الموضوع: اوكتافيا Vs فلونس

انا اسف بس فى حاجة فئة العربية الفلوانس اللى ب 142 لو قارنتها بفئة الفانتازيا البيزلاين هتلاقى فرق فى السعر 30 الف
اما الكماليات تقريبا واحدة مع وجود فروقات لصالح كل عربية زى الجنط 16 فى الفلوانس خارجيا داخليا الستائر
اما الفانتازيا فتتمير فى الحاجات اللى انا ذكرتها مع اضافة ان الفانتزيا فيها ASR+MBA+MSR
الفلوانس فيها ABS+EBD+BAS

استاذ بوكلا حضرتك لاغبار عليك ومعروف انك ملك الفلوانس بس انا لى تعقيب صغير طريق العين السخنة كل عربيات مصر بتجيب فيه سرعة لانه فية منازل كتير انا كان معايا نيسان سوبر صالون كنت بجيب فى الطريق ده 185 كم اما فى طريق العالمين وانا رايح الساحل العربية كانت بتيجى عند 165 وتبتدى تكحكح وكنت لازم اطفى التكيف عشان اجيب 180 كم

عشان كده انا قولت ان الفلوانس فى التسارع بعد 180 هتبقى السرعة وقتها لصالح الفانتزيا عشان بتجمع على النقلة الخامسة لحد 195 مستريح

فى النهاية انا لست مالك للفانتزيا ولا للفلوانس بس الحق يقال الفانتزيا افضل من الفلوانس فى بعض الحاجات والفلوانس افضل فى بعض الحاجات المهم صاحب القرار سعتها بيفضل يختار Package ايه لان مفيش عربية كاملة نهائيا

انا هقول حاجة بسيطة توضح ان الفلوانس عربية ليس تقليدية بالمرة انا واحد صديقى فى الشغل كان عايز يشترى عربية فى حدود 140 الف وهو متطلباته انه مابيجريش ومش هيبيع العربية الا بعد فترة طويلة المهم نصحتة يشترى فلوانس وقولتله بما يرضى الله على موضوع مؤشر البنزين و النتشة اللى فى الفتيس المهم انه اشترى العربية من شهر ومبسوط بيها لحد ماسالنى مرة ان البواب كل يوم يجى يرفع المساحة بتاعة العربية واحدة بتترفع بسهولة والتانية لا وبتحك فى الكبوت فقلتلة اكيد بتترفع عادى بس انت او البواب مش عارفين وفعلا حولت ارفعها معرفتش لحد ماراح التوكيل وقالوله انه لازم ينزل دراع المساحة وبعدين يطفى العربية فالمساحة هتترفع شوية من تحت الكيبوت وبعدين الصبح بعد البواب ماينظف الزجاج هيرجعها تانى باستخدام الدراع
وسعتها انا عرفت يعنى ايه رينو دى مش مجرد عربية بتتعمل لا دى معقدة لدرجة انها لو واحد مش فاهم كان كسر المساحة
حاجة تانية موضوع نتشة الفتيس ده طبيعى لان النيسان صنى كانت كده بين الاول والتانى فقط وكنت كل شوية اروح التوكيل اعمل ريست للفتيس انا شايف لو الفتيس DP2 نيسان اللى عاملاه يبقى دى طبيعى انه ينتش بين الاول والتانى ودى بتبان حسب ضغطة دواسة البنزين يعنى ممكن تبات مره ومره تانية لا
انا شخصيا لو الفلوانس فتيسها 6 سرعات انا لن اتردد فورا انى اشتريها وانصح بيها لاى حد

ركوبة الفلوانس سبب انها مشابهة لركوبة الفانتازيا هو تاسرع العربيتين تقريبيا واحد يعنى من 0-100
الفلوانس 13.9 مقابل 14.1 للفانتازيا والسرعة القصوى 180 مقايل 184 للفانتازيا

اللى يفرق شوية ان عزم الفانتازيا 148 نيوتن عند عدد لفات موتور اقل 3800 مقابل 145 عند 4200 للفلوانس فده اللى بيخلى الفانتازيا جوه البلد تقريبا زى الفلوانس لكن بره البلد انا اعتقد انها بتكون افضل لانها 6 سرعات وكمان العفشة مالتى لينك والعربية اتقل من الفلوانس

