافه للنظام السابق اللي مخلاش للمصري كرامه في مصر ولا بره مصر