الموضوع: توكيل نيسان - يونايتيد جروب - بالدراسة ؟؟؟؟؟؟؟

توكيلات نيسان كلها محترمة جدا مفيش الكلام اللى حضرتك بتقول عليه ده
انت رايح تتعامل مع توكيل ليه سمعة كبيرة جدااا .. غير ان مراكز الخدمة المعتمدة لنيسان بتنافس بعضها لمصلحة عملاء نيسان .. ونيسان لما بيجيلها شكوى من اى عميل تجاه اى شكوى من اى مركز عمله مشكلة
بتقوم بالواجب .. والمراكز اللى ممكن تكون وقعت فى غلط لسمح لله بتراضى العميل كويس والكلام ده عن تجارب

وقبل كدا مركز خدمة ابو غالى اللى كان تابع لنيسان .. من كتر ما جه من شكاوى نيسان سبحت منه التوكيل فورا

فاطمن من النقطة دى كويس

ومركز يونايتد لو قريب ليك روح وتوكل على الله .. وهو معتمد لنيسان

واحنا فى القسم مش عندنا تقارير عن المركز كتير .. لان الاغلب بيروح السبع ومودرن .. ولكن يوناتيد مركز معتمد وانا روحت اتقابلت مع المسئولين اللى هناك .. وشوفته .. ولقيته مركز محترم

ولما تروح هناك اسال على المهندس احمد صبرى فى خدمة العملاء وقابله

ولما تكون هناك خاليه يكلمنى على الموبيل بتاعى وانا حخليه يقوم بالازم معاك باذن الله

وبالتوفيق ان شاء الله

تحياتى

انا ما اخدتش بالى ان عربيتك 2003

صحيح طالما حتغير حاجات فى العفشة .. الافضل اشترى الاصلى من التوكيل ومنفذ البيع المعتمد واعمل العربية عند اى ميكانيكى شاطر

وبعد ما تعمل عفشتك بره عند اى حد شاطر
احجز فى التوكيل وروح اعملها كشف على الكمبيوتر فقط .. عشان العربية تتظبط على الجهاز ويتعملها ريست من كل شى

بس كدا ووفر مصنعية تركيب العفشة فى التوكيل .. لانها اكيد غالية

المشاركة الأصلية كتبت بواسطة m6r1282

السلام عليكم ورحمة الله وبركاته

أولا: الشكر موصول ومتكرر للمهندس أحمد (المنسق العام لنيسان) والأعضاء المبجلين الذين يستمرون في العطاء ولا يحجبون علما أعطاهم الله إياه وأسأل الله لهم الإخلاص.
ثانيا: نقاط مهمة :
- أنا والله لا أشكك في نيسان ولا توكيلات نيسان وبجد دي أحسن عربية ياباني في مصر (وجهة نظري)
- أنا لي معرفه في التوكيل ده (يونايتيد جروب الدراسة) جايبلي خصم 30% على الإجمالي النهائي للفاتورة
- موضوع إني أغير الحاجات بره، أنا من المنوفية وما أعرفش حد كويس وحتى لو أعرف حد كويس، ما أظنش إن حد يكون ليه خصم 30% ويتركه

ثالثا: أنا هاغير الآتي وماحدش يستغرب :
.... وده كان رأي التوكيل السابق ذكره لما كشفت عندهم ....:_alshmokh08[1]:
- تيل فرامل أمامي وخلفي (لازم وفي أسرع وقت)
- طنابير أمامي وخلفي
- مساعدين أمامي
- كاوتشات تراب أمامي وخلفي
- مقصات أمامي (مصنع وليس جديد ولكن أصلي من التوكيل)

* بالنسبة للطنابير الأمامي ماسحين والخلفي فيهم روح
نصحوني أغيرهم عشان مايتلفش التيل الجديد _ ما رأيكــــــــــــــــــم ؟؟

* بالنسبة لكاوتشات التراب هالكه وطبعا دي بتخلي التراب يبوظ المساعدين

* بالنسبة للمقصات أنا المشكلة عندي في جلبة المقص فقط وقالولي إنه بيتغير على بعضه في 2003، ماصدقتش فنزلت التوفيقية وشارع زكي وشارع معروف ولفيت لحد ماتلفيت :n_no[1]: وما وجدت شيء، فقالي الرجل في التوكيل، هاجيبلك مقصات من المصنع بتاعت العربيات اللي فيها عيب صناعة بتكون ماشتغلتش حاجة وهاتكون أقل من سعر التايواني الجديد خارج التوكيل (190 جنيه للمقص في التوفيقية "الشيخ طارق")

