سلوكيات القيادة المصرية الزفت ... زهقت
إلى متى هانفضل نسوق زي البهايم و بدون أدنى نظام أو وجود أي قاعدة أو قانون للسير عليه
و الأدهى هي السواقة بالدراع و العافية و قلةالأدب و العيشة كلها بقت كدا و كانت كدا من قبل الثورة و زادت بعد الثورة.
دلوقتي الواحد بقى قرفان من الناس و مش طايق حد و مش طايق يحط رجله في العربية و لا يخرج أي مكان
أحنا ليه بنعمل في بعض كدا ؟ و ليه كمان بنتصرف كدا و نخلى عيشتنا زفت و ليه بنخلي الناس التانية تقول علينا كلام مش كويس
ليه وأنا سايق عربيتي أرمي زبالتي من العربية إلا إذا كنت زبالة و مش متربي أو بني آدمي متخلف همجي عديم التربية !
ليه و أنا سايق أكسر على غيري بسبب و بدون سبب ….. فين الأسئذان
ليه أمشيى بسرعة عالية قوي و الطريق مش مستحمل السرعة دي و أرهب الناس و السواقين التانيين .
ليه لما أحب أدخل يمين أمشي في أقصى الشمال و أقطع الطريق بالعرض و كمان أتخانق مع الناس لو حد أعترض
ليه لو حارتي قفلت أدوس بنزين علشانو أعمل غرزة أمام زميلي في الحارة المجاورة بدل ما أهدي و أحول الحارة بأمان و سلام
و ليه أعدي اللي قدامي علشان أطلع قدامه و أهدى و أمشي بنفس سرعته
و ليه لما أشوف طابور أول حاجة أعملها أروح أقف جنب أول واحد في الطابور
و ليه لما أشوف أثنين بيتكلموا أدخل في وسط الكلام و أقاطعهم بدون ما أستئذن أو أعتذر
و ليه لما تعدي واحد مثلا أو تقفله ما يقولكش شكرا
و ليه لما تقف علشان تعدي الناس … السواقين وراك يشتموك
و ليه تمسك شمال و أنت ماشي على 60
و ليه تحشر نفسك في أضيق الاماكن ما بين العربيات و أنت عارف أن الطريق واقف
و ليه يتعمل تسارع و أنت داخل على اشارة حمرا و انت عارف أنك هاتقف
و ليه تعمل غرزة علشان تقف اول واحد في صف الاشارة الحمراء و أنت كدا كدا واقف
و ليه تكسر الاشارة
و ليه تسرع بالعربية لو شوفت الاشارة بتعد من بعيد تنازلي 5 4 3 2 1 0 و تقلب أحمر و أنت عارف أنك مش هاتحصلها
و ليه و الاشارة واقفة تزمر للي ادامك علشان تضايقه أو علشان تزنقه علشان أنت مش عايز تقف في حارة
و ليه بنتجاهل خطوط و حدود الحارات
و ليه سواقين الميكروباظ بيقفوا جنب بعض و يسدوا الشارع
و ليه و انت خارج من الركن بتحدف شمال مع أن حارتك فاضية و كمان من غير ما تبص في المرايا
و ليه لما بتغلط تنزل تزعق و تشتم
و ليه لما بنغلط و تشاور للغلطان يقولك و أنا أعملك أيه
ليه و أنت داخل ملف و ملتزم بحارتك تلاقي الحمار اللي في الحارة الشمال داخل عليك في حارتك و بيزمرلك و يقل آدبه عليك علشان هو مش عايز يهدي في الملف
و ليه تمشي تتطوح في الشارع بالعربية زي السكران بدون مراعاة أدنى حدود الأدب و الألتزام بالقانون
ليه السلامة و الأمان هما آخر شئ بنفكر فيه
و أولويتنا في الفكير هي أني أعمل غرز و أجري زي الأهبل و خلاص
من الآخر أحنا ليه كدا و ليه زباله قوي كدا و ليه منعدمين الأدب و الأخلاق كدا
الناس تكسر عليك تشاورله يقولك أيه أنا عملت أيه ماالطريق واسع
أحنا شعب ملناش غير العصايا و الله العظيم تلاتة و ملناش غير الشدة في التعامل
أنا زهقت من البلد و من الناس و العيشة بقت تقرف :dontudear:
و الناس كلها عاملة عبيطة :dontudear: