الموضوع: ألحقونى يا رجالة مشكلة هتجننى

السلام عليكم ورحمة الله وبركاته

أنا واقع فى مشكله وعايز رجالة المنتدى بجد تفيدنى لانى حاسس انه بيتنصب عليا فى قطع الغيار .....انا فى شهر مارس اللى فات غيرت اسطوانه وديسك لعربيتى الريجاتا وكنت جايبهم بـــ 290 جنيه والراجل قعد يحلف لى انهم ايطالى وكان مكتوب على واحد منهم انه مصنوع فى ايطاليا والتانى اتحاد اوربى المهم انهم والحمد لله باظوا وروحت ولفيت على كذا ميكانيكى وكانوا يقولوا لى ده ديسك يا باشا ...اللى كان بيحصل معايا ان الغيارات كانت بتبقى زى الفل طول ما العربية بارده اول ما اقف فى اشارة او العربية تسخن شويه واكون ممور واجى اجيب الاول الغيار يزعق أمور تانى واجيب الاول براحه يجى من غير زعقه بس يكون بيعض وده كان فى الاول وبعدين بقى على طول بيزعق كل ما اجيب الاول او المارشيدير ....المهم روحت مغير الديسك والاسطوانه تانى من يومين بالظبط وغيرت الميكانيكى وروحت عند بتاع قطع غيار معروف عندى بالمنطقة وجبيت طقم تانى ووصيته انى عايز حاجه كويسه علشان اللى فاتوا ماكملوش 6 شهور وقالى مافيش احسن من الايطالى برده طلعوا هما هما نفس الغلاف الخارجى وقالى هما دول اللى فى السوق مش هتلاقى غيرهم ممكن يكون حظك قبل كده جه فى حاجه بايظة واحد فى المليون .... المهم دلوقتى ركبتهم وابتدى الديسك يعمل معايا زى اول مره بالظبط اول ما العربية تسخن يزعق اول مره امور واجيب الاول تانى براحه مايزعقش بس يعض عضه بسيطه كده مع ان والعربية بارده مافيش الكلام ده خالص والغيار بيبقى زى الفل ؟؟؟؟

أرجوكم يا جماعه ساعدونى بالله عليكم اروح اولع فى التاجر ولا اولع فى العربية ولا اعمل ايه ؟؟
مع انى عارف الميكانيكى لو روحت له هيعمل ايه هيعلى الدبرياج وهيقول جرب كده وشوف !!! وانا مش مقتنع بالحل ده لان العربية وهى بارده الغيار بيبقى كويس يعنى المشكله مش فى علو ولا وطى الدبرياج !!!! ولا أنا كلامى غلط ؟؟؟؟

مستنى افكاركم ومساعدتكم بجد أفيدونى بالله عليكم افادكم الله ورعاكم ..... واسف جدا للاطالة .

والسلام عليكم ورحمة الله وبركاته

المشاركة الأصلية كتبت بواسطة semsem kane

معلش ياباشا استفسار اكتر

دلوقتى لما الميكانيكى طلع الطقم اللى فى الفتيس حالتة عاملة ازاى ؟؟؟

هل الديسك ملسوع او فية عالى وواطى ؟؟

لان اعراض التلف اللى حضرتك بتقول عليها ليها اسباب اخرى بس لازم اعرف الاول شكل طقم الدبرياج حالتة عاملة ازاى

والله يا استاذ سمسم انا بجد مش عارف بس هحاول ابص عليه تانى واشوف زى ما حضرتك ما بتقول اذا كان فيه عالى وواطى ولا لاء او كان ملسوع ..... بس هو الميكانيكى لما طلعه قالى ده متاكل .