الموضوع: جولة فى معرض أتوماك بصحبة العقيد خالد....

المشاركة الأصلية كتبت بواسطة wawoo

هو الدركسيون دة بتاع طيارة فعلا ..عشان كدة هو فاشل فى السيارة ..يعنى حتى مش حيبقى عندك وقت و انت سايق تبوص على اى زر من اللى موجودين فى الطيارة دى ..

دة غير انة متصمم بالفكرة القديمة بتاعت ان قلب الدركسيون يبقى ثابت و الطارة بس اللى تبقى متحركة و طبعا ثبت بالتجربة العملية انها فكرة فاشلة تمام ..بدليل ان ستريون نفسها لاغتها تمام فى مودلتها الجديدة بسبب شكوت الناس منها ...

الحقيقية ستروين عاملة زى اخت العروسة ..هما بيحولو جاهدين يعملو عربيات ثورية العالم مش مستعد لافكرهم ليسة ..بتكون النتيجة منتج مهجن بين الاتنين مش محصل دى ولا دى ....

يعنى عندك الدى اس 4 ..شكلها جميل و امكانيتها حلوة و كل حاجة ..لكن تفاجىء ان زجاب الباب الخلفى مش بيتفتح ولا بينزل ...."و اتحدى اى حد اة يكون اخد بالة من المعلومة دى و هو بيتفرج "طيب لية يا ستروين عملتى كدة فى الزجاج ..كل دة عشان يعملو شكل الباب مختلف شوية ...

الحقيقية ستروين بتحاول جاهدة انها تحصل رينو او حتى بيجو ..و بتعمل مجهود كبير قوى لكن فى الاخر برضو سيارات بكمليات عالية جدا و تصميمات ثورية و لكن غيرعملية على ارض الواقع ..ضيف على دة توكيل تعبان و تسعير عجيب لسيارتهم و انت تعرف ليه ستروين تعبانة فى مصر من فترة طويلة ..

رينو لعبتها صح بانها تقدم سيارات بتكنولوجيا مرتفعة و فى نفس الوقت تصميمات عملية بعدية عن التكلف الزائد و المنظرة الكدابة ...و ساعد فى كدة شراكتها مع نيسان اللى رجعتها لارض الواقع ..بعد ما فضلت سنوات ماشية فى سكتة ستروين دى ..و النتيجة انها رجعت تانى تقدم سيارت باعتمادية عالية تنتشر فى عدة دول و تحقق المعادلة الصعبة .اللى ستروين و بيجو و غيرها من الشركات الاوربية مش عارفة توصلها حتى الان ..

مين اللى حكم ان الدريكسيون دا فاشل فى عربية ؟


و الفكرة القديمة اللى مش عاجبة حضرتك ديه ليها مزايا مش معمولة كده عشان المصمم جت فى دماغه انى اعمل فكرة مختلفة و خلاص

و انت مش محتاج تبص على الطارة اصلا و ديه ميزة من الفكرة القديمة ( اللى مش عاجبة حضرتك ) ان قلب الدريكسيون ثابت فشهر بالكثير و هتبقى حفظت مكان كل زرار زى ما بتحفظ زراير الكيبورد لانها مش بتتحرك حتى و انت بتلف ..

التغيير مطلوب و مش عشان عملوا حاجة جديدة هيلزقوا فيها خلاص .. ما دريكسيون الدى اس اصلا مفيهوش مالتى فى الطارة نفسها الطارة نفسها فاضية .. هل ده معناه انهم لغوا المالتى من الحتة ديه عشان فاشلة ؟ ( تقريبا كل عربيات العالم بتحط المالتى فى الطارة نفسها ، مش ورا زى الرينو .. و ده مش عيب و لا ده عيب .. كلها افكار و كل مصمم ليه افكاره )


العربيات و لا ثورية و لا حاجة .. هى مميزة بس .. و فيها تكنولوجيا معظم صانعى العربيات يقدروا يعملوها بس هما بيفكروا فى حاجات بسيطة تميز عربياتهم .. زى حكاية الشماسة اللى بتتحرك ديه .. هل اى شركة عربيات لو صينى حتى تعجز ان هى تعمل حاجة بالبساطة ديه ؟

و حكاية قفل الازاز دا انا مخدتش بالى منها فعلا .. بس انا شايف شكل الباب مش غريب للدرجة ديه و لو كانوا عايزين يعملوا فيه ازاز بيتفتح كانوا هيعملوا .. انا بصراحة معرفش الحكمة من كده ايه ؟ بس هو عامة حاجة مش عجبانى برضه .. بس دا عيب بسيط قصاد عربية بالشكل ده و بالثمن ده و العربية واخدة جوائز فى التصميم .. و تصميمها متهيألى محدش يختلف انه يخطف العين و القلب
عامة كل الكلام ده ميمنعش انى شايفه عيب برضه .. بس مفيش عربية كاملة

ستروين شركة كبيرة و مش محتاجة مزايدة على كده و عامة سيتروين و بيجو مشتركين مع بعض من فترة و تقريبا العربيات هى هى فى حاجات كثير .. حضرتك ممكن تراجع السى فور بتعمل ايه كل سنة فى الرالى و بتقدر تتفوق على مين ..

