المشاركة الأصلية كتبت بواسطة ahmed.tv
التيدا ....
:: نتكلم على التوكيل
محترم بشهادة كل الناس .. وبيهتم بمشاكل العميل جدا فى كل مراكز الخدمة المعتمدة ليه
وبقا دلوقتى في مودرن بكل فروعه وفى السبع بفروعه وفى الاتحاد الوطنى وفى يونايتد وفى كمان اتو ايجيبت
وكل المراكز دى مغطية مصر .. وفى كمان فى الاقصر .. وان كان نفسنا يكون فى حاجة فى اسيوط
:: نتكلم على قطع الغيار
قطع غيار التيدا فى التوكيل متوافرة فى كل مراكز الخدمة .. واسعارها معقولة مقارنة باسعار الكورى حتى فى التوكيل
ده غير ان فى نقطة مهمة جدا .. اى حاجة مش متوفرة فى التوكيل بيبعتوا يجبوها من بره ومش بيتاخروا على عميل .. حتى لو انتهى فترة الضمان بتعته
وكمان متوافر للتيدا قطع غيار خارج التوكيل وباسعار ممتازة جدا .. وطبعا فى موضوع فى القسم عندنا تقدروا تحكموا على الاسعار .. وقطع الغيار متوفرة فى شارع دمشق وفى التوفيقية .. وفى الحرفين كتير جدا سواء استيراد او جديد
:: نتكلم فى العربية
كل عربية وليه ميزة وعيب .. بصراحة ومميزات التيدا وبدون تعصب والله .. عربية واسعة من جوة سواء السيدان منها سقف صالون واسع ومريح .. ومن تحت العربية عالية من المطبات .. والهاتش باك منها تعتبر اوسع عربية هاتش باك .. لان الكنبة بتتحرك لقدام ولورا وبتعطى وسع ..
غير ان التيدا ماتورها قوى جدا واستجابته رائعة وقوى جدا .. وماتور حديث .. وموفر فى استهلاك البنزين .. والباور بتاعه روعة روعة باور كهرباء .. والباور بتعها بيتقل وبيفصل بعد ال120 بالظبط
وكمان العربية فيها عوامل امان محترمة .. وبتبان وقت الحوادث الكبيرة .. فى الدعامات الفلاز اللى حطينها فى العربية من قدام يا جماعة
واحد زميلنا عمل حادثة بيها على سرعة 100 ودخل فى خرسانة .. والكبينة سليمة والجزء الامامى سليم بس الشاسية وبعد قطع الغيار عاوزة تتغير
مشاكل التيدا قليلة جدا فى التوكيل وبره التوكيل
هو العيب بس الثبات بعد ال150 بيقل .ز لكن العربية ماتورها قوى وبيكمل معاك .. وده لو انت من هواة السرعة عليك بجنوط 16 ..
بصراحة العربية محترمة جدا واختيار رائع ومريح لاى مالك بيقتنى العربية
وانا باذن الله بحضر كتاب على التيدا حنزلهولكم .. مالوش حل .. انتظروه فى اقرب وقت باذن الله لما افنشه
فى كل حاجة عن التيدا من الالف الى الياء
سمحونى مش حتكلم على عربية اخرى غير التيدا .. لان بحب لما اتكلم اكون بتكلم عن تجربة وليس الكلام وخلاص .. عشان كلامى ده حتحاسب عليه فى يوم من الايام قدام ربنا .. فلازم معلومتى تكون سليمة
تحياتى
وبالتوفيق فى اختيارك .. واهلا بيك معانا يا هندسة .. ومشرفنا فى قسم نيسان
ومستنين تقريرك عن التيدا وكمان ياريت نشوفك باذن الله فى مقابلة من مقابلاتنا
واسف على الاطالة