السلام عليكم ورحمة الله


الحمد لله ربنا انعم عليا بسيارة جديدة وهى الكارينز

العربية مجملة هى اعلى فئة وكيل الهاى لاين

العربية ماشاء الله .... غيرت وجهة نظرى تماما للكورى وعرفت ان الفئات المجمعة محليا دى منزوعة كل حاجة !

الشكل

العربيات اذواق ولكن كشكل فى اجماع انها عربية شيك وصاحبة أحلى أنتريور فى كل عربيات فئتها... وعن نفسى بحبها جدا من جوة بتحسسنى بتابلوها المرتفع انى راكب فان

فى ميزة جميلة ان الدركسيون مرتفع جدا عن الفخذ ودى كانت مشكلة تؤرقنى فى العربيات السيدان العادية ودة اللى خلانى اصرف نظر عن الالنترا والفوكاس ...الخ




الحجم


واسعة .... جدا

دة اقل وصف .... لأن انا مرجع الكرسى على اخرة و منزلة لتحت (الكرسى فى خاصية الحركة لتحت ولفوق) واللى قاعد ورايا بيحط رجل على رجل وناقص يحط شيشة وطقطوقة ويفتح قهوة ورا !!

أماكن التخزين كتيير جدا ... ذى الفئة دى الماتريكس وخلافة مع ان الماتريكس فيها اماكن اكتر ودة للعلم

يعنى الكونصول اللى فى النص فى اماكن للكوبايات والبيبان فيها اماكن للكوبايات وهكذا ... المخدع مستويين الشنطة فيها مخارج 12فولت وتعتبر ملعب كورة صغيير

يعنى بفكر فى المستقبل اجيب شلتتين عربى و احطهم ورا للى عايز يريح !




العربية نازلة من جوة ب3 اختيارات للالوان اسود بيج رمادى

بالنسبة للركن والحركة 2 يوم وحتتعود تماما عليها وبركن عادى فى اى ركنة كنت بركنها زماان بالفيرنا والحمد لله

حاجة مهمة

الفرق بين الركب الامامى و السائق كبير ... يعنى انتم الاتنين ساندين على نفس المخدع ومستحيل كوعك يلمس كوعة او يحدث تلامس اكتاف ذى العربيات التانية :))

فدة بيدى شعور رائع على طريق السفر انك قاعد فى كرسى فوتتيية محتويك تماما وفى فراغ ثم تلاقى واحد قاعد على يمينك وفية فراااغ وتلاقى ناس وراك :))

الكماليات

العادى فى كل العربيات مرايات ضم كهربا 4 ازاز ريموت سنتر ...الخ

حتكلم على حاجتين

العربية نازلة ب Warning Security System

وهو المفتاح المشفر الذكى اى العربية مستحيل تدور الا بية ... طبعا دة عندهم ...لأن عندنا الحرامية بيدوروا اى حاجة

المهم المكتوب ان ممكن الحرامى يطلع على المفتاح ويفتح العربية ويعيش جوة ... لكن الموتور لما يتنطط ميدورش !! طبعا مش عارف اية صحة الكلام دة ... بس ربنا يستر

الحاجة التانية

DVD ... الطارق بس بينزلها بأوفر برايس ويركب

DVD كاميرا خلفية gps aux ipod sd-card USB







Carens built in DVD - YouTube

طبعا بالريموت

ندخل على المفيد

الموتور

124 حصان 1600 سى سى 2 كامة

CVVT


  • Displacement
    1,591 cc
  • Max. Power
    124 ps /91.2 kW @ 6,300 rpm
  • Max. Torque
    15.9 kg.m / 156 Nm @ 4,200 rpm



هو ظاهريا نفس موتور السيراتو الجديد

لكن فى اختلاف ان اقصى عزم بيطلع عند ار بى ام اقل من السيراتو

الموتور متوافق على العربية للقيادة العائلية ... ولكن لو عايز ترجع لايام الشقاوة حتلاقى استجابة جميلة

بتسارع من 0 الى 100 فى خلال 13 او 12 ثانية تقريبا وسرعة قصوى 190 وفى ناس جابت أكتر

Kia Carens (rondo) 1.6L 124hp Acceleration A/T - YouTube

الموتور كافى جدا لعربية وزنها 1500كيلو

العزل

الله الله الللللللللله :)) من اكتر الحاجات اللى بحبها فى العربية دى

ماشاء الله .... هااااااااااااااااادية بطريقة عجيبة لا شارع ولا موتور ولا اى حاجة

طول ما انت دايس سامع صوت زنة الموتور الجميلة هادية اوى

لكن لما الفتيس ياخد غيارة ويستكين خلاص انت فى عالم تانى

مع التكييف وحتة mp3 slow ومج النسكافية ياعييينى :)) بجد تحية كبيرة للتقفيل الكورى ولكيا فى النقطة دى


العفشة

مريييييحة وعفشة عائلية ... مالتى لينك ورا بتخلى كل جزء مع نفسة يعنى لو اخدت مطب على العجلة اليمين .. العجلة الشمال ملهاش دعوة

بعدين لما العربية بتجرى جامد لاحظت ان العجل اللى ورا بيفرش ... بالأضافة للعرض الكبير

205 على 60 على 16 مع الوزن 1500 كيلو وابعادها فطبعا توقع ثبات ممتاز

الا انى لاحظت ان فى الملفات الحادة الجسم بيبدأ يميل بسيييييييط نظرا للارتفاع ونظرا لأن مفيش فيها شداد امامى Strut bar ودة اللى فى دماغى فى الخطة اللى جاية

العفشة جميلة اوى فى المطبات والنقر والبلاعات لأن انت بتسمع صوت لكن مش بتحس بالخبطة فى جسمك .... يعنى تبقى ماشى وتسمع بووم تقول يووووة يخرب بيت دى بلاعات !

