عايز حضانه في مدينة نصر

**zago** · 11-10-2011 11:03 PM

انا رأيي تاخده معاك الشغل ارخص

**shaddadfalcon1** · 12-10-2011 12:32 AM

المشاركة الأصلية كتبت بواسطة zago

انا رأيي تاخده معاك الشغل ارخص

هيبوظ كل حاجه

انا معنديش مشكله انه يقعد في البيت بس هو لما كنا في الأسكندريه كان بيروح حضانه ويلعب مع العيال وده اللي احنا كنا عايزينه
لو علي العلام فوالدته اصلا خريجة تربيه طفوله يعني ده تخصصها وتعلمه كويس بس اللعب مع الاطفال مش هيلاقيه في البيت

بس انا اعرف ان الحضانات الغاليه دي بتعلم كويس سواء في الأسلوب او انجليزي وحساب وكده يعني
ولا انا فاهم غلط وهي غاليه من اجل الغلاء وخلاص ؟

**shaddadfalcon1** · 12-10-2011 12:33 AM

المشاركة الأصلية كتبت بواسطة wesam_salom

قلنا لك من الاول نار الاسكندريه ولا جنه القاهره

ظروف الشغل بقي نعمل ايه

المشاركة الأصلية كتبت بواسطة heshamzaky

ناحية الشوارع الى أنت طالبها الرينج حا يبقى من 400 على الاقل و أنت طالع
لو عايز حاجة اقل فى السعر ممكن فى حدود 200 جنية بالشهر تقريبا مش عارف السعر زاد و لا لآ بس اعتقد فى الحدود دى و ممكن ازيد شوية صغيرة

فين ياباشا
ممكن عنواين وياتري يبيعلمو العيال حاجه ولا غاليه عالفاضي عشان في مكان راقي

**heshamzaky** · 12-10-2011 12:36 AM

لآ الحضانة مش بتعلم زى ما انت متخيل كدة
الغلو فى السعر علشان نظافة و مستوى الحضانة فية حضانات بها حمام سباحة صغير و شوبة العاب حلوة علشان كدة بتبقى غالية
بص فى ظهر مامورية ضرائب مدينة نصر الى فى شارع مكرم عبيد فية حضانة اسلامية و بيعلمو فيها قران بس مش عارف سعرها
و فية حضانات كتير جدا جدا جدا فى مدينة نصر باسعار معقولة نسبيا و فية حاجة اسمها استضافة يعنى بتدفع اليوم بيومة مش بالشهر
بص عارف شارع الطاقة الشارع الى فية النادى الاهلى فية كذا حضانة فى المنطقة دى اسال و اتفرج على الحضانات و فى عمارات الشروق فية حضانة سعرها معقول جدا جدا مش فاكر اسمها بس لو سالت حا تعرف توصل لها ممكن ابقى اجيبلك اسمها و تيلفونهم بكرة ان شاء الله

**shaddadfalcon1** · 12-10-2011 09:34 AM

يعني مفيش فرق بينها وبين الحضانه اللي كنت بدفع فيها 40 جنيه لانها برده كانت نظيفه وكانو بيتعملو اناشيد وبيدهم حساب وكان في العاب وحمامات بس مفيش سباحه

امري الي الله هبقي اشوف كده

متشكر ليكم جميعا

**medo_msmsa** · 12-10-2011 10:00 AM

في حضانة في عمارات التوفيق عند السوق على شارع الطيران مقابل وزارة الدفاع تقريبا لو شغلك قريب من هناك هتبقي كويسة ليك وما اظنش انها ب 400 والارقام دي

**ahmed2y** · 12-10-2011 12:54 PM

هسالك فى الموضوع دة لانى انا كمان داخل على الموضوع دة وساكن فى نفس المكان بتاعك

**CryptonX** · 12-10-2011 01:12 PM

الحضانات في مدينة نصر الي في اماكن رئيسية (قريبة من مكرم عبيد - عباس العقاد - الطيران) بتبقى غالية جدا ..
كنا بندور على وحدة لبنت اخت مراتي ... و كان في واحد نضيفة جدا جدا في شارع متفرع من كابول (مشهورة نسبيا) اسمها Sesame Street اعتقد او حاجة كدة .. بس كانت 950 جنيه تقريبا.

40 جنيه في الشهر بجد ؟؟؟؟

**shaddadfalcon1** · 12-10-2011 03:15 PM

المشاركة الأصلية كتبت بواسطة ahmed2y

هسالك فى الموضوع دة لانى انا كمان داخل على الموضوع دة وساكن فى نفس المكان بتاعك

يبقي جزاك الله كل خير

النهارده وانا نازل قدرا لقيت يفطه لحضانه في العماره اللي جنبي عايز ابقي اسال فيها وطالما كله مش بيعلم يبقي اهو مكان يلعب فيه وخلاص

اللي عايز اسال عليها الموضوع بتاع التنسيق لاني كنت بشوف في الأسكندريه عند نادي المعلمين في سموحه ناس كتيير قوي واقفه وزحمه غريبه عشان تنسيق رياض الأطفال وفي واحد زميلي كمان كان بيعمل الموضوع ده عشان تقريبا في مدارس معينه بتشترط ان الولد يبقي في حضانه وبتنسيق كمان

حد عنده فكره عن الموضوع ده؟

**shaddadfalcon1** · 12-10-2011 03:18 PM

المشاركة الأصلية كتبت بواسطة cryptonx

الحضانات في مدينة نصر الي في اماكن رئيسية (قريبة من مكرم عبيد - عباس العقاد - الطيران) بتبقى غالية جدا ..
كنا بندور على وحدة لبنت اخت مراتي ... و كان في واحد نضيفة جدا جدا في شارع متفرع من كابول (مشهورة نسبيا) اسمها sesame street اعتقد او حاجة كدة .. بس كانت 950 جنيه تقريبا.

40 جنيه في الشهر بجد ؟؟؟؟

انا شغلي في المنطقه الحره ومش عايز ابعد قوي عشان لو مقدرتش اروح اجيبه مامته تعرف

وبجد كاننت ب 40 جنيه ومكنتش بوجع دماغي يروح ولا لآ لانها في الأخر 40 جنيه لاني كنت كل شويه اروح اقعد عند اهلي بالشهر لكن مش هدفع 1000 جنيه عشان ميروحش وميتعلمش حاجه كمان في الأخر

الحضانه كانت مقسمه حسب العمر وكانو بيعلبو علي مراجيح ويطلعوهم بره واخر شهر راح كان بياخد واجب ونذاكرله كمان وكانو بيحفظوه اناشيد وحاجات حلوه

طبعا مش احسن حاجه بس مقابل 40 جنيه حلو قوي