::: كيف اتخلص من الروائح الكريهة فى التلاجة ؟؟؟ :::

**BRAZILI** · 10-09-2011 03:33 AM

اخوتى الكرام

سافرت لمدة اسبوع ( اجازة العيد )
و فصلت كهربة الشقة كلها
و نسيت اسيب كهربة التلاجة شغال ( لأول مرة )
و لما رجعنا طبعا لقينا كل حاجة فى التلاجة فاسدة
عشان الحر الشديد فى الايام دى
ريحة الشقة اول ما فتحناها كانت فظيعة جدا
لدرجة انى كنت بشمها من اول مدخل البيت

نظفنا التلاجة كلها تمام التمام
لكن ريحة الفريزر فى التلاجة مش عايزة تروح
جربنا كل حاجة مكتوبة فى النت

خل + لمون + فحم ( عشان الريحة تروح لكن مافيش فايدة )
ده غير الغسيل كذا مرة

طبعا الريحة قلت شوية
لكن لسة موجودة بشكل يخنقك لما تفتح الفريزر

لو حد مر بالتجربة السيئة دى و عنده حل لموضوع الرائحة الكريهة ده
ياريت ما يبخلش علينا

و لكم كل التحية

أحمد برازيلى

**أحمد كمال** · 10-09-2011 03:38 AM

حط طبق فحم في كل رف و غيره كل ساعتين ...... عشان الفحم يشرب الريحة الوحشة و ترميه في الزبالة

**Ayman-Ahmed** · 10-09-2011 10:47 AM

الريحة فى الفريزر هتلاقيها دايما وحتى لو حطيت الفحم.لان لما الفريزر ساح المياه باللى فيها مشيت فى المواسير.

لما تفتح الفريزر هتلاقى اودامك مسطرة طويلة وفيها فتحات تهوية وديه بتاعة الصرف.هتشيلها خالص وديه بكلبسات بس براحة عشان متكسرش الكلبسات وبعدين تغلى مياه (براد كامل على النار) وتصبها فى مكان المسطرة ديه وطبعا كل ده والتلاجة مفصولة نهائيا وتسيبها على الاقل لمدة ساعتين وبعدين تشغلها وانصحك فى الفترة ديه.تجيب مياه فاترة فى طبق وتحط عليه خل(نص كوباية) وفوطة وتغسل التلاجة من فوق وتحت وطبعا الفريزر وتسيب الباب مفتوح وبعد ساعتين تشغلها من غير ما تحط حاجة فيها لحد ما تسقع.

**D . a .\ AYMAN** · 12-09-2011 01:25 AM

المشاركة الأصلية كتبت بواسطة ayman-ahmed

الريحة فى الفريزر هتلاقيها دايما وحتى لو حطيت الفحم.لان لما الفريزر ساح المياه باللى فيها مشيت فى المواسير.

لما تفتح الفريزر هتلاقى اودامك مسطرة طويلة وفيها فتحات تهوية وديه بتاعة الصرف.هتشيلها خالص وديه بكلبسات بس براحة عشان متكسرش الكلبسات وبعدين تغلى مياه (براد كامل على النار) وتصبها فى مكان المسطرة ديه وطبعا كل ده والتلاجة مفصولة نهائيا وتسيبها على الاقل لمدة ساعتين وبعدين تشغلها وانصحك فى الفترة ديه.تجيب مياه فاترة فى طبق وتحط عليه خل(نص كوباية) وفوطة وتغسل التلاجة من فوق وتحت وطبعا الفريزر وتسيب الباب مفتوح وبعد ساعتين تشغلها من غير ما تحط حاجة فيها لحد ما تسقع.

وحط أكتر من براد كمان لحد ماتحس إنك نظفت كويس

بس خد بالك إن المية اللى هاتحطها من الفريزر دي هاتنزل جوة كابينة الثلاجة نفسها وكمان هاتنزل من الخرطوم بتاع الصرف اللى بيكون ورا فوق الطبق اللى فوق الموتور فتكون عامل حسابك وحطط حاجة كبيرة تحتهم

وممكن كمان بعد كدة تغسلهم بشوية مية ورد (أحسن من الخل) هاتخلي ريحة الثلاجة كويسة جدا لفترة من الزمن