أنا vs أطفال الشوارع (أكون أو لا أكون)

**cyborg_ift** · 27-09-2011 04:26 PM

بقالي فتره بيحصلي موقف من غرابته مش عارف ألاقيله صرفه

بقالي اسبوع بنزل ألاقي سقف العربيه متطبق أقوم خبطه خبطتين من جوه الصالون استعدله وأمشي

من أربع تيام لقيت أثار جزمه على السقف ففهمت اللي بيحصل

عيل مش متربي أهله مش متربيين أكتر منه بيطلع على سقف العربيه المهم امبارح نازل بالليل ألاقي عيل قاعد على الشنطه بصراحه مفكرتش قمت ماسكه من قفاه قعد يقولي والله يا عمو ما انا اللي بطلع على السقف فسيبته لوجه الله

أنزل النهاره الاقي نفس المشكله بس السقف باظ خالص أجي أخبطه ستعدل حته ويبوظ من الناحيه التانيه فمش عارف ايه الحل

وبصراحه من كتر غيظي جاتلى أفكار مؤذيه جدا لإما أكهرب السقف لإما أحط دبابيس على السقف وخوفي لا قطه ولا كلب يلبس فيهه ومستحرم وبرضه مش راضي ان عيل يتعور بس والله هتجنن حد عنده حل

**newuser2009** · 27-09-2011 04:39 PM

بتحصل معايا كتير
اسمع صوت طقه كبوت
ابص من الشباك الاقي عيل نايم فوق الكبوت
اقوم مزعقله و ينزل
خمس دقايق الاقي عيل تاني بيحاول يطلع على الكبوت وازعقله
ده غير لقت الازاز القدام مشروخ و لقيت زلطه على الازاز من تحت
ولقيت في نفس اليوم زلطه على الازاز من ورا
غير اني شفت واد صغير بيفك مسمار اللوحه
انا بعت عربيتي علشان عايز اشتري عربيه جديده
بس كل لما افكر في العيال دول اتخنق جدا

**mido51eg** · 27-09-2011 04:50 PM

الحل بسيط جدا ياجماعة لو عربياتكم بتركن تحت البيت وبتشوفها من البلكونة. دورق مياه فوق دماغ اللي قاعد ونبه عليه بعدها ان المرة الجاية هتبقى ميه مغلية !

**SYD** · 27-09-2011 04:55 PM

باشا
انت ساكن في اخر فيصل ولا ايه ؟؟؟
ولا يا تري كل عيال فيصل متخلفة عقليا ؟؟؟

انا كمان نفس البروجرام

واتقاءً للشر وللحفاظ علي ضغطي وسكري واعصابي

لو رجعت من الشغل ما بين 5 العصر و10 مساء بركن العربية علي فيصل العمومي ومش بدخل بيها المنطقة الجميلة
لو رجعت بليل متأخر بركن تحت البيت بسرعة وبنزل بيها من النجمة قبل ما حد من العيال يصحي وييمارس تمارين الصباح علي الكبوت

كمان عشان اأقل الخسائر جبت هاتشباك
وكفاية عليا الكبوت والسقف ووفرت الشنطة

ربنا معانا اهالي فيصل

والله المستعان
،
،

**windofchange** · 27-09-2011 05:41 PM

شفت واحد عملها فعرب جسرالسويس يعني منطقة تعتبر شعبية دلوقتي عربية صغيرة دايو تيكو ولاحم عصايتين بالطول عالكبوت عصايتين خشب ومسامير صغيرة مدقوقة علي كل عصاية ومشفتش حد زعق معاه طبعا هوا اكيد عمل كده بعد ماخربوا الكبوت وكل واحد حر فعربيته

**mido51eg** · 27-09-2011 05:41 PM

والله ياشباب دورق الميه ده كان ليه مفعول السحر. العيال بقوا بيقعدوا على العربية اللي قدامي واللي ورايا وانا لأ. بالكتير ممكن يسندوا عليها بس.

**cyborg_ift** · 27-09-2011 05:43 PM

المشكله اني بركن في الشارع اللي ورايا لإن تحت البيت مفهوش مكان

**Dr_Mido** · 27-09-2011 06:23 PM

عملت موضوع المياة دة بس بخرطوم و اهل العيال طلعو يزعقو قلتلهم بغسل عربيتى حد ليه شوق فى حاجه ولا واحد اتكلم

**رزق** · 27-09-2011 06:53 PM

ده ولا كأنك عايش معايا
ده أنا أخدت فكرة من موضوع نوم الكلاب عالسقف اللي في المنتدى وكنت حطبقها

بندقية رش و تلسوع بيها اللي تشوفه قاعد عالعربية وياريت لو عليها منظار
بس للاسف أنا قلبي طيب
وكمان خايف تيجي في العربية بدل العيل

فكرة تانية تنفع بس مش حعملها أنا ... شوية زفارة أو شحم أو أو فوق الكبوت والسقف .. بيقولوا ليها مفعول السحر

قولنا حتعمل إيه

-

الموضوع: أنا vs أطفال الشوارع (أكون أو لا أكون)

LinkBack

أدوات الموضوع

عرض

أنا vs أطفال الشوارع (أكون أو لا أكون) - انشر الموضوع فى :

-

-

-

-

-

-

المواضيع المتشابهه

قراءة للوضع............يا رب أكون غلطان

أريد أن أكون تلفازاً

حتي لا أكون سلبيا !

مارضيتش أكون فصق

ممكن أكون عضو فى منتدى بيجو ؟

الكلمات الدلالية لهذا الموضوع

المفضلات

المفضلات

ضوابط المشاركة