السلام عليكم انا اسف على التاخير لكنى وعدتكم ان احكيلكم عن جولتى يوم الاربعاء الماضى بين الشركات الثلاثه فى رحله اسميتها ( رحلة البحث عن الحلال ) وما اصعب البحث عن الحلال فى ايامنا هذه ولكن استكمالا للمشوار الذى بدأ من اكثر من سنه ونصف من عمالقة هذا المنتدى فى اكثر الموضوعات الشيقة والمهمة جداااا واسال الله عز وجل ان يكتب بكل حرف من حروف هذا الموضوع لصاحبه اجرا ويرزقنا جميعا محبته ورضاه .....اسف على الاطاله ولنبدأ الرحله.....
فى البدايه احب اقول ان كان معايا اخ عزيز احسبه على خير ولا ازكى على الله احدا هذ الشخص على علم وقد قمت بهذه الجولة فى صحبته وبسيارته الخاصة بدأنا الرحله بعد صلاة الظهر مباشرة حيث توجهنا اولا الى شركة كونتاكت لتجارة السيارات لمقابلة مندوب الشركه الذى اتصل بى واكد انهم يمتلكون فتوى من الدكتور ياسر برهامى بالاسكندرية وبعد انتظار اكثر من ساعة ونصف بالشركه اخيرا قابلنا هذا المندوب ودار بيننا الحوار الاتى :
قلتله احنا عايزين يكون البيع شرعى ووجود التوكيل يبطل العقد ويفسد البيع نظرا لفتوى الدكتور سالوس
فقال المندوب نحن نمتلك فتوى من الدكتور ياسر برهامى
وبالفعل اطلعنا على نص الفتوى ولكن الخلاف مازال قائما وهو ان الدكتور على سالوس لم يجيز وجود التوكيل وان الدكتور ياسر اجاز التوكيل كضمان لحقوق الشركه وللعلم لقد سالنا اكثر من شيخ فى هذه المساله ولم يجيز التوكيل يناء على ان هذا الشرط يجعل عملية البيع ( كبيعتين فى بيعه ) ويلغى البيع نفسه وهذا هو الخلاف
ثم تطرقنا الى اذا كانت الشركه تريد تطبيق العقد الشرعى وتضمن حقوقها فما المانع فى اعادة صياغة بند التوكيل حتى يكون مشروطا بالتعثر فى السداد فليس من المعقول ان يكون هنالك توكيل بالبيع قبل استلام السياره ( بالبلدى كده يعنى انا قبل ما اخرج من عندكم انت ممكن تبيع السياره لنفسك ) فاين ضمان حقوقى انا ....
فرد بان هذا لم ولن يحدث لاننا شركه محترمه وبعدين موضوع ان التوكيل يكون مشروط ده غير قانونى مما يجعل التوكيل ملغى ....
فقلنا له يمكنك اضافة اى بنود او ضمانات باى صوره تراها ولكن بدون مخالفة الشرع وبعيدا عن هذا التوكيل
فقال علشان اريحكم مش هينفع نلغى موضوع التوكيل ..ده شئ اساسى والادارة بتعتبره الضمان الوحيد وهنا انتهى الكلام .....
