الموضوع: جولة فى معرض أتوماك بصحبة العقيد خالد....

إزيكم يا أحلى وحوش.......

يوم الأثنين إتشرفت و قابلت واحد من أكثر الشخصيات إحتراما و هو العقيد خالد.....اللى أخد من وقته كتير علشان يقابلنى فى معرض أتوماك.....

تخيلوا معايا لما خبرة زى العقيد عمال يتفرج معايا على العربيات المعروضة و يفصصهم معايا واحدة واحدة....فعلا كانت تجربة ثرية جدا و إتعلمت منه كتير بصراحة.....

إحنا تقابلنا حوالى الساعة سبعة و نصف و مش عايز أقولكم الزحمة المهولة لدرجة إن تقريبا الباركينج كان كامل العدد......

طبعا قبل ما أبدأ عايز أقول إن سيتروين يا جماعة هى الحصان الأسود فى السوق المصرى لسنة 2012 دون منازع......الموديلات اللى نازلة فى غاية الروعة، قمة فى الشياكة و التصميم، تكنولوجيا متفوقة عن باقى المنافسين..عربيات تناسب كل الأذواق....لو عز العرب ظبط العربية دى صح فى خدمة ما بعد البيع..يبقى معادلة النجاح الساحق إتحققت بكل المقاييس.....

أنا هتكلم شوية عن جولتنا حتة حتة و هرجع تانى للسيتروين بعدين......

طبعا كل اللى بقوله ده يمثل وجهة نظرى الشخصية......

-أول جناح عدينا عليه كان جناح دايموند موتورز الوكيل الجديد لمتسوبيشى....العرض كان يشمل "باجيرو" بسعر خرافى أعتقد كان فى ال700000 جنيه و بعدين كان فيه الoutlander بحوالى 400000 موتور 2.4 لتر و asx و ديه الصغيرة بتاعت الoutlander و كلهم عندهم مقدمة الshark و ديه كانت ملاحظة العقيد خالد اللى فعلا كانت فى محلها.....

طبعا من جوه العربيات تحس إنك فى موديلات 2005...العربيات كتقفيل و رفاهية فقيرة....و بتلاحظ ده فى كذا حاجة.....

المدهش لقينا اللانسر البومة و دى يابانى موديلين واحد ب 115500 و مفيهاش غير الكماليات الأساسية من تكييف و باور و سنتر و زجاج بالأضافة إلى عدد 1 فقط إيرباج

الموديل الأخر كان ب124000 و دى كانت 2 إيرباج و زينون و جنوط و مش فاكر إيه تانى....لكن صراحة إتخضيت من السعر فمركزتش فى المواصفات....

طبعا التقفيل و الخامات كان مخيب للأمال جدا.....

نسيت أقول إن كل البومة اللى نازلة نازلة فتيس ستيبترونيك.....

بالنسبة للشارك كانت بتبدأ من 139000 و حتى 164000 جنيه....

- تانى حاجة عدينا عليها كانت منصور ...طبعا عارض الكورسا و الأسترا و دول مش جداد.....بصراحة مقعدناش كتير فى الجناح ده....

-عدينا بعد كده على عربية مكشوفة من تصنيع شركة PG الفرنسية....عربية تشبه الVW القديمة و العدادات القديمة و دركسيون من المخزن بتاع جدى و كراسى حمرا و الموتور فى الخلف و الشنطة قدام و حاجة كده غريبة.....طبعا لقينا التقفيل حاجة لا تسر عدو و لا حبيب....الفانوس مفلق عن الجسم و تحس إن العربية مش هتستحمل تطلع بره المعرض أصلا....سألناهم إيه الكائن الغريب ده قالولنا أصلها Hand made..... :)

طيب يا عم الهاند مييد و بكام بأه الصاروخ الطائر ده....(فكرتنى بعربية عبد السلام النابلسى مع عبد الحليم حافظ) حاجة كده كوميدية جدا......قالولنا و يا ريتهم ما قالولنا إن السعر 900000 جنيه....قولتلها بتقولى كام يا حاجة.....قالتلى بمنتهى الهدؤ تسعميت ألف جنيه.....طب ليه كده يا ستى....و هو الشعب راكب أفيال بعد الثورة و لا إيه؟ قالتلى هى سعرها 40 ألف يورو و الباقى جمارك.....

طبعا حسينا أنا و العقيد إن إحنا ضيعنا وقتنا فى رؤية هذا الشىء العجيب و لسه و أنا بدور وشى لقيت منظر فكاهى جدا........

معلش مضطر أسيبكم دلوقتى و أريح شوية علشان مطحون سفر و شغل و أرجعلكم بعد شوية فى باقى الجولة مع سيادة العقيد خالد و المنظر المثير للضحك.......

نكمل بقى على الجزء التانى.....طبعا للأسف بأعتذر للوحوش عن نسيانى لإلتقاط صور و ذلك لضيق الوقت....يدوبك صورت الدركسيون بتاع الطيارة قصدى بتاع السيتروين ال C5.

بالنسبة بقى للسيارة التحفة الPG و أنا بدور وشى و قال خير اللهم ما أجعله خير ألاقى كاسيت متركب عموله.....كاسيت يا جماعه من بتوع القسط و متركب لطش من بره و تحس كده إن العربية عدت على غبور و هى داخله مصر....و قام حاطط لها الكاسيت المصرى الضايع إياه و مقاسه مش ماشى مع أى حاجة و أداؤه أضيع.....طبعا أنا صوعقت من هذا المنظر البشع فى سيارة تساوى قرب المليون جنيه....و سبت كل مساؤى السيارة و روحت معلق على هذا الكاسيت بوضعه الشاذ و طبعا كل اللى كان واقف إنفجر فى الضحك.....

