الموضوع: اوكتافيا Vs فلونس

المشاركة الأصلية كتبت بواسطة bukla

اشكرك على ردك اللى اهم ما يميزه الحياد الشديد
و عايز اقولك انى مش مختلف معك نهائيا و حقولك مثال على كده ان من حوالى شهرين ليا صديق الشركه غيرت له العربيه سنه 2008 و اديتله نيسان صنى سوبر صالون و كانت عاجباه قوى النيسان لكن علشان هو طالع معاش و حيرجع العربيه النيسان فقرر يشترى عربيه زيرو لنفسه فكان عايز يشتري عربيه زيرو فى الحدود دى و كنت بنصحه بالفلوينس و اديته الفرصه اكثر من مره يسوق عربيتى علشان فيه ناس كثير كانوا بيخوفوه من الرينو عموما مع انه ركيب رينو قديم و جاب اكثر من موديل رينو لغايه سنه 2005 لما الشركه اديته العربيه فباع الرينو لعدم الاحتياج لعربيه ثانيه فى البيت
المهم انبسط جدا من الفلوينس لكن صديق ليه كان بينصحه بالاوكتافيا و لما سألنى عن رأيي قولتله على الفور لو ماعندكش مشكله فى دفع الفرق ما تترددش قالى ده كمان صديقه جايبله تخفيض على سعر اول فئه فى الاوكتافيا 5 الاف جنيه نصحته بشده انه يروح و يجيبها فورا و فعلا اشترى الاوكتافيا و مبسوط بيها قوى و لما سألته ايه احساسك بالفرق فى سواقه الاوكتافيا عن الفلوينس فوجئت بيقوللى الاثنين واحد قولتله يعنى ايه قاللى انه حاسس ان الروح واحده فى العربيتين و قالى تخيل ظريف انى لو غطيت العربيتين من جوه و من بره بحيث انه قبل ما يسوقهم مايعرفش مين فيهم الفلوينس او الاوكتافيا و ساقهم فعلا مش حيعرف يفرق
و بما انك زكرت قصه المساحات دى فى الفلوينس انا عايز اقولك ان كل عربيه ليها طابع خاص بيها و المصممين لكل شركه خصوصا الشركات الكبيرة بيبقى ليهم تفكير معينا او اتجاه و هما بيصمموا العربية يعنى انا لما سألت عن الفكرة من ان المساحه فى الفلوينس علشان تقدر ترفعها من على الزجاج لازم تنزل دراع المساحات فتترفع لفوق فتقدر تشيلها ان المصمم الفرنسى للعربيه فكر انه بوجود المساحات مستخبيه تحت الكابوت فيه فايدتين الاوله انه بيقلل الاحتكاك بالهواء اثناء سير العربيه و الثانى نوع من انواع الامان فى حاله الحوادث لاقدر الله فالقصه مش تعقيد قد ما هى عدم علم مننا
يعنى فى الاوكتافيا فيها برضه حاجه غريبه انك لما تبطل العربيه ماينفعش تطلع المفتاح من الكونتاكت غير لما الفتيس يبقى على ال p صديقى مدايقه قوى الموضوع ده لانه بيقولى طب لو حبيت اقف بصوره مؤقته صف ثانى و عايز اسيب العربيه على n علشان لو حد حب يزقها اعمل ايه اسيب فيها المفتاح علشان ارجع مالقيش العربيه خالص قولتله يمكن مصمم العربيه اكيد فى فكره ان كده امان للعربيه علشان ما تنزلش من العربيه و تسيبها ممكن تتحرك لو الطريق مايل و تعمل مشكله و طبعا فكره صف ثانى و زق العربيه دى مش وارده خالص فى اوروبا قالى طب لو عطلت ازقها ازاى قعدت اتصفح الكاتالوج لقيت فيه حل بس الغريب انه مش موجود فى عربيته
اسف على الاطاله
و بالتوفيق ان شاء الله

ايه هو الحل؟