الموضوع: واحدة بتتعلم السواقة خبطتنى ورحت القسم

فى اخر الشهر اللى فات كنت فى عمان بحضر حاجة زى مؤتمر كده تبع الشغل .. و جيت الجمعة اللى هى 30 سبتمبر.

طبعا كنت سايب العربية فى الجراج .. فا رحت يوم السبت 1 اكتوبر غسلت العربية و أنا راجع فى شارع المحافظة فى الزقازيق .. ماشى على 30 كيلو كده و الاقى واحده راكنه قدام برج المعلمين و بتطلع بالعربية (كيا برايد سيدان) و العربية بتنتش بيها جامد و هى طالعه كده.

المهم أنا اديتها كلاكس و هديت كده .. و لا حياة لمن تنادى .. فى جزء من الثانية جمعت كام معلومة كده .. دى واحده ست .. طلعتها بالعربية طلعة واحده أول مره تسوق .. مبصتش فى المراية و هى طالعة .. موقفتش لما زمرت .. و فى جزء من الثانية .. دوست فرامل على الاخر .. لكن كنت قريب منها جدا .. فخبطتنى فى الرفرف و مشيت من قدام عربيتى و عدت الناحية التانية من الطريق (الحمد لله ان مكنش فى عربية الناحية التانية) و طلعت فوق الرصيف و طاااااااااااااخ .. رشقت فى السور.

طبعا الطريق وقف فى الاتجاهين .. وأنا ركنت وخدت الموبايل و المحفظة و قفلت العربية و نزلت .. بصيت على العربية لقيت الداير الفبر اتفك و الرفرف فيه خبطة بسيطة و الفانوس مكسور و شوية خرابيش فى الاكصدام.

ودى صورة الخبطة



رحت لها لقيت الناس ملمومة عليها .. بنت عندها 32 سنة .. شكلها مألوف الى حد ما .. و الناس عماله تقولها الحمد لله ان انت كويسة .. ومحدش خد باله ان انا اتخبطت خالص .. أنا قلت لها حضرتك خبطتى عربيتى .. انتى بتعرفى تسوقى؟

طبعا كانت متوترة و قالت لى اه بعرف .. قلت لها حضرتك معاكى رخصه .. قالت لى اه .. قلت لها طلعة حضرتك بالعربية بتقول انك مبتعرفيش تسوقى .. شوية و لقيتها بتقول ايه ده؟ ده انت اللى خابطنى .. و أنا كنت ماشية كويس .. و انت اللى طلعتنى فوق الرصيف.

شوية و لقيت اختها نزلت من العمارة .. و نفس الكلام .. قلت لها حضرتك انا هخبطها من الجنب .. أعديها الناحية التانية من الطريق و اطلعها فوق الرصيف .. واخليها تخبط فى السور؟ .. بصراحه استفزونى .. كلمت واحد صاحبى ضابط و قلت له .. فقال لى هبعت لك عربية نجده.

و كان فى عسكرى مرور .. جه و شاف اللى حصل .. و قالى لى هتعمل ايه .. قلت له أنا اتصلت بالشرطة و هتيجى دلوقتى .. فا سابنا و رجع وقف مكانه.

طبعا الناس بأه تقول لى يعنى انت هتقبل العوض؟ و دى بنت غلبانة .. أقول لهم يا جماعة .. أنا مبتكلمش عشان الفلوس .. دى مبتعرفش تسوق .. لو انت عندك ابن حرام انك تسيب واحده بتسوق بالطريقة دى .. فى ناس اقتنعت بالكلام .. و ناس أصلا مش فاهمه أنا بتكلم فى ايه و كل واحد يرمى كلمه و يمشى.

المهم جه واحد قريبها (جوز أختها) .. شخصية حسبى الله و نعم الوكيل .. تحس انه جزار .. لابس عباية بيت و علبة السجاير فى جيب العباية و شنب أد كده .. و عمال يزعق و يقول انت خبطت العربية .. أقول له حضرتك ازاى أنا خبطتها؟ .. دى كاسرة الطريق و طلعت فوق الرصيف و خبطت فى السور .. و مش عارفة توقف العربية .. الاقيه يحور فى الكلام و أمال يعنى هى طلعت لوحدها؟ و يشتم و يزعق .. قلت له بص .. حضرتك بتزعق ليه؟ ممكن تكلمنى زى ما بكلمك .. يقول لى أنا أتكلم براحتى .. و ياخى اتق الله .. ده انت بدقن .. سيب الكلام ده للكفرة اللى زينا ..قلت له ايه بس اللى دخل الدقن و ايه اللى انت بتقوله ده .. بص انا هقف جنب عربيتى لحد ما الشرطه تيجى.

