إخوانى أعضاء المنتدى الأفاضل

عندي مشكله احترت فيها و أرجو أن تساعدونى فى حلها

عندى أوكتافيا a5 موديل 2006 أوتوماتيك, الفتيس بتاعها وهي بارده مافيهوش أى مشكله لكن بعد ما تمشى شويه بيبدأ يحصل تنتيش فى الغيارات خاصة لما بتيجى تاخد الغيار التالت وأحيانا بتتأخر على ما تاخد الغيار ويحدث رزع فى الفتيس. وأيضا لما بتاخد غيار r بتتأخرثوانى على ما تبدأ تستجيب و تتحرك للخلف وبتحصل رزعه جامده جدا فى بعض الأحيان بترج العربيه كلها. المهم مشاكل الفتيس دى بتحصل لما بسوق داخل المدينه يعنى فيه مطبات كتير والعربيه مش واخده راحتها فى السرعه -ما بين الغيارات الأول إلى الرابع - لكن لما بسوق على طريق مفتوح والعربيه تجرى ما بيكونش فيه أي مشكله فى الغيارات حتى لو نزلت للأول والتانى مرات عديده أو خدت غيار r الإستجابه بتكون سريعه و مش بيحصل أي رزع أو صوت من الفتيس.
من فتره كنت رحت التوكيل و قالولى غالبا تكون محتاج تغير زيت الفتيس وبالفعل غيرولى الزيت بعد ما غسلوا الفتيس ووضعوا زيت تجربه. بعدها مشيت السياره كويس و رجعت كشفوا عليها فى التوكيل و قالوا كده الفتيس تمام, لكن بعد حوالى أسبوعين رجعت تظهر نفس المشاكل من جديد.

أنا آسف طولت عليكم, بس ياريت تفيدونى و أسمع نصيحتكم فى الموضوع ده ياترى الحكايه حكاية زيت ولا محتاج أغير فتيس و لو هحتاج أغير الفتيس ألاقيه فين(استيراد طبعا) و إزاي أضمن إن الفتيس الإستيرد يكون سليم؟؟؟؟

عذرا على الإطاله,

تقبلوا خالص تحياتى