و إحنا فى طريقنا طبعا عدينا على الجناح الأكثر من رائع للrange rover و كانوا عاملين نموذج العربية بالhollowgram ( الثلاثى الأبعاد ) طبعا الشكل كان تحفة لكن بصراحة أنا و العقيد كنا عايزين نمسك حاجة بإيدينا و نشوف التقفيل و الكماليات الحديثة....فإنطلقتا لجناح سيتروين.......

قبل ما أبدأ فى وصف جناح سيتروين حابب أقول إنى أنا و العقيد و تقريبا كل وحوش المدرسة الأوروبى أصبحنا مصابين بلعنة السيارات الأوروبى.....

يا جماعة بصراحة اللى يركب سيارات أوروبى أو يشوف التقفيل الأوروبى من الصعب جدا أو تقريبا من المستحيل إنه يعجب بأى تقفيل أخر.....

للأسف هذه اللعنة تصيب أصحابها بإهتمام دقيق جدا جدا بالتفاصيل.....يعنى كنا بنبص على مفصلات الباب، نوعية المساحة و جمالها، مفصلات الشنطة الخلفية، جودة الدهان و خصوصا فى الثنايا و فى المناطق الغير المرئية، تقفيل و فرش الشنطة الخلفية، نوعية البلاستيك المستخدم فى التابلوه و تنجيد الأبواب و حاجات من هذا القبيل....فعلا حسيت إن الواحد بقى صعب جدا يقبل بأى عربية مش مهم تمنها كام المهم جودة تقفيلها و التكنولوجيا العالية اللى فيها إزاى.....

هأبيتدى الأول بجناح بيجو و بعدين نحلى مع بعض بالسيتروين......

بيجو كان عارض سيارات جديدة منها :

508 لون أسود....طبعا عايز تعرف إحترافية التوكيل و العارض من إحترافية الsales man اللى بيشرحلك....لو واثق و فاهم و لا بصمجى و بيفتى....

طبعا من أول العلامات اللى بتدل على كده إن لما الزبون يسأل لازم البياع يقوم يقف و هو بتكلم مع الزبون....للأسف ده مكنش الحال مع بائع البيجو على الأقل اللى كان واقف عند ال508....العربية كانت سوداء....نيجى نفتح نلاقى العربية مبتفتحش....طيب ليه علشان لسه ماوصلتش و دى للعرض فقط....طبعا مش عارف حطينها للعرض علشان نخمن إيه إمكانيات العربية من غير منشوفها من الداخل....

لكن على العموم واحد صديقى كلمهم لاحقا و عرف إنها فى حدود 240 إلى 260 ألف و الموتور تربو حوالى 155 حصان.....و سوف تصل فى نوفمبر.....

سيبت ال508 و كان فيه الRCZ و لكن للأسف مكنش فيه حد بيشرح فمعرفناش تفاصيل كتير عنها....لقينا كده مسخ غريب فكرنى بالظبط بالبارس اللى هو تحس إنه بيجو " لقيط "....

هذا المسخ هو البيجو 408 العربية فى التصميم و التقفيل لا تمت للأوروبى و لا للبيجو بأى صلة مهما كان....عربية لا تتبع المدرسة الأسيوية و لا الأوروبية و لكنها خليط غير واضح المعالم من الأتنين و النتيجة شكل ضايع للأسف....

طبعا بصيت جوه لقيت التقفيل سىء جدا و الخامات فقير ة بشكل لا يصدق و العربية تقريبا مفهاش كماليات....يعنى عربية بدائية جدا....و السعر أكد المعلومة....السعر 129900.....تخيلوا عربية بيجو فئة الصالون بسعر 129900.....طبعا التقفيل كان """" صينى """"" مع بعض محاولات فاشلة من مندوب البيع إنه يحلى البضاعة و إن كل الخامات فرنساوى ما عدا الفرش و جوانات الأبواب....مش عارف لغاية إمتى هيفضلوا يستهينوا بعقلية الشعب المصرى.....

قلت أشوف ال3008...الحمد لله لقيتها مفتوحة....و كانت 5 مقاعد بالإضافة لمقعد ممكن يتحط فى الشنطة و لكن هذا المقعد مش ممكن يقعد عليه بنى أدم و لا حتى طفل.....هما تقريبا عاملينه كargument بيعى قال يعنى العربية 6 راكب......

بصراحة معجبنيش الزراير اللى فى التابلوه بتاعت التكييف و الفلاشر و خلافة.....كان شكلهم قديم و رخيص قوى ده غير الفضى اللميع اللى بيقابلك و بيضرب فى عينك فى كل قطعة داخلية فى التابلوه و عصاية الفتيس و مع كامل إحترامى لبيجو و لكن كترة اللون الفضى اللامع أعطى إنطباع برخص الخامات المستخدمة و بميلها ناحية المدرسة الصينى........

ال5008 سألت عليها مكنتش وصلت لسه......

كانوا عارضين ال206+ و ال308 و ال207 و ال308SW.....


أسيبكم دلوقتى مع حسن الختام سيتروين و BMW و أشوقكم بالصورة دى " الطيارة "