ودى كانت نهايه قصة كونتاكت ...:
وبدأنا قصة جديده فى رحلة البحث عن الحلال .....ذهبنا الى الشركه المتحده لتجارة السيارات ( عبداللطيف جميل) وقابلنا مندوبهم الذى قابلنا بترحاب ودار بيننا الحوار الاتى :
المندوب : حضرتك كنت عايز سياره هيونداى اكسنت وزى ما قلت لحضرتك قبل كده ان احنا ما بنشتغلش فى الهيونداى لاننا مش وكيل معتمد ليهم احنا بنشتغل فى الشيفورليه وال سبرانزا واالنيسان علشان كده احنا هنجيبلك العربيه بسعرها القديم
قلتله اللى هو 78000
قاللى اه بس انا مش هبيعها بالسعر ده لانى هشتريها بالسعر ده
قلتله امال هتبعها بكام
قاللى انا باخد مكسب 3%
قلتله دى تبقى كده هتعدى ال 80000
قاللى اه بس علشان هى اصلا غاليه عليك الفين جنيه عن سعرها دلوقتى انا هاخد منك الف بس تبقى تمنها 79000
قلتله بس كده دى تبقى غاليه عليا 3000 جنيه عن سعرها دلوقتى وبعدين انت لوحبيت تشتريها من التوكيل او من اى معرض دلوقتى كاش هتاخدها ب 76000 مش ب 78000
قاللى ده لو انا حد عادى انما انا تاجر وهو عارف انى هاخدها ابيعها
( طبعا انا مش فاهم يعنى ايه انا تاجر دى هو ايه الفرق يعنى مش عارف )
المهم قلتله طب كمل كلامك وبعدين نشوف
قاللى يبقى خلاص العربيه كده تمنها 79000 ... نضيف بقى 500 جنيه مصاريف اداريه تحب تدفعهم كاش ولا نحطهم على تمن العربيه ويبقوا فى القسط
قلتله مش هتفرق كمل
قالى هتدفع مقدم كام قلتله ايه النظام عندكم
قاللى لو هتدفع 60% من تمن العربيه تبقى الفايده 9% ومفيش تأمين
ولو هتدفع اقل من كده تبقى الفايده 9% + تامين اجبارى ولو مش عايز تامين تبقى الفايده 10%.......
قلتله انا مش هأمن
قاللى تبقى الفايده 10%
قلتله طب ايه الاوراق المطلوبه
قاللى (H.R letter ) وصورة بطاقتك ووصل نور وصورة بطاقة الضامن واستماره تامين والمفروض يكون مرتبك ضعف قيمة القسط ....... وبعدين جاب صوره من العقد بصينا عليها وطبعا مفيش تعديلات فى العقد عن الصورة القديمه وحضراتكم عارفين اللى فيها حتى لا اطيل عليكم
قلتله طب اجراءات التعاقد هتكون ازاىوطريقة الدفع ازاى
قاللى حضرتك هتمضى شيكات مجمعة عن كل سنه وكل شهر هتيجى تدفع القسط وتاخد سند او ايصال استلام
قلتله انا مش فاضى اجيلك كل شهر ادفع واخد وصل وبعدين ليه شيكات مجمعه وشيكات منفصله انا همضيلك شيكات عن كل شهر تروح البنك تودع الشيك وتاخد فلوسك ليه اللف واجيلك وتجيلى
قاللى ماشى بس حضرتك هتمضى وصولات امانه انت والضامن على عدد السنين يعنى لو اربع سنين انت تمضى اتنين وهو اتنين
قلتله يعنى انا لو مدفعتش قسط ولا حاجه تاخده الراجل تدخلوه السجن يعنى هو يعمل معايا جميل وانا ادخله السجن
قاللى احنا بقالنا 19 سنه فى السوق وعمرنا ما حد من العملاء بتوعنا دخل السجن
قلتله طب سيبك من العربيه الاكسنت مش انت يتقول ان انت موزع ل شيفورليه يعنى لو حبيت اخد منك عربيه لانوس هاخدها بكام وخللى بالك هما عاملين عليها تخفيض
قاللى انا عارف بس انا هديهالك بتمنها القديم اللى هو ب 70000:POINTI~2[2]::POINTI~2[2]:
قلتله ليه يعنى
قاللى انت بعد ما تطلع الرخصه تروح بيها لبتوع منصور شيفورليه وهما هيدولك 1000 جنيه
قلتله يعنى اى حد هيروح بالرخصه اللى طلعها هيدولوا 1000جنيه
قاللى اه ....(بمنتهى الثقه)
دى حاجه اسمها (cash back ) ودى حاجه معروفه واسال بتوع منصور شيفورليه وهما يقولولك وعلى العموم هما جانبنا هنا فى شارع جامعة الدول
قلتله احنا كده كده هنروح لهم قاللى ابقى اسالهم ...
قلتله o.k
( ودى كانت نهايه قصة عبد اللطيف جميل ) ........
