الموضوع: جولة فى معرض أتوماك بصحبة العقيد خالد....

نكمل بقى على الجزء التانى.....طبعا للأسف بأعتذر للوحوش عن نسيانى لإلتقاط صور و ذلك لضيق الوقت....يدوبك صورت الدركسيون بتاع الطيارة قصدى بتاع السيتروين ال C5.

بالنسبة بقى للسيارة التحفة الPG و أنا بدور وشى و قال خير اللهم ما أجعله خير ألاقى كاسيت متركب عموله.....كاسيت يا جماعه من بتوع القسط و متركب لطش من بره و تحس كده إن العربية عدت على غبور و هى داخله مصر....و قام حاطط لها الكاسيت المصرى الضايع إياه و مقاسه مش ماشى مع أى حاجة و أداؤه أضيع.....طبعا أنا صوعقت من هذا المنظر البشع فى سيارة تساوى قرب المليون جنيه....و سبت كل مساؤى السيارة و روحت معلق على هذا الكاسيت بوضعه الشاذ و طبعا كل اللى كان واقف إنفجر فى الضحك.....

و إحنا فى طريقنا طبعا عدينا على الجناح الأكثر من رائع للrange rover و كانوا عاملين نموذج العربية بالhollowgram ( الثلاثى الأبعاد ) طبعا الشكل كان تحفة لكن بصراحة أنا و العقيد كنا عايزين نمسك حاجة بإيدينا و نشوف التقفيل و الكماليات الحديثة....فإنطلقتا لجناح سيتروين.......

قبل ما أبدأ فى وصف جناح سيتروين حابب أقول إنى أنا و العقيد و تقريبا كل وحوش المدرسة الأوروبى أصبحنا مصابين بلعنة السيارات الأوروبى.....

يا جماعة بصراحة اللى يركب سيارات أوروبى أو يشوف التقفيل الأوروبى من الصعب جدا أو تقريبا من المستحيل إنه يعجب بأى تقفيل أخر.....

للأسف هذه اللعنة تصيب أصحابها بإهتمام دقيق جدا جدا بالتفاصيل.....يعنى كنا بنبص على مفصلات الباب، نوعية المساحة و جمالها، مفصلات الشنطة الخلفية، جودة الدهان و خصوصا فى الثنايا و فى المناطق الغير المرئية، تقفيل و فرش الشنطة الخلفية، نوعية البلاستيك المستخدم فى التابلوه و تنجيد الأبواب و حاجات من هذا القبيل....فعلا حسيت إن الواحد بقى صعب جدا يقبل بأى عربية مش مهم تمنها كام المهم جودة تقفيلها و التكنولوجيا العالية اللى فيها إزاى.....

هأبيتدى الأول بجناح بيجو و بعدين نحلى مع بعض بالسيتروين......

بيجو كان عارض سيارات جديدة منها :

508 لون أسود....طبعا عايز تعرف إحترافية التوكيل و العارض من إحترافية الsales man اللى بيشرحلك....لو واثق و فاهم و لا بصمجى و بيفتى....

طبعا من أول العلامات اللى بتدل على كده إن لما الزبون يسأل لازم البياع يقوم يقف و هو بتكلم مع الزبون....للأسف ده مكنش الحال مع بائع البيجو على الأقل اللى كان واقف عند ال508....العربية كانت سوداء....نيجى نفتح نلاقى العربية مبتفتحش....طيب ليه علشان لسه ماوصلتش و دى للعرض فقط....طبعا مش عارف حطينها للعرض علشان نخمن إيه إمكانيات العربية من غير منشوفها من الداخل....

لكن على العموم واحد صديقى كلمهم لاحقا و عرف إنها فى حدود 240 إلى 260 ألف و الموتور تربو حوالى 155 حصان.....و سوف تصل فى نوفمبر.....

سيبت ال508 و كان فيه الRCZ و لكن للأسف مكنش فيه حد بيشرح فمعرفناش تفاصيل كتير عنها....لقينا كده مسخ غريب فكرنى بالظبط بالبارس اللى هو تحس إنه بيجو " لقيط "....

هذا المسخ هو البيجو 408 العربية فى التصميم و التقفيل لا تمت للأوروبى و لا للبيجو بأى صلة مهما كان....عربية لا تتبع المدرسة الأسيوية و لا الأوروبية و لكنها خليط غير واضح المعالم من الأتنين و النتيجة شكل ضايع للأسف....

طبعا بصيت جوه لقيت التقفيل سىء جدا و الخامات فقير ة بشكل لا يصدق و العربية تقريبا مفهاش كماليات....يعنى عربية بدائية جدا....و السعر أكد المعلومة....السعر 129900.....تخيلوا عربية بيجو فئة الصالون بسعر 129900.....طبعا التقفيل كان """" صينى """"" مع بعض محاولات فاشلة من مندوب البيع إنه يحلى البضاعة و إن كل الخامات فرنساوى ما عدا الفرش و جوانات الأبواب....مش عارف لغاية إمتى هيفضلوا يستهينوا بعقلية الشعب المصرى.....

قلت أشوف ال3008...الحمد لله لقيتها مفتوحة....و كانت 5 مقاعد بالإضافة لمقعد ممكن يتحط فى الشنطة و لكن هذا المقعد مش ممكن يقعد عليه بنى أدم و لا حتى طفل.....هما تقريبا عاملينه كargument بيعى قال يعنى العربية 6 راكب......

