يا ريت حد يفيدنى صوت تصفيير فى ال 127

**help4me** · 07-09-2011 04:09 AM

المشاركة الأصلية كتبت بواسطة adhamhossam

السلام عليكم و رحمة الله و بركاته
أختي الفاضلة
انا معايا 127 أيضا و واجهت من فترة موضوع الصفارة دة سواء اثناء الملفات او الفرامل او اثناء السير
روحت لبتاع الزوايا و قولتله عالمشكلة و قللي هي فعلن ظبط زوايا
ان شاء الله أكيد مشكلتك ضبط زوايا و بالمرة إعملي ترصيص للأربع عجلات عشان لو في رعشة في الدريكسيون علي السرعات العالية
بالنسبة لكونك من مساكن عين شمس
حظك حلو ان العفشجي و الزوايا بتوعي من عين شمس
انا بعمل عفشة و زوايا عند (مركز مصطفي عفشة ) دة في شارع اسمه الحرية قرب شارع مصطفي حافظ و شارع احمد عرابي
روحي له و قابلي الأسطي مصطفي نفسه و قوليله انا جاية من طرف أدهم إللي معاه العربية ال 127 هو عارفني و اشرحيله المشكله و هتلاقي معاه الأسطي هاني دة بتاع الزوايا

أسف للإطالة - بالتوفيق ان شاء الله

لسلام عليكم و رحمة الله و بركاته
جزاكم الله كل خير على ردك الوافى
و الحقيقة انا بس كنت عايزة اعرف مكان العفشجى فين بالظبط
انا عارفة شارع الحرية بس يا ترى هو فين من ناحية احمد عرابى و لا من ناحية جسر السويس
و تانى حاجة يا ريت تقول لى هو حضرتك المساعدين عندك زيت اللى بيتملوا و لا هوا ؟؟
علشان انا عندى المساعدين الخلفيين بايظيين و فيه سواق فى المدرسة قالى ممكن تسيبيهم زى ما هم لان العربية بتحمل ورا على سوست ..
و بعدين لما رحت للميكانيكى النهاردة قالى لازم يتغيروا بسرعة و الا ياثروا على شاسيه العربية نفسه
و معلهش على الاطالة و تاخر وقت الرسالة
و يا ريت حضرتك ترد عليه و ربنا يجازيك كل خير
بالمناسبة العفشجى اخبار اسعاره ايه ؟؟
لانهم ما بيصدقوا يشوفوا واحدة ست و يغلوا اوى
و جزاكم الله كل خير مرة تانية و ربنا يبارك فى حضرتك .

**help4me** · 07-09-2011 04:39 AM

السلام عليكم و رحمة الله و بركاته
اولا جزاكم الله كل خير على ردودكم و اهتمامكم و ربنا يرضى عنا جميعا و يجعل المشاركات دى نافعة لنا و لغيرنا و ينوبنا جميعا الثواب
الحمد لله بعد ما رحت للميكانيكى بعتنى للعفشجى اللى تبعه ( و ده كنت غيرت عنده قبل كده المساعدين الامامى باتنين استيراد اللى هو بيقولوا عليه زيت علشان بيتملوا )
و على فكرة انا قبل ما اركب المساعدين الاستيراد دول كنت مركبة مكانهم اتنين جداد المانى و ماركة و ماكملوش سنة و جابوا زيت و يعنى باظوا
المهم انا ربنا يسامحنى طولت عليكم
العفشجى قالى انه عنده اتنين مساعدين خلفى استيراد و زيت و بيتملوا . قلت طيب ماشى بكام بقى يا سيدى قالى ب 200 جنيه ... الحقيقة انا تنحت انا كنت جبت الاماى ب 100 او 120 مش فاكرة و هو ملاهم و ركبهم و اخد 60 جنيه . المهم قلت له الكلام ده قالى ما هو بالتركيب . قلت له ربنا يسهل و ابقى اعمل لنا ديسكونت
المهم بص ورا قالى ان العربيه عاليه اوى و علشان كده مش ناعمة و قالى انت مركبة على سوسته 3 فرد ؟؟ قولتله ايوة . قالى لا هما اتنين بس علشان تبقى ناعمة فى المطبات و ما تخبطش ..
( الحقيقة هما فى الاول كانوا اتنين و كانت بتحك فى المطبات و بعد ما ركبت التالتة عليت بس انا حاسة ان كده احسن . بس من ساعتها و العربية بتخبط من ورا جامد سوا فى مطبات او حفر " و ما اكترها فى بلدنا و الحمد لله " )
المهم قالى تعالى بكرة باذن الله نغير المساعدين الخلفى و نشيل فردة من السوسته اللى ورا قال علشان العربية تبقى ناعمة و كمان نغير كاوتش البطاحات فى المساعدين الامامى علشان اتاكلوا
قلت له ماشى يا اسطى
و انا مروحة بعد ما بابا قرب يدوخ منى عديت على واحد تانى بتاع عفشة كنت اتعاملت معاه قبل كده ( اللى كنت مركبة عنده المساعين الالمانى " 400جنيه " و ماكملوش سنة و باظوا )
قالى برده ان المساعدين الخلفى بايظين و لازم يتغيروا و قالى ان فيه مساعدين زيت بيتملوا جداد ( و الحقيقة انا كنت سمعت ان الزيت ما فيش منه جديد استيراد بس قياريت حد يفيدنا ) و قالى حيجيب لى اتنين استيراد ب 180 ده طبعا غير التركيب . قلت ماشى و بعدين سالته عن السوسته الخلفى انها عالية و الاحسن اشيل منها فردة من التلاته ؟؟ قالى لا هى كده مضبوطة و عاليه بتيقى احسن
انا مشيت من عنده دماغى بتلف و المفروض كان فيه مشوار مع بابا . قلت له انا دايخة و ضغطى واطى و روحت و نمت من قهرتى و فوضت امرى لله
انا مش عارفة اعمل ايه بس شكلها كده حاروح زى الفلة كده للاولانى و الله المستعان
يا ريت لو حد يقدر يدلنى ايه الصح فى الحوارات دى كلها يقول لى و ربنا يجازيكم كل خير
انا عارفة انى طولت عليكم بس حبيت اقولكم التفاصيل كلها علشان تبقى الصورة واضحة و يمكن حد يستفاد
ربنا يحفظنا جميعا و يسلم طريقنا و يلهمنا الصواب
و شكلها كده فى لاخر حاسيب التدريس و اروح اقف فى ورشة . انا حاسة ان كلامى حتى بقى زى الصنايعية ناقص لى بس شوية شحم و عفريته
و ربنا يستر عليه

