الموضوع: ريحة بنزين في العادم - بوجيهات بتسود - تنتيش

السلام عليكم ورحمة الله

عندي 128 نوفا موديل 98 فيها الآتي :
- فيه ريحة بنزين في العادم.
- فيه صوت بسيط بس غريب بيظهر لما أدوس بنزين في التاني والتالت والرابع (بين صوت موتور الفولكس بيتلز وصوت التصقيف وصوت سوائل بتتحرك). علشان مسمعش الصوت ده لازم زيادة البنزين تبقى أقل ما يمكن، وبالتالي زيادة السرعة بتبقى بمعدل بطيء جداً. بردو بسمع الصوت ده لما بطلع كوبري وميختفيش إلا لما أقلل البنزين جامد فلازم السرعة تقل جداً (أقل من 40).
- بعد أسبوع من المشاوير (حوالي 150 كيلو)، العربية بتقطع وتنتش حتى على التاني. لما بروح للمكانيكي بلاقي كل البوجيهات مسودة، ويغير البوجيهات ويرجع العيب تاني بعد أسبوع.

كل ما أروح لمكانيكي يقوللي العيب في الكربراتير إنه بيرمي بنزين زيادة في الموتور، و بالفعل رحت لاتنين بتوع كربراتير، منهم مركز متخصص في عيوبه، وكل اللي عملوه إنهم نضفوه و قالوا إن مفيش فيه عيب. والمركز قاللي إن عندي مشكلة في التكيهات، ورحت لبتاع تكيهات وغير طبقين بس المشكلة بردو مختفتش.
رحت لمكانيكي قاللي إن فيه مشكلة في السيرفو لأنه لما بيسد فتحة خرطوم الصرف بإيده كانت بتختفي رعشة للموتور وكان فيه دخان أسود بيختفي. رحت لبتاع سيرفو وعمل له صيانة، ورعشة الموتور والدخان الأسود بطلوا والحمد لله. بس بردو ريحة البنزين والصوت الغريب و البوجيهات اللي بتسود لسه زي ما هما.

طبعاً كل زيارة لميكانيكي بيبقى فيها ظبط للكربراتير والكهربا. والاسبيراتير مافيهوش حاجة على حسب كلام الميكانيكية، وغيرت الابلاتين والكوندنسر قريب.

هل حد عنده معلومات عن عيب زي ده؟

جزاكم الله خيراً.

جزاك الله خيراً، ربنا يكون في عونك وتنتهي مشاكل عربيتك على خير. الحمد لله أنا فعلاً مستعد أغير الكربراتير عشان تنتهي المشكلة، بس هل ممكن بعد تغييره يفضل العيب موجود؟ ولا إحتمالية ضعيفة فأتوكل على الله و أغيره؟