الموضوع: بعد الاجازه كلام و استفسارات و كل اللي حصل هحكيه

السلام عليكم اعضاء المنتدي الكرام

اخيرا جت اجازه طويلة الواحد استمتع فيها علي قد ما يقدر و هنرجع من بكره تاني للشغل و تعب الاعصاب ع العموم ربنا يعينا
انا ف الاجازه دي حاولت علي قد ما اقدر اجرب فيها عربيتي و لانها بئالها معايا حوالي 6 شهور بس و من غير ما اسافر بيها و لا حاجه فكنت لازم اشوف علي طريق السفر ايه ظروفها
خدت الاوبترا و رحنا سوا العجمي الاول قبل السفر كنت محتاج استعدل جنوط و كان ليا في الموضوع ده استشارات كتير معاكوا لحد ما روحت لاشرفكوا اللي عندنا ف المطرية و قاموا بالواجب استعدلوا الجنوط و رصصوا الكاوتش بس ملحقتش اظبط زوايا

و سافرت بعد ما عملت كل ده

المفاجأة : ان العربيه علي الطريق جملية اوي لدرجة اني محستش بالطريق و الله ، بس اللي غاظني ان العربيه اوتوماتيك و كان نفسي ف الطلعه دي العربيه تبقي مانوال عشان اعرف اشد بيها بس لله الحمد لحد 170 كم/س - اعلي سرعه جبتها - العربيه كانت زي الفل في السحب و اللي كانوا معايا مكانوش حاسين بالجري بتاع العربيه خالص .....

الجميل بأه اني كنت طول السفر و لما وصلت مشغل التكييف علي طول و بجري بالعربيه هنا و هنا و لما وصلت حسبت البنزين و الاستهلاك عشان اعرف اوبتي اخبارها ايه ؟؟ لقيت انه اقل من 9كم لكل لتر و الله العظيم و دي اكتر حاجه بسطاني ..

العربيه يا جماعه طلعت بنت حلال والله و سندت معايا و فيه ناس معايا - و مش عايز ضحك - كانوا بيقلولي انت فيه بينك و بين العربيه دي كميا

نيجي بئه للاستفسار الحاجه اللي لاحظتها في العربيه ان رغم اني عامل ترصيص بس الطاره كانت بتترعش في ايدي جامد حبتين المهم فضلت مركز مع الموضوع ده لحد ما اكتشفت اني لما ببقي دايس بنزين الطاره بتترعش و لما ارفع رجلي الاقي مفيش حاجه الطاره بتبقي ماسكه نفسها و مش بتترعش خالص الموضوع اعتقد انه غريب و مسمعتش عنه قبل كده فحبيت اسالكم عليه قبل ما اروح التوكيل عند صيانه ال 35 ..

ع العموم اسف ع الاطاله بس حبيت اتكلم معاكو لاني لما بيحصل اي مشكله بجري علي المنتدي هنا علي طول فلما جربت العربيه لاخر حاجه فيها حبيت احكيلكم بالتفصيل

واسف ع الاطاله مره تانيه و مستني ردودكم بخصوص المشكلة بتاعة الدركسيون

المشاركة الأصلية كتبت بواسطة afrtow

ربنا يباركلك فيها
الرجه اللي انت بتحس بيها ديه الاغلب جلب المقصات الكبيره , حتلاقيها نشفت
تقريبا سعر الواحده في حدود 50 جنيه
بسيطه ان شاء الله
ممكن تاكد برده انها السبب حتلاقي وانت بتفرمل للتوقف الرجه ديه موجوده
وشكرا

لا بصراحه لما بفرمل مش بيبقي فيه رجه خالص العربيه بتبقي ماسكه نفسها جدا
بس ع العموم شكرا علي تعبك