الموضوع: المساعده فى علاج مدمن حقن

المشاركة الأصلية كتبت بواسطة world_of_kill

انا اسف بجد لو قلت حاجه مكنش قصدي بس كان قصدي انو يقدر يبطل


و بجد المعلومات اللي قلتها دي اللي كان مدمنها هوه اللي قالي انو بحس بكدا فا مجربتش عشان ابقي عارف هوه اللي جرب و قالي و انا كان قصدي اقولو انها بسيطه ممكن يبطلها ميقلقش يعني

و اكيد الادمان هوه تعود بس في تعود عادي ودا زي الاكل الكتير و التدخين و التعود اللي غصب عن الواحد اللي هوه عشان يبطلو بيحس بي الام جسمانيه زي اللي بيضرب جداول و خلافه

دا قصدي انا السمكري بتاعي كان مدمن و بياخد ماكس و بانجو و ترامادول و كل حاجه ممكن تتخيلها بس هوه كان عندو احساس انو عاوز يبطل و هوه كان بيشتغل صبي سمكري الاول و لما كلمتو كلمتين براحه بعد 3 اشهر لقيتو فتح ورشه و بطل كل حاجه حتي السجاير و بقي بسم الله ماشاء الله مش عارف يودي الفلوس فين دلوقتي

و انا الحمد الله بطلت برضو دلوقتي السجاير و الشيشه اللي كانو عاملينلي ازمه في حياتي بقالي اكتر من 7 اشهر لما شفت توبيك هنا و انا كان عندي عزم

فاضلي بس حاليا اني يبقي عندي نشاط واتحرك لاني برضو بطلت اكل و مش بخس عشان مش بتحرك كتير

ولا يهمك يا باشا

انا قلت ان علاج الادمان ليس سهلا ولكن ليس مستحيل ابدا

واعرف عيانين بيبقوا قمة في التصميم والعزيمة لدرجة اننا كنا بنجيبهم المستشفى نعملهم Role model واقول في وسط مجموعة العلاج انا فخور بهذا الشخص وطبعا ده بيدي دفعة للاثنين الex-addict والعيان
طبعا السمكري بتاع حضرتك مثال حي على تجربة وكويس انه أخد قراره بايده وده اهم شيء في العلاج

معظم الناس اللي كانت بتجيلنا كانت عندها Hidden agenda على رأي عمر سليمان

ييجي العيان في لحظة صفا ويقول:
* انا دخلت المستشفى عشان ابويا هددني انه حيحرمني من الميراث ولكن اول ما حخرج اول حاجه حعملها اني حرجع للمخدر ثاني !!!

* مراتي هددتني انها حتخلعني وحتاخد العيال ومش حشوفهم واديني دخلت عشان يبقى معايا شهادة اني اتعالجت

* بتعالج عشان عليا حكم محكمة وبحاول اقضي فترة في المستشفى قبل ما اتمسك
وخد من ده كتير

اللي حيفرق معاه:
1. توفيق الله
2.إرادته
3.جدول العلاج
4. جيناته
5. الجرعات السابقة اللي أخدها
6. البيئة اللي عايش فيها (في الباطنية مثلا)
7. مساعدة أهله ليه

(انا مرة كنت بعالج واحدة اتضح ان جوزها تاجر مخدرات وشايل البضاعة تحت السرير وبالتالي الرجوع للمخدر معناه انها تمد ايديها تحت السرير وهي نايمة وخلاص على كده طبعا علاجها باظ 100 مرة )

مرة ثانية كنت بعالج سائق اتوبيس سياحي للاجانب وكل ما اخليه يبطل بيلاقي 55 راكب في قفاه قاعدين يسكروا طول الرحلة وطبعا بيكون اول واحد شارب معاهم

بس واضح من كلامك ان السمكري بتاعك حيكون مثال حلو على نجاح علاج الادمان