بصراحه بدأت احس ان مفيش امل ...فعلا الحلال صعب اووووووى دلوقتى وان كان صورة التعاقد اجازها الدكتور حسين شحاته معاهم بس مش عارف ( هناك فى القلب شئ ما ) وبعدين حسيت انه بيستغل الموقف بصراحه مارتحتش معاهم .....( وده رايى الشخصى يا جماعه بدون تاثير على اى حد وكل واحد حر فى رايه بس نصيحتى ان اللى عايز يتعامل معاهم يخوض تجربته بنفسه دون النظر الى تجربة اى حد لان دى وجهات نظر انا اتحرى الامانه فى نقل المعلومه فقط دون الالتفات لارائى واحساسى )...
المهم اتفقت مع صديقى الشيخ محمد اللى تعبته معايا جدااااااا فى الرحله دى مع علمى بان وقته مشغول جدااا بس الراجل للامانه لم يعطنى اى احساس بالتذمر من كل هذا الوقت المهدرمع اننا قربنا من صلاة العشاء ....اسال الله ان يجزيه عنى خير الجزاء وان يجعل هذا فى ميزان حسناته....اتفقنا ان نذهب الى شركه منصور وهى المحطه الاخيره فى هذه الرحله وحدث الاتى
دخلنا المعرض اللى موجود فى شارع جامعة الدول... الناس عند منصور تحس انها متوهة او مش فارق معاهم اى حاجه المهم لقينا حد اخيراااا يعبرنا ...
سالنا المندوب اللى كلمنا احنا عايزين نشترى عربيه لانوس
قاللى كاش
قلتله لأ تقسيط
قاللى طب ادخل عند الاستاذ فلان هو اللى مسئول عن التقسيط
دخلنا وبدأ الحوار الاتى:
حضرتك عايز عربيه تقسيط
قلتله ايوه عايز عربيه لانوس
قاللى هتدفع كام
قلتله ايه النظام عندكم
قاللى لو دفعت 50% تبقى الفايده 10% بدون تأمين
ولو دفعت اقل من 50% يبقى لازم تأمين
قلتله ايه الاوراق المطلوبه
قاللى (H.R letter ) وصورة بطاقتك ووصل نور وصورة بطاقة الضامن
قلتله ايه اجراءات التعاقد
قاللى مفيش حضرتك بعد ما تحضر الاوراق دى هتدفع 5000 جنيه دفعة حجز ونكتب استمارة تعارف فيها اسمك وعنوانك وايه العربيه اللى انت عايزها ولونها وهتدفع كام وتفسط على كام حاجه روتينيه كده يعنى وبعدين هنعمل عنك استعلام ولو اوراقك اتقبلت هنتصل بيك تيجى تمضى العقد وتدفع باقى المقدم وتستلم عربيتك تانى يوم
قلتله طب ممكن اشوف العقد
قاللى طبعا
جابلى صيغة العقد عبارة عن ورقه واحده وش وضهر
قلتله هى دى بس
قاللى اه
بصيت فيها واديت نسخه للشيخ صديقى وطبعا البند المعروف عند كل الشركات ( حفظ ملكية السيارة حتى سداد باقى الثمن ) ده كان تانى بند فى العقد بعد بند اقرار الطرفين باهليتهم للتعاقد وان الطرف الول اللى هو الشركه باع للطرف التانى اللى هو انا عربيه نوعها كذه ورقم موتورها كذه وشاسيه كذه وبعدين شوية بنود دباجه عاديه بمعاينة السياره معاينه نافيه للجهاله وانه غير مسئول عن اى عيوب بعد الاستلام والكلام العادى ده .....وبعدين بند خامس عن اعسار المدين وتاخير دفع الاقساط او الوفاه شبه البند اللى فى عقد عبد اللطيف جميل بس ده بيقول انه هيرفع قضيه ويحجزعلى العربيه ويتحفظ عليها وتكون السياره من حقه دون المطالبه بالاقساط المدفوعه كتعويض مقابل الاستعمال
وبعد كده بند حظر بيع السيارة او التصرف فيها وبعد كده كذا بند دباجه عاديه برضه .....يعنى تحس انه عقد اسلامى وان كان ده مش قصدهم طبعا بس عقد عادى مفيهوش حاجه لو قلنا ان بند حفظ الملكيه اللى اجازه الدكتور شحاته ده يعدى