**adhamhossam** · 07-09-2011 06:00 AM

اولا حسبنا الله و نعم الوكيل في الصنايعية إللي بتفتي و بتخلي الواحد يدفع في فلوس و خلاص من غير فايدة
بصي يا أستاذة
اول ما جبت العربية من 4 سنوات كانت السوستة إللي ورا أو بيسموها الورقة أو القنطرة
كان عندي ورقتين أو 2 سوستة بس طبعا نتيجة الحمولة إللي كانت بتركب معايا ورا ادت لكسر سوستة أو ورقة
روحت لمصطفي عفشة لحمها و قاللي حط سوستة ثالثة طالما بتركب معاك حمولة زائدة
المهم ركبت سوستة ثالثة و الموضوع دخل في 80 جنيه بالتركيب تقريبا و كانت العربية زي الفل بس واجهت مشكلة
ان العربية كانت عالية من ورا اوي بطبعا كانت بتتنطط لما بتاخد المطب و دة في حالة لو مفيش حمولة ورا انما لو في حمولة طبيعي بتبقي العربية راسية علي الأرض كويس
روحت لمصطفي تاني بعد فترة و قولتله المشكلة راح موطي العربية شوية و اصبح المسافة بين الكاوتش و الرفرف تقريبا من 8 إلي 10 سنتيمتر و من بعدها بقت العربية كويسة و مابتتنططش في المطبات بس للعلم هو ماشلش سوتسة يعني العربية علي 3 سوست أو 3 ورقات
علي الرغم من كذا ميكانيكي قاللي المفروض 2 سوستة بس ... بس طالما العربية مرتاحة و انا مرتاح كدة خلاص

انا فيا طبع اني مابصدقش كلام الصنايعية إلا لما أشوف الصح و اللي مريحني و اعمله لأنها عربيتي انا مش عربية الصنايعي

