الموضوع: مسلسل البيرسونا في التوكيل

سلام عليكم
أنا كنت عايز أحكي حكاية حصلتلي في توكيل عز العرب الصحراوي و كنت عايز أعرف رأيكوا إيه
بصراحة الحكاية طويلة شوية و كمان لسة منتهيتش فقررت أحكي الحصل على ثلاث حلقات و مش عارف هيبقى فيه حلقات تانية ولا إيه :d


الحلقة الأولى :

أنا معايا بيرسونا مانيوال 2010 ماشية 17000
العربية ما شاء الله كويسة أوي في السحب و الثبات عشان مطولش عليكوا هبدأ في الحكاية
أنا عملت حادثة في شهر 7 إلي فات الحمدلله قدر الله و ما شاء فعل العربية كان متأمن عليها
المهم خدت العربية وديتها التوكيل و هناك عملو مقايسة المهم العربية كان محتاج يتغيرلها اكسدام و كبوت و فوانيس أمامية و الشابورة و الشبكة و الرفارف هايتعملوهم سمكرة و ييترشوا
و الصدر و مراوح التبريد ومروحة التكيف و رادياتير و قواعد الموتور الطولية دالحجات إلي كانت مفروض تتركب
المهم سلمتها و المهندس قال هتاخد شهر بالكتير المهم سبت العربية و مشيت و فات شهر و كلمتهم المهندس رد قال إن معندوش رادياتيير ولا مروحة التكيف و هاتجييلو بعد إسبوع
المهم العربية أعدة شهر تاني لغاية لما جابو الحاجات الناقصة و ركبوها بصراحة مشعارف إزاي العربية تفضل وقفة شهر كامل عشان مفيش رادياتيير في التوكيل عموما قلت الحمدلله و رحت أستلم العربية
العربية تكلفت 23 ألف أنا دفعت 6 و نص و التأمين دفع الباقي


الحلقة الثانية :
استلمت العربية الحمدلله و كنت مروح أنا ساكن في مدينة الشروق المهم طلعت المحور و مشيت فيه 2 كيلو تقريبا و دخلت في الزحمة و لقيت العربية فصلت
قلت جايز أكون جبت التالت بدل الأول منا بقالي شهرين مسؤتيش العربية المهم دورت تاني و لقتها فصلت برضو و في الاخر مش بتدور خالص
المهم خدتها على ونش و طلعت على التوكيل كانو كل المهندسين مشيوا سلمتها هناك للأمن ومشيت كلمت المهندس قال ده حساس الكرنك و هغيرهولك
وبكرة تعالى خد العربية مش عارف إزاي عربية عمله حادثة محدش يجربها قبل مايسلمووها ل صاحبها ؟؟


الحلقة الثالثة :
رحت تاني يوم عشان أستلم العربية المهندس قال إنها خلصت و جربها و كله تمام خدت العربية و مشيت بيها وأنا قلقان أكيد
المهم الحمدلله وصلت لغاية الشروق و محصلش أي مفجأة و ابتديت أطمن بعد كل إلي حصل
خدتها تاني يوم و سمعت صوت سفارة لما باجي أدوس بنزين و الفرامل كنت حاسس إنها ضعيفة شوية أنا قلت شكلها حاجة بسيطة فقلت أعدي على مركز عصام صفا أنا نسيت أقول إن ده المركز إلي كنت علطول بتعامل معاه
و فعلا هما ناس محترمين جدا المهم رحتلهم رفعوا العربية لقوها مليانة زيت من تحت غسلوا العربية من تحت و قالولي تعالى بكرة عشان نشوف في زيت برضو ولا إيه
رحت تاني يوم و لقينا فيها زيت ابتدو يستكشفو عن المكان إلي جاي منو الزيت و هما بييستكشفو تفاجئنا إن سير الكاتينة مش فاضل غير حاجة بسيطة أوي و يتقطع هو فعلا كان مقطوع و فاضل جزء بسيط أوي هو إلي ماسكه
و في الاخر الزيت كان جي من وش التقسيمة و كمان تامبورت البور كانت ملوحة و مفروض تتغير أنا عايز أعرف إيه رأيكو بقى دي عربية لسة خارجة من التوكيل و مدفوع فيها 23 ألف ؟؟
و زي نهاية كل حلقة خدت العربية و وديتها التوكيل و عرفت إنهم معندهمش سير الكاتينة و أديني مستني

و أنا قررت أبيع العربية لما استلمها مش عارف إيه رأيكو مش عشان الحادثة إنشاء الله العربية هترجع زي الأول بس أنا قررت أبيعها بسبب التوكيل
أنا أسف إني طولت عليكوا و يارب مايكونش فيه حلقات تانية و الموضوع يخلص عشان أنا بجد زهقت
سلام عليكم