المشاركة الأصلية كتبت بواسطة abou_ruqi
الحكاية اني فكرت في الموضع ده من زمان وقلت طيب ما نصنع حاجة جديدة لسه الصين معملتهاش ونفيد البلد ونستفيد
وبعدين احنا لو مشينا بنفس خطوات غيرنا مش حنحصلهم ابدا علشان هما سبقونا بفظاعة
قلت الواحد يسقط على مكتب براءات الاختراعات يستنضفله فكرة ويجيب صاحبها يدفعله قرشين ويشتري منه البراءة بتاعته ويشغله مدير المصنع ويديله نسبة من الارباح كمان . يبقى زي الفل كده
التمويل بقه رحت لصندوق التنمية الاجتماعية لقيتهم ناس زي الفل ومستعدين يساعدوا من جنيه لخمسة مليون . عيبهم ان فوايدهم عالية قوي . قلت اشوف المشروع الاول يمكن محتاجلهمش
المهم دخلت الموقع بتاعهم لقيته موقع زي الفل وفيه sesrch
كل ما احط كلمة واعمل بحث يقولي لا يوجد . اي كلمة قعدت يومين ادخل اي كلمات . يقولي مفيش . الله؟ البلد محدش بقه بيخترع فيها والا ايه ؟ المهم
جبت تليفون مكتب اسكندرية وكلمتهم قالي احنا مكتب فرعي ومالناش دعوة بالموقع كلم الرئيس في القاهرة
سالته طيب في امكانية اجي المكتب ادور براحتي
قالي لا احنا مكتب فرعي بنسجل البراءات بس انما البحث روح الرئيس في القاهرة
رحت جايب نمرة القاهرة وكلكتهم . قولنله الموقع مش بيطلع حاجة ليه يا عم ؟ قالي علشان احنا مسحنا قاعدة البيانات. مسحتوها ليه الله يخرب بيوتكوا ؟ قالي علشان خلينا البحث بفلوس . زمن ابو بلاش عدا خلاص
طيب النظام الجديد ايه ؟ قالي حضرتك تشرفنا في المكتب الرئيس في القاهرة وتبحث براحتك بعد ما تدفع
طيب ادفع كام ؟ قالي البحث الواحد ب 300 جنيه . قولتله يعني لو حبحث على عشر كلمات ادفع 3000 جنيه ؟ قالي ايوة يا فندم
قولتله في العشة والا طارت ؟ وقفلت
بدور بقه من غيظي في الدول المحترمة لقيت البحث عادي والنتايج رهيبة بالذات امريكا على ما اذكر . وطلع في موقع عالمي يجيبلك النتايج من اي حتة في العالم
قلت انا اسافر بقه وابقى اعمل الموضوع ده في اي حتة بتشجع ولادها انهم يخترعوا وينتجوا
ادي يا سيدي اللي حصل