التوكيل مش بيعمل تسويق كويس .. انا مع حضرتك .. بس فين التسعير الغريب للعربيات ؟؟ .. انا شايف ان الاسعار مناسبة جدا و مفيش اى مبالغة فيها .. و ستروين مش عربية صينى عشان كده العربيات سعرها مش رخيص اصلا عشان التوكيل ينزلها رخيصة .. و كفاية جودة التقفيل اللى تبان لأى حد و ان العربيات معظمها فرنساوى 100% مكونات و تقفيل

نقطة ان العربيات عملية .. فحضرتك راكب رينو و عارف العربيات ديه لما بتتهان بتبقى النتيجة ايه ؟ .. انا رحت كذا مرة مركز الصيانة و شفت بعينى عربيات 2005 و العربية ماسكة نفسها و تحس ان حالتها زيرو و دا عشان صاحبها محافظ عليها و بيعاملها كويس .. فيه ناس بتبهدل العربيات و للأسف العربيات الفرنساوى بالذات مش حمل البهدلة اللى بعض الناس بتعملها و عشان كده النتيجة بتبقى سيئة جدا فعلا ..

انا مش عارف حضرتك تقصد ستروين بالمنظرة الكذابة ؟ .. و موضوع نجاح رينو فى السوق المصرى لا يعنى اى شىء .. مع احترامى و حبى لرينو .. بس السوق المصرى مش مقياس ابدا لأى حاجة .. لو على كده فالسيراتو بقى احسن من كل العربيات اللى فى الفئة تحت الـ 150 الف و موضوع الشراكة مع نيسان اضاف فعلا لرينو .. بس قبلها رينو كانت بتنتج عربيات مميزة جدا برضه و الدليل الميجان ii

انا مش عارف فى المنتدى ليه لما حد تكون ماركة مش داخلة دماغه لازم يقعد يدور و يطلع اى عيب فيها و لازم يصطاد كل اخطاء الشركة .. مع ان مفيش شركة مبتغلطش و مفيش عربيات كاملة

و عذرا لخروجى عن سياق الموضوع

المشاركة الأصلية كتبت بواسطة Meggieboy

طبعا أنا بأكد إنى لو هشترى عربية جديدة لسنة 2011 كنت و بدون تردد هفكر جديا فى السيتروين C4 البيكاسو 5 راكب.......

U R my Hero

ال C5 كان منى عينى أركبها....بس لما قعدت فيها حسيت إنى فى عربية ألمانى أكتر بكتير منها فرنساوى
ريحتها ألمانى و ملمس الأشياء و حتى صوت الباب و هو بيتقفل ألمانى.....

وسعت منهم حبتين حكاية مضاهاة الألمانى دى لحد ما أصبحت فعلا ألمانى

عايز أسأل حضرتك سؤالى وجيه...لما طلعت ركبت الميجان II بعد لقاء عربيات سيتروين...هل حسيت بإنك راكب حاجة أقل أو قديمة و اشتقت لإللى شفته فى المعرض ؟؟؟

المشاركة الأصلية كتبت بواسطة wawoo

انا رايى انة فاشل .. وشركة اللى صممتة شايفة انة فاشل .."بدليل انة لم يستمر فى المودلات الجديدة " و ناس كتير من اللى اشترو السى 4 القديمة و اللى مشتروش شايفيين انة فاشل ...

و اية لازمة الجملة اللى فى الاخر دى ..انا بقول رايى اللى انا شايفة و انا عندى خلفية فنية و تصميمية ..يعنى مش راى كدة و السلام ..والله مش عجبك رايى انت حر ..انما ملوش لازم تسنتج اسباب من دماغك عن سبب رايى وانت متعرفش عنى حاجة و لا عن مرجعيتى حاجة...