دة قصدى ... ان احساسك بالطريق والحصى يكاد لا يذكر ودة حاجة جميييلة لعربية عائلية

غير ان العربية على الطريق ... الدركسيون أكيد أكيد اكيييييييييييد فى مانع ذبذبات او اهتزاز

ماشاء الله والحمد لله على السرعات العالية 160 170 الدركسيون مفيش فية هزة او رعشة او لعب

بالأضافة للوزن والحجم لما تعدى جمب عربيات تلاقيها بفعل الهوا بتبعد عنك ... عكس المعتاد انك انت لو عديت جمب حاجة ضخمة انت اللى تتزق

بأمانة انا كل شوية ابص على العلامة اللى على الدركسيون عشان اتأكد ان دى كيا كورى مش حاجة المانى

بجد تألقوا جدا فى منع وصول الذبذبات للدركسيون وعدم احساسك بالسرعة والطريق شئ ممتاز


الفرامل


ماشاء الله

4 ديسكات ب ABS بكاوتش Hankook وقطر الديسك ماشاء الله يخض !

العربية بتنزل برة بموتور 2400 سى سى 6 سلندر ... على نفس طقم الفرامل اللى عندنا على الموتور ال 1600 ... فتوقع اداء فرملى ممتاز لابعد الحدود

الحمد لله جربتة على نزلة كوبرى جرين بلازا والعربيات كلها وقفت مرة واحدة عشان داخلة جرين بلازا يمين وانا نازل وشفت المنظر كنت على 120 وكبست فرامل على الأخر ... وتحس بنبض ال ABS تحت رجلك وتيجى يمين فى شمال عشان تفادى وتقف بدون تعويم او تعريض او او او ... ماشاء الله والحمد لله

انا تعمدت مع كبسة الفرامل انى اجى يمين فى شمال ... انى ادى براح او فسحاية للجى ورايا انة يفرمل ... لأن لو كنت وقفت فى خط مستقيم كان 100% حلاقية قاعد ورايا فى الصالون


بجد انا بقيت بقلق جدا من العربيات اللى مفهاش ABS انها تلبس فيا وبحاول على قدر المستطاع اسيب مسافة بينى و بين اللى قدامى عشان مكبسش على الأخر

الاستهلاك

استهلاك عالى مش موفر للبنزين مع 170 او 180 كيلو فى الصفيحة بالتكييف فهى تعتبر ذات استهلاك عالى

واللى ممكن يرفع من استهلاكك اكتر ... ان كبسة رجلك على البنزين حتخلى الموتور يعمل كيك داون ويفتح .. وممكن تكون مش عاوز كيك داون انت عايز تخطى سريع بس

لكن مع الوقت حتتعود :)

ارقام التسارع من 0 الى 100 تقريبا 12ثانية

من 0 الى 160 تقريبا 35 ثانية او 34 ثانية

جودة التقفيل


الخامات الداخلية ممتازة ممتازة والتقفيل الكورى بتاع بلدة واضح ... لكن الكروم الخارجى حاسس انة ممكن يكون افضل من كدة شوية ... كان عايز من برة حاجة أشد من كدة شوية ... فرش الكراسى والكنب رائع و واخد نقشة و مخرم للتهوية ... التابلوة خامة طرية محترمة جدا ... باب التابلوة الوحيد اللى مش عاجبنى ناشف شوية ويديك احساس انة اتكروت !

العربية من جوة واسعة ومع الازاز الفيمية العربية مابتسخنش حتى لو فى الشمس

اداء التكييف فوق الممتاز بالذات لو جبتة على ال max وبحس انة فى توزيع الهوا احسن من الفيرنا و ساقع اكتر من الفيرنا ... مش عارف اذاى

بس اللى شفتة فى حوض الموتور ان الكباس (الكمبريسور) اكبر من بتاع الفيرنا فقلت يمكن عشان كدة اسقع

الأضاءة

عدسات بروجيكتور بمقاس لمبة H7 والعالى عادى مش عدسات ... الحمد لله اول ماجت ركبت زينون 4300k 55watt على العدسات وطبعا اضاءة العدسات معروفة بتفرش حلو اوى ولمدى بعييييييييد

أضاءة النور العالى معجبتنيش يمكن عشان اللمبة 55وات وانا كنت مركب 100وات راللى فيليبس قبل كدة ففى فرق أكيد

الفانوس الامامى ضخم وكذلك الخلفى فلما بادى انتظار بلاقى المكان حواليا مور جااامد اوى


كلمة نهائية


العربية دى لقطة ...سعرها ممتاز على كل اللى بتاخدة ... عربية عائلية رائعة مريحة فى الرحلات

مش بتاعت قلة قيمة وحرق ... عربية رزينة تقيلة ليها هيبة وسط العربيات التانية بالذات لما تعدى بين عربيتين ومرايتك تبقى اعلى من اللى جمبك وتمشى بهدوء ذى السفينة كدة !!

العربية خلاص اتوقف انتاجها من المصانع الكورية وحينزل حاجة جديدة

فلكل واحد لسة بيفكر فيها يلحق ... لأن مش حيكون في حاجة اسمها كارينز2013

والسلام ختام






















عشان خاطر حبيبى مصطفى ... أرجو من الأشراف نقل تلك الصور الى المشاركة الأساسية :

صور تبين المساحة بين الكراسى الأمامية والكنبة :) لاحظ ان انا مرجع الكراسى على اخرها :))

ولاحظوا فرق الدركسيون عن رجلى :)











الخربشة دى بتاغت كلبش الدركسيون ... اول مرة اشوفها لما صورت !





تم تثبيت الموضوع لتعميم الفائدة
مشرف 3ب
20/9/2011