مساء الخير عليكوا

**topgun12** · 23-09-2011 11:34 AM

الواحد لما بيبص على صفحات المنتدى ويتفرج على مشاركات الاعضاء المحترمين زى اللانوس والمتسوبيشى والكرولا والمعنى فى بطن الشاعر بيفرح واللة ان فية ناس عندها معلومات قيمة ممكن تفيد بها الناس لكن عندكوا فى ال byd ياحسرة كلها دعوات اعياد ميلاد وطهور واحد يقولك الزيت جابوا من شركة معرفش فين وواحد يقولك نتكلم عن g3 احنا مالنا ياعم احنا جيبنا خلاص f3والحمد للة نتكلم ونفيد بعض فى مشاكلها بلاش مشاكل يعنى مثلا الراجل اللى ريقة نشف معاكوا وعمال يسال عن الكبالن محدش عبرة وفادة بتعريفة وقالوا كبالن التويوتا تنفع ولا لامفيش الا عماد حبيب قالة موجودة فى شارع دمشق وفى التوكيل عندنا الراجل مش بيسال هى فين بيسال حد ركبها تويوتا قبل كدة ولا لا وواحد معندوش العربية خالص وداخل بحرقة يتكلم عن bydويحسسك انة حيشترى بكرة يعنى ينفع انى ادخل منتدى المرسيدس او اى منتدى وارغى وارغى وانا لا حشترى ولاحيكون عندى واحدة لا حول ولا قوة الا باللة وواحد تانى يقولك انا روحت التوكيل وضيقوا فتحة البوجية كلام طبعا يعل الواحد حد فى الدنيا يروح يشترى بوجية ويدق على راس البوجية علشان يضيق الفتحة ويقلل استهلاك البنزين كلام لا يعقل مش احنا اللى حنعدل على الخواجة البوجية ياناس بيجى بظبطة المصنع ولكن للمعلومة فية رقم على البوجية مكتوب علية لكل نوع سيارة مش لازم البوجية يكون نفس السن يركب فى الفتحة يبقى مناسب لسيارتك طب الbmw مقاس البوجية 16 زىbydبس حيفرق فى استهلاك البنزين وابقوا اسالوا لتتاكدوا من بتوع الاكسسوارات اللى بيبيعوا بوجيهات فقط مثل ngkوهما ياكدوا المعلومة لانى اشتريت منهم وهما فى السيدة زينب والراجل بص على رقم البوجية القديم وليس انى ادق على راس البوجية دة كلام فارغ البوجية بيركب زى ماهو بيجى وعلى فكرة كمان لو الاستهلاك زى ماهو يبقى عيب حساس الاكسجين لانة هو المسئول عن خلط الهواء والبنزين وكنت حشترية استيراد بتاع متسوبيشى لان الميكانيكى قالى الاستيراد افضل من الجديد لانة يبانى مش تقولولى الهجس بتاع التوكيل يدقلك على اطراف البوجية طبعا عمرة ما حيديلك حساس تمنة 320 جنية وسلمولى على التوكيل وبردة اسالوا مهندس ميكانيكا لو مش مصدقينى وبعدين التوكيل بيريح الزبون اللى مالهوش فى العربيات وايدة مش فى عربيتة ميقدرش يعمل كدة معايا علشان حفقسة وحيعرف انى فاهم انة مش عاوز يغير الحساس

**magdykorashy** · 23-09-2011 12:07 PM

*عندك حق في حكاية عدم الرد على سؤال كبالن التويوتا تنفع في F3 و لا لأ
عن نفسي فهمت انها متنفعش , بس مش عارف ليه استiذ عماد حبيب ماقالش كده صراحة؟
*موضوع الزيت الألماني ده عجبني و أحب أشكر الدكتور المناهري عليه.
*أنا متحمس للG3 و عاوز أجيبها على رغم كونها مقامرة في حال فشلها في السوق المصري، بس من ناحية تانية لما تنتشر أكيد سعرها حيزيد أبقى فزت بشرائها.
*السيد الفاضل/ مش حاسس أنك متحامل شوية على BYD؟

**topgun12** · 23-09-2011 12:54 PM

والله انا مش متحامل ومجيبتش سيرتها فى حاجة راجع كلامى من فضلك تانى حتحامل ازاى وانا عندى العربية

**kokyjoon** · 23-09-2011 04:35 PM

هية ال g3 فيها محرك إيه نوعه ماحدش قال حاجة عته

**kokyjoon** · 23-09-2011 04:37 PM

بس انا عارف وتأكد إن التوكيل كان فيه حساسات بنزين يابانى أصلى بس الكلام ده أيام الدراسة
لاكن ماعرفش دلوقت إيه الحال