السؤال الآن: هو هل يستطيع أحد إنه يحصل على خصم 30 % في توكيل نيسان ولا دي عروض بتيجي التوكيلات ولا إيه بالضبط ؟؟

وهل توافقوني بعد العرض المفصل للموضوع ده إنه أعمل كده ولا إيه

طبعا أنا طولت عليكم ولكن كنت لازم أسرد الموضوع كده

أترككم في رعاية الله وأنا إن شاء الله لو وفرت المال هابدأ بكره أو بعد بكره لأن عرض 30% ده للأسبوع الحالي فقطـــ

فأرجو منكم التفاعل السريع كعادتكم ولكم الجزاء الحسن من الله

احنا عاوزين نعرف العربية عاملة الف كيلو .. ده مبدئيا

تانى حاجة طالما حتكون عارف حد معرفة هناك .. يعنى معرفة معرفة .. يبقا اكيد حيهتموا بالعربية اكثر من الازم .. وده مصلحة ليك

الحاجة المهمة .. ان العربية بعد عمل الصيانة حتدخل على جهاز الكونسلت 3 وحتتظبط عليه عشان اداء العربية يكون كويس .. وكل الحساسات اللى فيها تتظبط

موضوع العفشة

طالما قالولك على الحاجات المهم .. فاكيد حتغيرها ولازم تغيرها

بس موضوع المقصات لو سليمة ممكن تجيب جلب مقصات لوحدها من شارع دمشق عند محلات العالمية او محمد جابر وكلها محلات معروفة شغلها فى نيسان عموما الموديلات القديمة والجديدة

ولو عايز حاجة استيراد فى اى قطعة غيار لنيسان حتلاقيها فى العالمية .. وممكن تنزل الحرفين هناك حتلاقى محلات كتير هناك لنيسان جديد او استيراد .. وعند محل عبد الرحمن عزت حتلاقى كل اللى انت عايزه

وفى التوفيقية ليه ماسالتش عن الدقاق بيكون عنده حاجات لنيسان بردوا بس مش كتير

عامة لو عايز اى قطع غيار ركز على الحرفين اكتر

ودور شوية على الجلب لغاية ما تلاقيها ان شاء الله

وبخصوص الطنابير لو اتخرطت مرة واتخرطت كويس عند واحد محترف .. عادى . ممكن تشتغل بيها حوالى 30 الف كيلو كمان زيادة .. ولكن لو اتخرطت مرتين ورفعت اوى الطنابير سمكها .. يبقا تغيرها افضل طبعا

وبعدين انت حتركب قطع غيار اصلية وحتنسى اى مشاكل باذن الله وحتريح دماغك

وكاوتش التراب لازم تغيره .. وسعره واحد بره وجوة ومش فارق كتير ابدا

والخصم اللى بيديه المركز ده .. منه هو .. مش من نيسان .. نيسان مش بتعطى خصم .. الا فى اوقات معينة فى السنة كاعروض .. لكن المراكز الخدمة بتعتها هى اللى بتعمل الشغل ده والخصومات دى

وخصم 30% ممتاز طبعا .. ولو معرفة ليك قريبة منك .. خاليه يديك دفتر كوبنات خصم عشان عمل الصيانة كمان عندهم

ولما تكون هناك ومع قريبك ده .. قوله عايز اقابل مهندس احمد صبرى وسلملى عليه

تحياتى ليك

وبالتوفيق

واتمنى منكنش قصرنا مع حضرتك

واسف على التاخير فى الرد .. نظرا لانشغالى ببعض الظروف الخاصة

وبردوا اسف بالنيابة على الاعضاء لو حد اتاخر فى الرد .. لان كل عضو اكيد ليه ظروف خاصة ممكن تنمنعه من الدخول .. لاننا هنا موقع تطوعى .. واللى بيقدر يساعد فى ظروف امكانياته ووقته بيساعد ومش بيتاخر على حد

وبالتوفيق يارب فى حل صيانتك باذن الله
وابقى طمنا عليك وقولنا عملت ايه بعد ما خلصت .. ومتنسناش

تحياتى ليك

ومتنساش زى ما قولتلك تسلملى على احمد صبرى

وبالتوفيق يا فندم