امبارح زوجي خرج زيارة لمدينة الصف بعد ما سمعنا من اطراف كتير انها من ضمن مدن او مناطق كتير فيها عصابات لسرقة السيارات
المواصلات ممكن تركب ميكروباص من المنيب حوالي ساعة وتقوله ينزلك عند عرب الصف
لما نزل الصف هناك في عربيات ربع نقل سألهم انه عايز حد يلف بيه في المناطق اللي فيها العربيات المسروقة
عرف انها حوالي 6 مناطق
في سواقين رفضوا وواحد رضي يلف معاه وزاروا منطقتين بس بيقول العربيات المسروقة هناك واقفة في الشوارع عادي والسواق عارف ظروف سرقة كل عربية
من ضمنها شاور له على عربية فخمة صاحبها نازل بيها من السعودية جمارك ومأمن عليها هناك
باعها لهم وبلغ عنها انها مسروقة
وقاله ان الصف مليانة مخازن للعربيات المسروقة مش على اد المركون في الشوارع بس
ودي بتاع المعلمين الكبار وعليها حراسة مسلحة ومرضيش يوديه ناحيتها اصلا
المعلم بيشتري العربية من الحرامي بسعر ابتداء من 2000 جنيه وطالع على حسب العربية
سأله هل بيتم تفكيكها قاله لا لان المسروق في الفترة دي كتير جدا فوق ما يتخيل ومفيش داعي لتفكيكه لانه كدة هايغرق السوق بقطع غيار ملهاش لازمة
بيقول ان المعلمين الكبار غالبا بيبقوا مستنيين اصحابها يجوا ياخدوها بفدية
وفي اثناء التجول زوجي شاف عربية مفككة ومطلعين قلبها فقاله مهو بيفككوا اهو
قاله دي عربية مسروقة من قسم كانت في قضية مخدرات يعني ملهاش صاحب يدور عليها فحلال يفككوها
المهم مرضيش يروح معاه غير منطقتين واضح انها منطقته وخاف على نفسه من باق المناطق
زوجي سابه وراح قعد على قهوة وسأل جرسون القهوة اذا كان يقدر يساعده
دله على رجل قاعد على القهوة ودار بينهم حديث في مضمونه نفس كلام السواق تقريبا
الرجل اكد لزوجي انه مالوش دعوة بالسرقة تماما وانه شغال شغلانة شريفة ...
واتصل بشوية ناس حرامية في المنطقة يسألهم مكنتش عندهم ومن الطريف انه اتعرض عليه يشتري واحدة غيرها بتراب الفلوس طبعا ومن ضمن الحرامية اللي اتصل بيهم ومردش طلع واحد مقبوض عليه (عقابلهم كلهم يارب)
المهم كان الوقت اتأخر والمغرب على اذان وكان لسه في حرامية هايتطقسوا ويشمشموا عند بعض وهايردوا بعد العشاء او جايز عندهم وبيدوا لنفسهم وقت يتفقوا على نسبتهم ونسبة الرجل المتصل الله اعلم بيهم
فزوجي رجع على اساس الرجل يجيب له الاخبار ويتصل به
زوجي عرض عليه فلوس مرضيش ياخد طبعا منتظر الحلاوة الكبيرة
وادينا منتظرين اي جديد في الموضوع
المهم انا بكتب الموضوع ده عشان كل المسروق منه عربية ميقعدش مستني الشرطة ترجعهاله يحاول يلف ويتطقس في المناطق المعروفة في مدينته
زي بحري عندهم كوم السمن مثلا وقبلي في في بن سويف
احنا مشكلتنا اننا في النص بين قبلي وبحري
ده غير ان القاهرة الكبرى فيها مناطق كتير لسرقة العربيات زي قليوب والصف واوسيم وماخفي كان اعظم