يعنى الفلوانس وزنها الاجمالى 1760 كم مقابل 1930 للفانتازيا

عمتا انا النهارده كنت فى سمير ريان وركبت الفلوانس والفانتازيا بصراحة فى حاجات فى الفانتازيا زى موضوع الشنطة انها بتتفتح مع الزجاج الخلفى دى اكثر من رائعة لانها بتدى مساحة تخزين عمق وارتفاع بعكس شنطة الفلوانس اللى بتفكرنى بشنطة الجيتا
المشكلة فى الفلوانس انها رينو مش فى العربية يعنى لو شلنا العلامة وحطينا علامة vw الناس كانت اشتريتها هوا ودى فى الحقيقة مشكلة مش هتتحل فى يوم وليلة يعنى اللى بيشترى رينو لازم يكون انسان مش بيحب يغير عربيات كتير كل سنتين ثلاثة لانه سعتها هيجى يبعها هيزعل بسبب ثقافة المصريين

يعنى الناس بتقول اشترى هيونداى ومش هتخاف وانت بتبعها وده عشان الثقة فى هيونداى مش فى العربية دى بالزات لانها طبعا لسة متجربتش
وفى ناس كانت بتثق فى تويوتا لحد من نزل الجنوب افريقى وشوف اعاده البيع للموديل ده بقت عملة ازاى لدرجة انى حاسس ان الناس بطلت تشترى تويوتا حتى بعد مابقت يابانى

بصراحة الوقت الحالى الناس بتشترى سيراتو - النترا - فانتازيا - جيتا وفى عربيات كتير محترمة تانية زى الفورد فوكس والرينو فلوانس ملهموش حظ فى مصر
بس الفلوانس انا كنت سمعت ان الهدف بتاعها تبيع 3000 عربية فى السنة فى مصر فى حين ان عربيات زى الهيونداى النترا والكيا سيراتو بتبيع تقريبا 15 الف عربية لكل شركة فيهم يعنى بيبيعوا حوالى 30 الف فى السنة وده رقم رهيب بالنسبة للشركات الاوربى بسبب الثقافة والفئة السعرية اللى العربيات دى موجوده فيها
فى الوقت الحالى الالنترا بس هى اللى بتتباع بعكس السيراتو اللى كانت بتتباع اكثر السنة اللى فاتت

يا نهار ابيض يا جماعه.. انا عملت exercise كده لقيت 10 votes لفانتازيا و واحد بس للفلونس... ده شيء مرعببببب.
عموما دي ال criteria اللي تهمني في العربية بالترتيب و هدي كل واحدة points تناسب اهميتها عندي:
1. Brand name or Make 6 point
2. سعر اعادة البيع 6 point
3. اسعار قطع الغيار 4 point
4. التوكيل 4 point
5. الشكل والكماليات 3 point
6. التسارع و الكلام الحلو بتاع الشباب ده اللي انا ماليش فيه 2 point

كده الفلونس تاخد عندي:

1. Brand name or Make 6/6 point
2. سعر اعادة البيع 6/2 point
3. اسعار قطع الغيار 4/2 point
4. التوكيل 4/4 point
5. الشكل والكماليات 3/3 point
6. التسارع و الكلام الحلو بتاع الشباب ده اللي انا ماليش فيه 2/1 point

total=18/25 points


و الفانتازيا:

1. Brand name or Make 6/6 point
2. سعر اعادة البيع 6/5 point
3. اسعار قطع الغيار 4/2 point
4. التوكيل 4/2 point
5. الشكل والكماليات 3/2 point
6. التسارع و الكلام الحلو بتاع الشباب ده اللي انا ماليش فيه 2/2 point

total=19/25 points


و هو ده اللي محيرني جدا...ان الفرق بينهم بسيييييييط قوي و متهيألي لو كانت الفلونس اقدم في السوق زي الاوكتافيا كانت حتبقى اكبر منافسه ليها بس لو تغلبت على مشكلة سعر اعادة البيع

انا كمان باقول فانتازيا
و مش حاكرر الكلام السابق و اعدد في مميزات الفانتازيا لكن احب ازود رأيي المتزاضع ان التقفيل التشيكي باشراف الماني اعتقد يتفوق علي التقفيل التركي باشراف فرنسي .