بصراحة معجبنيش الزراير اللى فى التابلوه بتاعت التكييف و الفلاشر و خلافة.....كان شكلهم قديم و رخيص قوى ده غير الفضى اللميع اللى بيقابلك و بيضرب فى عينك فى كل قطعة داخلية فى التابلوه و عصاية الفتيس و مع كامل إحترامى لبيجو و لكن كترة اللون الفضى اللامع أعطى إنطباع برخص الخامات المستخدمة و بميلها ناحية المدرسة الصينى........

ال5008 سألت عليها مكنتش وصلت لسه......

كانوا عارضين ال206+ و ال308 و ال207 و ال308SW.....


أسيبكم دلوقتى مع حسن الختام سيتروين و BMW و أشوقكم بالصورة دى " الطيارة "

نكمل بقى على فعلا ملكة المعرض دون منازع-----السيتروين---------

طبعا أنا بأكد إنى لو هشترى عربية جديدة لسنة 2011 كنت و بدون تردد هفكر جديا فى السيتروين C4 البيكاسو 5 راكب.......

طبعا أول ما بتخش جناح سيتروين بتحس إن العربيات دى مش نازلة علشان تبيع زى باقى العربيات....لأ العربيات دى بتبهرك الأول و بعدين بتخليك تشترى.....و لو مش هتشترى هتبقى عارف و متأكد إن فايتك كتير جدا و إن سيتروين هى سيترون....قمة الفخامة....قمة الإبداع.

أول عربية قابلناها أو بالأصح قابلتنا كانت الC5 اللى أنا حاطط صورة الدركسيون بتاعها فى الصورة....العربية كانت سوداء مع فرش جلد أسود....تصميم يخطف الأنظار.....جودة تقفيل واضحة جدا جدا.....العربية 1600 سى سى 155 حصان twin turbo.....جلست خلف كابينة الطيارة قصدى خلف عجلة القيادة......الدركسيوت شىء لا يصدق......طبعا الوسط ثابت و الطارة فقط متحركة......العربية سوداء و الفرش جلد أسود.....خياطة بارزة تضفى طابع رياضى للسيارة....كراسى رياضية بحواف جانبية......

دركسيون مالتى مالتى يعنى.....كل اللى بتفكر فيه عند لمسة صباعك....كم الكماليات غير طبيعى......

رادار أمامى و باركينج سينسور......بلوتوث و زينون و عدسات adaptive....العربية خرافية....صناعة فرنسى و السعر 230000.....

روحنا بعد كده على التحفة البيكاسو C4 سبعة راكب......فعلا عربية لا تصدق......3 كراسى منفصلين عن بعد فى الخلف......الكرسين الخلفيين الزيادة واسعين و برحين و شرحين و بيتفتحوا و يتقفلوا بشدة حزام من غير و لا كلمة و لا تعليقة....و لما بتقفلوا بيبقى عندك عربية نصف نقل.......

مدخل التحميل منخفض و ده شىء رائع......

طبعا كل السيتروين كان فيه إشارات جانبية تحت المرايات الجانبيه و كمان ضم كهرباء.....

قعد بقى على كرسى السائق لو عايز تعرف يعنى إيهperfect driving position

يعنى تبقى شايف الشارع كله شمال و يمين من غير ما تشب و لا تركز.......طبعا الشراعة الأمامية اللى حطنها عاملة أحلى شغل......نور زيادة فى العربية بيحسسك براحة نفسية و أيضا بترفع الA pillar علشان تقلل الblind spots للحد الأدنى......

لا يوجد فتيس أوسط لا أتوماتيك و لا مانيوال فتخيل معى إن مفيش كونسول أوسط......يعنى وسع إضافى خرافى........

إمال فتيس العربية دى فين....ألاقى دراع عامل زى دراع الإشارات فوق الدركسيون P, R D, N و كان الله يحب المحسنين.....لمسه واحدة للعصاية دى ينقل الفتيس فى الحال......

الجديد بقى......إن الزجاج الأمامى لا ينتهى فوق سيادتك لأ و لأول مرة بينتهى خلف سيادتك و إنتى قاعد.........يعنى عامل curve و داخل جوه السقف.....يعنى نور زيادة و زيادة للسائق و الراكب و الجميل إن الشماسة الأمامية ممكن تغطى الحتة دى مع طبعا الزجاج الأمامى......يا لعبك يا سيتروين......

العربية واسعة و شرحه و برحه....فى رأى أحسن family MPV فى مصر......عربية تستحق فلوسها.....


بمنتهى الصراحة عز العرب مكنش مبالغ فى تسعير السيارات......

البيكاسو تقفيل أسبانى.......البيكاسو ال5 راكب اللى كانت عجبانى أكتر من ال7 علشان حجمها كان على قد إحتيجاتى كانت ب 185000.....أعتقد سعر معقول بالنسبة لإمكانيات العربية و كمالياتها و منشأها الأوروبى.....و مقارنة بلانسر بومة بواحد إيرباج بسعر 115000.....يبقى العربية دى تستحق

لاحظ برده إن الموتور 155 حصان twin turbo بنزين 95 أو 98.

و نكمل فى حلقة قادمة إن شاء الله مع باقى السيتروين الC4, C3, DS3, DS4.