و الحقيقية انا مش عارف هو اية الفكرة من موضوع عن الستروين فى قسم الرينو ..!!! ما قسم الستروين موجود للعاوز بتكلم عن مودلتها براحتة ..؟؟

و ناس كثيرة شايفه انه مفيش مشاكل و فكرة جديدة و انا منهم .. و عامة زى ما وضحت لحضرتك ان التغيير مش لازم يكون عشان انه فاشل .. طيب ما العداد الديجيتال اتشال من الموديل الجديد .. هل معنى كده ان العداد الديجيتال فاشل ؟ .. و ممكن حضرتك تقولى من وجهة نظرك ليه فاشل .. جايز يكون فيه حاجة انا مش واخد بالى منها

زى ما حضرتك قولت رأيك انا قولت رأيى برضه فى اللى انا شايفه بيحصل من بعض الاعضاء فى المنتدى .. و كله اراء فى الاخر و تحتمل الصواب او الخط .. انا محددتش حضرتك بالأسم و قولت ليه بتعمل كده .. انا وجهت كلام عام ان فيه ناس بتعمل كده ..

انا معملتش موضوع عن ستروين .. كل ردى عن كلام حضرتك وجهته و انا شايف ان فيه اتهامات لشركة ستروين .. يعنى حضرتك فتحت سيرة الكلام عن ستروين و مش قادرة تنافس كذا و الكلام ده و انا رديت على حضرتك بس لأن الكلام انا شايفه من وجهة نظرى مش صح .. مجيتش من اول الموضوع و رحت داخل قايل ان ستروين احسن شركة فى الدنيا .. و انا رديت مرتين قبل رد حضرتك فى نفس الموضوع و ردودى كانت فى سياق الموضوع .. و عامة اظن ان دا منتدى و من حقى لما اشوف حاجة انا شايفها من وجهة نظرى مش صح .. انى اعلق و اقول رأيى

انا مدخلتش عملت موضوع عن ستروين فى قسم رينو .. و طبيعى انى ادخل قسم رينو بحكم امتلاكى لعربيتين رينو ..

و عامة يا باشا فرصة سعيدة بالكلام معاك .. و يا ريت الموضوع مياخدش منحنى اكبر من كده .. فى الاخر كلها شركات عربيات و زى ما وضحت فى ردى ان مفيش عربية كاملة .. و مش هنقعد نتخانق عشان ماركة فى الاخر ( اى كان اسمها ) .. النت موجود و كل واحد ممكن يدور و يشوف المعلومات اللى هو عايزها ..

جولة مع العقيد خالد!!! يا بختك :-)
شكرا على التقرير

المشاركة الأصلية كتبت بواسطة Meggieboy

هانى باشا....كان طبعا نفسى أتعرف عليك فى المعرض لكن إن شاء الله ملحوقه......

أنا كمان كان نفسى أبقى موجود..بس تتعوض قريب إن شاء الله

المشاركة الأصلية كتبت بواسطة Meggieboy

بمنتهى الأمانة من ساعة ما إشتريت الميجان ii ما حسيتش إنى راكب حاجة أقل أو قديمة أبدا بل بالعكس دايما حاسس إنها سابقة عصرها و محافظة على شكلها و قيمتها.......

أنا كمان.....
قابلت واحد أعرفه فى المعرض و بعدين بعد لفة مطولة جدا فى المعرض خرجنا سوا و ركبنا ميجو..فبيقول لى ..ها مش عايز تغير...فقلتله ..قول لى على حاجة فى أى عربية من إللى شفناهم جوة فى نفس الفئة و مش موجودة هنا....ده غير كذا و كذا و قعدت أعدد فى محاسن ميجو....
احنا سعداء الحظ إن قدر لينا نركب العربية دى...يمكن أقرب مثال للحالة دى مع السيتروين DS فى الخمسينات

أى عربية ركبتها حتى ال BMW 528 مش مبهرة للدرجة ( طبعا مع مراعاة فارق السعر ) إللى تحسسنى بإنى راكب عربية أقل....كفاية ال excellent driving position...

للأسف لسه ما ركبتش عربية انجليزى...بس فاكر زمان أتيحت ليا الفرصة فى ركوب ساب السويدى...لسه معلمة فى دماغى بعد مرور أكتر من 12 سنة....

جربت القعدة فى الفولفو الجديد....مش جذابة أوى....نضيفة أوى....بس مالهاش شخصية قوية تميزها كتير عن الألمانى

المشاركة الأصلية كتبت بواسطة Meggieboy

لكن بصراحة أنا أصلى بحب السفر و الرحلات بالسيارة.....gps و عربية حلوة و مناظر جميلة و إستكشف و لف و إتفرج إنت و الأسرة و بصراحة حسيت إن الc4 البيكاسو بتحقق الموضوع قوى ( طبعا اللى مش حققه فى مصر).....فحسيت إنى لو كنت هشترى حاجة جديدة كانت أكيد هتبقى فى أعلى قائمتى....

للأسف مصر لا تشجع على كده...لولا ميجو كان الواحد ما خرجش من بيته

جولة مع العقيد خالد!!!

عيب والله .... دي اسمها خيااااااااااااااااااااااا اااااااااااانه

واوعي تقولي انها مشروعه ....