**ehabpopo** · 23-09-2011 09:34 PM

استاذ/ topgun12 انا شايف انك متحامل على القسم شوية ... عارف لية .... لان كل ملاك العربية ماحدش غير الكبالن خالص ... لذلك ما فيش رد غير اللى احنا سامعينة فقط ... هو ان العفشة وكل مايخصها ممكن يتبدل بعافشة التويوتا .... حتى رد أ / عماد حبيب مش واضح تماما وده اللى انا فاهمة ايضا
ولو راجعت مشاركات كتيرة جدا ... ها تلاقى ملاك العربية مش بيبخلو على حد فى اى معلومة طالما يعرفها او تعرض لها .... وطبعا ملاحظ الكلام ده من المعلوم اللى مازالت تحت التجربة مثل معلومة الزيت ( موضوع دكتور المناهرى ) ....
وحضرتك قلت معلومات قيمة جدا خاصة بالبوجيها .. وحساس الاكسجين .... طيب ماكنت تعمل موضوع عنهم وتناقش الناس فيهم يمكن حد يفيدك ... او انت تفيد حد ......
ويا سيدى الفاضل ماتبقاش تحضر الطهور واعياد الميلاد بتاعة القسم ... ومافيش داعى تزعل حد منك
وتقبل تحياتة

**topgun12** · 23-09-2011 11:39 PM

تحياتى لادبك واللة يا استاذ ايهاب

**topgun12** · 23-09-2011 11:45 PM

المشكلة يا اخ ايهاب ان الموجودين فى المنتدى مبيحبوش يسمعوا غير كلام التوكيل زى ما يكون قران لا يمكن تغييرة ميعرفوش ان بيضحك عليهم زى واحد يقولك المساعدين عندة محجرة وراح التوكيل اقنعوة انهم لازم يبقوا كدة علشان زيت وغاز يا حلاوة اول مرة اسمع عن مساعدين زيت وغاز محجريين ممكن يبقوا ناشفين شوية مش محجرين وراح القطامية حطولوا wd40 بتاع التزيت علشان يلين ويمنع التزييق بدل ما يغيروهم فانا واللة مش متحامل على القسم ولا حاجة بس الحكاوى هى اللى تضايق والتوكيل يضايق اكثر تصدق وتامن باللة ياشيخ انى لما بعمل حاجة للعربية بعملها برة قسما برب الكعبة بسبب الصنايعية الكفتجية اللى فى التوكيل واقسم بربى انهم لو عرضوا عليا الاصلاح مجانا وانا اجيب كمان قطعة الغيار من برة مش حصلح عندهم

**rti** · 24-09-2011 02:26 AM

المشاركة الأصلية كتبت بواسطة topgun12

المشكلة يا اخ ايهاب ان الموجودين فى المنتدى مبيحبوش يسمعوا غير كلام التوكيل زى ما يكون قران لا يمكن تغييرة ميعرفوش ان بيضحك عليهم زى واحد يقولك المساعدين عندة محجرة وراح التوكيل اقنعوة انهم لازم يبقوا كدة علشان زيت وغاز يا حلاوة اول مرة اسمع عن مساعدين زيت وغاز محجريين ممكن يبقوا ناشفين شوية مش محجرين وراح القطامية حطولوا wd40 بتاع التزيت علشان يلين ويمنع التزييق بدل ما يغيروهم فانا والله مش متحامل على القسم ولا حاجة بس الحكاوى هى اللى تضايق والتوكيل يضايق اكثر تصدق وتامن بالله ياشيخ انى لما بعمل حاجة للعربية بعملها برة قسما برب الكعبة بسبب الصنايعية الكفتجية اللى فى التوكيل واقسم بربى انهم لو عرضوا عليا الاصلاح مجانا وانا اجيب كمان قطعة الغيار من برة مش حصلح عندهم

سيدي الفاضل انت بتقول انك عندك السيارة ال byd وكمان بتعمل شغل العربية برة التوكيل طب ماتفدنا بخبرتك فى الموضوع ده وبعدين فى احد الاعضاء كان عايز يعرف اماكن برة التوكيل ياريت تفدنا بدل التحامل على التوكيل و الاعضاء وتقول الاقسام التانية بتتكلم فى مشاكل وحلول تفرح طيب الحمدلله لحد دلوقتي زي ما انت شايف المشاكل مش كبيرة بالدرجة طيب نعمل اية ربنا عايز كده معظمنا مغيرش كبالن ولا عنده مشكله عويصة فى العربية نعمل اية ناس ربنا كريمها بعربية كويسة فمبسوطين اننا نعرف بعض وبعدين فين يا عم اعياد الميلاد والطهور اللى بتقول عليهم دول انا محدش عزمني على حاجة عموما عايز اقول لسيادتك حاجة الاعضاء هنا كلهم ناس محترمين زي اعضاء اللانوس و المتسوبيشي والتويوتا . وفى النهاية تحياتي ومستنين نستفاد من تجاربك مع العربية .

**kokyjoon** · 24-09-2011 08:23 PM

أنا ليا زمايلى من أول ملاك السيارة من 2007 ومحدش منهم غير كبالن وفيهم واحد مارحش التوكيل من يوم
ما إشترى العربية وماشية معاه زى الفل اللى أعرفه إنه غير مساعدين أمامى تويوتا كرولا