موضوع المساعدين

زي ما قولت لحضرتك ان كان المساعدين الخلفي بايظين خالص و سالت عليهم جوداد لقيتهم ب 440 جنيه ده غير تركيبهم فطبعا قولت حرام ادفع المبلغ دة في مساعدين أخرهم سنة و لا سنتين و طبعا سمعت من ناس كتير عن موضوع ان المساعدين الجدية بتقعد سنة او سنة و نص و شكرا ... بمجرد ما تعدي فترة الضمان بتقرأ الفاتحة عليهم
روحت طالع علي بورسعيد قولت اتفسح و اشوف الدنيا و كان يوم صعب لأني روحت في رمضان إللي فات و لفيت لما تعبت عشان أجيب عفشة كاملة ورا جوز مساعدين بطنابيرهم و مقاصاتهم و طقم الفرامل
علي الرغم من إني مابفهمش خالص في المساعدين بس الحمد لله حسيت بوقفته جانبي في اليوم دة و جبت العفشة ب 350 جنيه و مكانش في جمرك و لا حاجة و جيت عالقاهرة و ركبتهم و تمام التمام و بصراحة كان فرق شاسع بين العفشة القديمة و العفشة اللي جبتها من حيث الأحساس بالمطبات و من حيث صوت التزييق و من حيث الفرامل إللي كانت ضايعة خالص بقت أحسن بكتير
مشوار بورسعيد وفر عليا اني كنت هروح لبتاع فرامل و ادفع حق تيل فرامل و دنيا و مصنعية و الله اعلم كان هيبقي كويس و لا لاء
نصيحة للإخوة الأعضاء بالنسبة لنزولي بورسعيد
شهر 12 2010 قبل الثورة بشهر كنت عملت حادثة جامدة في الباب الشمال بتاعي و انا بنزل من العربية و الباب اتدمر
المهم نزلت وكالة البلح سألت علي الباب لقيت واحد ابن ............ مش عايز اشتم بس بيقوللي الباب ب 1200 جنيه حتة حديدة فاضية مفهاش ازاز و لا مراية و لا اوكر و لا اي بتنجان
روحت عزبة شلبي و طبعا لقيت تناكة الدنيا قاعدين حاطين رجل علي رجل و الشيشة جنبهم ... بكام يا عم الباب قالي مفيش باب لوحده هما الأربع ببان علي بعض الطقم ب 22600 جنيه و سألت كذا واحد المهم لقيت أقلهم سعرا كان 2400 جنيه قولتلهم شكراااااااااااااا
نزلت علي حتة اسمها باسوس عند القناطر الخيرية و مالقيتش و نزلت بلبيس مالقتش و نزلت الزقازيق مالقيتش برده بس اتعرفت هناك علي واحد سمكري في الزقازيق
المهم نزلت أخيرا علي بورسعيد
إكتشفت ان الحاجات هناك من حيث النظافة أفضل بكتير من اللي شوفته في اي مكان روحته قبل كدة من حيث الفابريقة
لقيت الأربع ببان في بورسعيد ب 1600 جنيه و أقلهم سعرا كان 1400 جنيه و الببان كاملة بالمفلات و الأزاز و الأوكر و مكن الأزاز و المرايات و الفرش كمان قطيفة و الببان فابرقة مفهاش صدا و لا خربوش
المهم مكانش معايا المبلغ ده روحت راجع علي الزقازيق للسمكري إللي اتعرفت عليه و سمكر الباب و كتر ألف خيره انه رجع الباب لأصله بنسبة 85 %

إللي خلاني بقول الكلام دة اني لما جبت العفشة من بورسعيد لأن الحاجات هناك نظيفة و ان البياعين بتوع الأستيراد لما بيشتروا بضاعتهم بيروحوا بورسعيد يجيبوا الزبالة إللي موجودة عشان يعرفوا يكسبوا فيها براحتهم
فطبعا أي صنايعي هيقولك هجيبلك مش عارف ايه إستيراد طالما هيجيب من جوة القاهرة اعرف ان الحاجة إما مش هتكمل معاك شهرين علي بعض أو هتبقي متصلحة قبل كدة او فيها أي خازووووووووق
معلش انا بنصح الناس لو تقدر تنزل بورسعيد من شرط يكون معاك صنايعي فاهم الحاجة بتبقي باينة انها كويسة اما تشتري جديد من هنا
ابعدوا عن عزبة شلبي و الوكالة و اي مكان في القاهرة بتاع قطع استيراد

اسف جدا للإطالة في الكلام بس معلش من حرقة دمي علي الفلوس إللي بتترمي في الأرض

**adhamhossam** · 07-09-2011 07:58 AM

ربنا يوفقك و يوفقنا جميعا و يبعدنا عن الصنايعية النصابة و ما يحوجناش ليهم

مش شرط نزول بورسعيد ممكن لو الصنايعي قالك ان في مساعدين مثلا استيراد ممكن تطلبي منه انك تشوفيهم الأول مثلا بحجة انك خايفة من الحاجة المستعملة و اول مرة تشتري حاجة استيراد
و حالة المساعد بيبان عليه من الخارج عن طريق تجربته باليد من خلال دخوله و خروجة لو تقيل شوية يبقي كويس اما لو ناعم اوي و بيطلع زيت بسيط و لاحظتي خروج زيت خفيف يبقي بلاش منه اما لو تقيل جدا أو ناشف فدة برده يتخاف منه لأن ممكن يبقي قافش و مش شغال خالص و يعمل صوت تخبيط
و برده تقوللي للعفشجي يديكي ضمان كام يوم علي انه مايكونش بينشع زيت و تتابعي المساعد بعد يومين من تركيبه يا تري في آثار تنشيع زيت و لا لاء
بالتوفيق إن شاء الله
برده دي شوية فيديوهات عن المساعدين انا نفسي إتعلمت منها و مفيش صنايعي قاللي حاجة او عرفت منه معلومة صح

How To Check Your Shock Absorbers - YouTube

How It's Made- Shock Absorbers - YouTube

دة اهم فيديو عن تجربة حالة المساعدين
How to test shocks and struts - YouTube

الغريب ان الأجانب بتعلم منهم حاجات أكتر من الصنايعية المصريين منهم لله

و ادي فيديوهات كمان
Bad Shocks - YouTube

و دة عن مساعدين الهوا
Amortiguador de coche Recreacion - YouTube