بسم الله الرحمن الرحيم

اولا انا بشكر كل اهل المنتدى و كل اللى عامل فيه مواضيع بجد قيمه
عايز اقولكم انى كونت كل المعلومات عن السيفيك و انا بشترى من هنا من المنتدى و حسيت لاول مره و انا بشترى عربيه انى فاهمها و عارف كل اللى فيها

انا كنت عملت موضوع قبل كده و استشرت الناس هنا فى قسم هوندا و قارنت بين السيفيك 2009 فى تى اى و بين بومه 2011 سبورت

و الحمد لله ربنا سبحانه عترنى على عربيه من هنا من المنتدى و من اخ فاضل و محترم ماشاء الله و كشفت على العربيه بصراحه بره التوكيل و كله تمام و كلمت التوكيل و اتأكدت انها عملت كل صيانتها فى التوكيل ده كمان غير اخر فاتوره كانت مع العربيه من التوكيل

المهم خلصت فى العربيه من حوالى اسبوعين بالظبط و بدأت مشوار المرور لكن الحمد لله خلص على خير و رخصت و كله تمام و برده هاقولكم مصر هى هى و لا اتغيرت و لا هتتغير و لا ثوره و لا بتنجان ماشاء الله
لسه الناس فى المرور زي ما هي بتقبض و تخلص و الوسايط عامله شغل عالى جدا

بصراحه اول ما ركبت العربيه كنت خايف منها جدا لانى اول مره اسوقها مده طويله كانت المسافه من المنصوره لطنطا

و ماشي بيها زي اللى بيتعلم سواقه اصل اخوكم كان صايع ايام اللانسر و افوت فى الحديد و لا تفرق عارف بقى مقاستها و حافظها من سنين

وصلت طنطا و الحمد لله بخير و ركنتها و برده خايف منها و بدأت كده كل يوم انزل اتمشى بيها شويه عشان احفظ المقاسات و يعنى الحمد لله دلوقتى اقدر اقول انى تقريبا لميت كل ابعادها و كله تمام

نسيت اقولكم العربيه ماشاء الله فخمه جدا و جوده الخامات عاليه جدا
هى 2009 فى تى اى نبيتي فرش جلد

انا عمال ااجل فى مشوار التوكيل عشان اقدر الم كل العيوب و الملاحظات اللى فيها عشان تتعمل فى التوكيل ان شاء الله تعالى
و برده عشان اسأل الرجاله هنا عنها و ابقى فاهم الكلام ايه

بالنسبه للميزات :

1- العربيه ماشاء الله تجرى و لا كلمه من اقل دوسه بنزين و السحب عالى ماشاء الله
2- الوسع من جوه مش زي اللانسر اوي خصوصا فى اللى قاعد ورا لكن اللى سايق و اللى جنبه تمام جدا
3- فرش الجلد ماشاء الله خامه و تقفيل 10/10
4-الاهم بقى من كل ده الثبات ماشاء الله عليه و لا فارقه معاها ملفات و لا حركات
5- بصراحه حاسس بمتعه بجد و انا سايق الحمد لله و مكنتش متوقع كده بالعكس كنت متوقع اقل من كده


بالنسبه بقى للملاحظات و اللى انا عايز اسأل عليها :

1- فى مره كنت بتفرج على الماتور لقيت ان الاربه بتاعت المياه فاضيه تماما فانا زودتها مياه خضرا لحد ما اروح التوكيل مؤقتا و ده كلام الكتالوج و بتابع الميه ده كل يوم او يومين و بتنقص بمعدل صغير
بس لما بصيت على الريداتير و على الاربه نفسها ملقتش اى اثر لتسريب غير شويه خضار كده على غطا الاربه فده ممكن يكون العيب و لا ممكن يكون ايه تاني ؟

2- العربيه اول ما تطلع بين النقله التانيه و التالته العربيه بتكن ثانيتين كده و ترجع تفتح تاني و تاخد سرعتها عادي
كنت قريت فى المنتدى ان ده عيب سوفت للفتيس صح كده و لا ايه ؟

3- العربيه من سرعه 30 الى سرعه 70 فيها رجه بسيطه فى العفشه فى الجنب اليمين و بتبان اوي فى الملفات لو على سرعه او لو انا ماشي براحه بتبان برده لكن لو جارى مش بتبان اوي
كان صاحب العربيه قالى انه قال للتوكيل على العيب ده و المهندس قاله ده بس عايزه وقت عشان تتكشف عليها و تتحل و الوقت ماسعفهوش فى اخر صيانه لكن هى سهله و هى ممكن تكون كوبلن داخلى او خارجى

4- العربيه للاسف محتاجه بطاريه فكنت قريت هنا فى المنتدى ان التوكيل بيبيع فارتا الالمانى و سعرها كويس بالنسبه للسعر بره فيا ترى معلوماتى كده صح و لا لا و يا ترى فى احسن منها و لا لا ؟
انا كنت مجرب الاسي ديلكو فى اللانسر و كانت ماشاء الله عليها لكن كذا حد قالى انها مبقتش زي الاول فى الكفاءه

5- بالنسبه للفوانيس الاماميه للفى تى اى انا اعرف انها اتوماتيك فى الظبط و ليها حساس و الحساس ده عندى فى الفانوس الشمال مكسور و عايز يتغير و الراجل بصراحه كان قايلى عليه لكن سؤالى بقى هل الفوانيس ده ليها ظبطه اصلا على مستوى ما و بعدها الحساس بيشتغل و لا لا ؟
لان النور عندى خصوصا العالى واطى على الارض جدا فى الفانوسين مبينورش اكتر من 10 متر قدامي على عكس الواطي الزينون اضائته كويسه و مظبوط
كمان الفوجات ليها ظبطه و لا ايه الكلام لانى مش عارف ؟

6- عايز اعمل بقى صيانه شامله على الماتور و العفشه فى التوكيل هل ده متاح و لا انا ملتزم فقط بمواعيد الصيانه و لا ايه خصوصا ان العربيه 2009 يعني فاضلها شهرين تلاته و تخرج من الضمان فانا عايز اغير فيها كل الحاجات زي التيل و السيور و الزيت عشان ابتدى معاها الصيانه من الاول

و عايز اعرف اسعار قطع الغيار الاساسيه دلوقتى كام فى التوكيل
يعني تيل امامى و خلفى ؟
فلتر زيت ؟
فلتر هوا
فلتر تكييف
كل الحاجات للماتور و العفشه بتاعت الصيانه العاديه او مثلا صيانه كبيره شويه
نصيحتكم يا شباب و اسف على الاطاله