استفسار بخصوص كاوتش الماروتي

**meemo** · 13-09-2011 10:12 PM

السلام عليكم
انا عندي كاوتش الماروتي الشمال الامامي في شقوق خفيفة علي جنب الكاوتش والعربية عاملة 15000 كم وانا بعمل الصيانة سالت علي الحكاية ديه قال الافضل اني اغير الكاوتش علشان لو ماشي علي سرعة عالية لازم اغير ولا اعمل ايه واذا غيرت اغير الفردتين ولا فردة واحدة ومقاس الكاوتش كام واجيبه منين في فيص او الهرم لو حد يعرف محل كويس يقولي
وشكرا

**Amr Axel** · 13-09-2011 11:01 PM

طالما ظهرت شقوق يبقي لازم تغيره و فورا بدل ما لا قدر الله تنفجر و حضرتك ماشي
بس واضح ان حضرتك مش بتتحرك اساسا بالعربية 15 الف في 3 سنين فغريبة ان يحصل كده و خاصة ان الكاوتش اساسا صلاحيته 5-6 سنين بدون استخدام يعني لو افترضنا ان الكاوتش انتاج 2008 يعني لسه قدامه بتاع سنتين و يودع

و بالنسبة التغيير حالة الكاوتش عند حضرتك عاملة ازاي ؟ يعني العيب ده في الكاوتشة ديه بس و لا الباقيين كذلك
لو العيب في الكاوتشة ديه بس و النقشة خلاص بتودع او اي عيوب تانية يبقي ممكن تغير الفردتين اللي قدام باتنين جداد و تستنضف اتنين من اللي راكبين و تنقلهم ورا
و بعدين لما تحس ان اللي ورا تعبوا تجيب فردتين تانيين و اللي قدام تنقلهم ورا و الجديد تحطه قدام

لو كلهم تعبانين و مش قادر تجيب 4 فرد يبقي جيب اتنين برده قدام و استنضف و انقل ورا و حاول تغير اللي روا في اسرع وقت

و ممكن القديم تبيعه مستعمل لبتاع الكاوتش
و ممكن لو حالتهم كويسة مفيش لحام و لا ملوحيين و لا شقوق يعني ميترموش و مش عايز تبيعهم ممكن تخلي الكويس فيهم عندك احتياطي كاستبن في البيت لو لا قدر الله حاجة حصلت في الجديد و اتزنقت و مش عارف تجيب يبقي البديل موجود تحطه لحد ما تجيب جديد

و ده موضوع اتمني انه يفيدك
http://www.nilemotors.net/Nile/232923-a.html

و بالتوفيق ان شاء الله

**dr.hazem** · 13-09-2011 11:32 PM

اخبارك ايه يادكتره
حمد لله عالسلامه

حضرتك متأ:د ان الكاوتش شقق في الفتره دي بس؟؟؟
اصل صلاحيته زي ماقال اكسيل 5 سنين او 50 ألف ايهما اقرب فمن المستحيل انهم يكونو شققو

عموما لو هيا فرده واحده نزل مكانها الاستبن وخلاص
انما لو كلهم فيفضل تغيرهم لو العربية بتمشي في الشوارع الطوالي وعلى سرعات تعدي ال70
لو مشي عادي جدا وفي الزحمة او مشاوير بسيطه معتقدش ان في عليهم ذاك الضغط اللي يخلي الموضوع يخوف
وتقريبا انا فاكر ان العربية فقط لتوصيل الاطفال للمدرسه
فالموضوع بسيط ان شاء الله

لو عايز هشوفلك ابن خالتي غيرهم عند مين في فيصل
اظن في شارع العشرين عند واحد قريب من اسواق العبد وباعله الاندونيسي الجي تي ب 180 الفرده

تحياتي

تحياتي