المهم سألته عن ايه الاجراءات المتبعه لو انا اتاخرت فى دفع الاقساط فى غرامة تاخير او فوائد او اى حاجه يعنى
قاللى معرفش
قلتله ما تعرفش ازاى يعنى اصل العقد مش موضح النقطه دى
قاللى استنى اكلم الحسابات اصل محدش سالنى السؤال ده قبل كده انتوا ناويين تتاخروا فى الدفع ولا ايه
قلتله لأ ان شاء الله بس يعنى ( حاجه فى نفسى ).....طبعاااا حضراتكم فاهمين
اتصل بالحسابات وقاللى هما بيقولوا مفيش غرامات تاخير ولو اول مره بتصل بالعميل نتاكد منه ونفكره بميعاد الدفع لو اتاخر برضه فى الدفع او كررها تانى بناخد رفض على الشيك وانت عارف الباقى ويبدأوا ياخدوا اجراءاتهم القانونية لو تاكدوا من عدم جدية العميل
قلتله بس كده شكررررااا يعنى الحمد لله مفيش غرامه ....وان شاء الله مفيش تأخير بس نبعد بس عن شبهة الربا لان العقد فعلا لا ينص على غرامات تاخير بس انا كنت عايز اعرف الاجراءات
قلتله طب نتكلم بقه فى العربيه:10D5C8~1107:
الانوس بكام دلوقتى
قاللى عليها تخفيض 1000 جنيه يعنى ب 69000 والعرض ده لحد اخر فبراير
قلتله اجراءات التعاقد ازاى
قاللى زى ما قلتلك هتدفع المقدم وتمضى على شيكات بعدد الاقساط كل شهر بشيك والضامن هيمضى معاك
قلتله وبعدين
قاللى خلاص انت عايز ايه تانى
قاتله انا مش عايز حاجه تانى بس ايه البساطه دى مفيش وصولات امانه ..ولا شيكات مجمعه ...ولا توكيل ولا اى حاجه ..هو كده خلاص
قاللى هو بس زى ما قلتلك بس اهم حاجه مفيش تأخير فى الدفع علشان ما يبقاش فىه مشاكل
قلتله ان شاء الله مفيش تاخير ولا مشاكل
قلتله طب انا سمعت حاجه كده ....هل فى حاجه عندكم اسمها (cash back)
قاللى يعنى ايه
قلتله اصل فى حد قاللى انى اشترى اى عربيه شيفورليه من عنده بالسعر الاصلى وبعد الترخيص .....
قاللى تجيبلى الرخصة واديلك فرق الفلوس مش كده
قلتله اه
قاللى الكلام ده كلام فاضى وما بيحصلش وما تصدقوش مفيش حاجه اسمها كده
قاللى حضرتك هتدفع دلوقتى
قلتله انا معايا الاوراق يتاعتى جاهزه بره فى العربيه ومعايا فلوس المقدم علشان انا كنت ناوى اللى هلاقيه صح هخلص معاه بغض النظر عن نوع العربيه
قاللى خلاص علشان الخزنه قربت تقفل
الشيخ محمد صديقى قاللى احنا تعبانين دلوقتى وما تتسرعش احنا كده عرفنا اللى احنا عايزينه ... احنا نروح دلوقتى وندى نفسنا فرصة نفكر ونقرا العقود بالراحه تانى واحده واحده وناخد قرارنا بتأنى مش هتفرق من يوم ولا اتنين
وعلشان انا اثق فى راى الشيخ قمنا روحنا وانا عندى امل انى انتهى بقه من الموضوع ده واخلص ومستنى الرد من الشيخ
ودى كانت نهاية هذه الرحله الطويللللللللللله جداااااا جداااا والمرهقه جدااااا
معلهش انا رغيت كتيرررررررررررررررررررررر رررر انا عارف ....ده انا تعبت من الكتابه ...بس انا حبيت انقل كل اللى حصل بالتفصيل واسأل الله ان انفع اخوانى فى المنتدى لعل هذه الرحله تكون فيها فايده لكل من يحاول البعد عن شبهة الربا ....واسف على الاطاله
وفى انتظار رد الشيخ
المفضلات