صاحبى الضابط كلمنى .. قال لى العربية جاتلك؟ قلت له و فى واحد قريبها جه و عمال يوعق و بتاع .. قال لى بص يا كريم أنا هقول لك اللى هيحصل ..انتوا هتروحوا القسم و هتتحولوا على النيابة .. و هيتخلى سبيلكم .. والعربيات هتتحول على الفحص و فى الاخر مش هتاخد حاجه .. فلو عرفت تاخد منهم تلفياتك ودى يكون أحسن.

الكلام ده أنا عارفه طبعا .. لدرجة ان صاحبى ده ياما مسك بلطجية أيام الثورة و النابة أخلت سبيلهم مع انهم كانوا ضاربين أفراد شرطة كمان.

المهم البوكس جه .. الأمين سألنى و سأل جوز أختها .. طبعا كلامه دى كانت ماشيه و هو اللى خبطها .. و أنا قلت اللى حصل بالضبط و انها خبطتنى من الجنب و طلعت فوق الرصيف و خبطت فى السور .. مع انها كانت طالعه من ركنه .. يعنى أصلا متعرفش الفرامل فين .. و كلام و حوارات .. يعنى انت رافض الصلح؟ قلت له اه طبعا.

و قدام الناس كلها قلت لجوز أختها او ثبت ان انا اللى غلطان هصلح عربيتى و عربيتك و أديك 1000 جنية .. و لو ثبت ان هى اللى غلطانة تصلح لى عربيتى بس .. برضه يقعد يقول ماهو باين ان انت اللى غلطان .. أقول له خلاص يا سيدى انت زعلان ليه .. هنروح القسم و لو ثبت كده هصلح عربيتى و عربيتك و أديك 1000 جنية .. و الناس تقول له طيب انت زعلان ليه و هو يحور فى الكلام.

شويه و أخوها جه .. كان مسافر دمياط و جابوه على ملى وشه .. وخدنى على جنب وقال لى ايه اللى حصل .. حكيت له اللى حصل .. هو مؤدب .. بس برضه بيحور فى الكلام و يقول لى بس الناس بتقول انت اللى غلطان .. قلت له نفس الكلام تانى .. نروح القسم و لو الشرطة أثبتت ان انا اللى غلطان .. هصلح العربيتين و أديك 1000 جنية .. و لو أختك اللى غلطانة .. تصلح لى عربيتى بس .. يقول لى انت مش عايش هنا ولا ايه .. مفيش شرطة ولا بتاع .. قلت له امال احنا واقفين بنعمل ايه .. يقول لى طيب أنا مش عاوز أختى تروح القسم و انت عاجبك العطلة دى .. أقول له أخت حضرتك هى السبب فى عطلتى و عطلتك و تلف عربيتى و عربيتك.

وبعديت قلت له أنا مكنش عندى مشكلة من الأول انى أتنازل .. بس انتوا مش راضيين تعترفوا انكم غلطانين .. ثانيا .. جوز أخت حضرتك ده اللى قعد يزعق و يشتم .. قام رايح له و قال له يا محمود .. اسلوبك ده مش هينفع معاه .. و مش هتقدر تستفزه و تغلطه .. فاقعد ساكت أحسن.

الأمين جه و قال .. ها هتروحوا القسم ولا لأ .. قلت له هنروح طبعا .. قالى بس حضرتك عشان تكون عارف .. لو رحت القسم و اتعمل محضر خلاص مفيش رجوع .. و هتتعرضوا على النيابة .. والعربيات هتتحجز على ما تتفحص .. و المهندس ممكن ييجى بعدها بتلات أيام .. قلت له عارف و فى الفترة دى عربيتى هتركن و هيتسرق منها الكاوتش و الجنوط و الكاسيت .. قال لى و مش فارقه معاك؟ قلت لأ .. قام أخوها قال لى تصدق انك مستفز فعلا .. و عملنا المحضر فعلا.


المهم رحنا القسم .. نفس الكلام و نفس الكذب قدام الضابط .. وأنا أقول للضابط .. أنا ماشى فى حارتى و رابط حزامى .. و جوز أختها يقول لى أصلك كنت مشغول مع الناس اللى كانوا معاك فى العربية .. أقول له مكنش معايا حد فى العربية .. يقول لى لأ .. كان فى واحده معاك فى العربية و صوتت لما اتخبطت .. أقول له و راحت فين دى؟ .. يقول لى نزلت و جريت .. حسبى الله و نعم الوكيل .. عاوز يخوفنى يعنى عشان معملش لنفسى مشاكل.

المهم أخوها بيقول لى و هو ماله أصلا ان كان معاك حد ولا لأ .. و قالى لى تصدق .. محمود ده بيستفزنى أنا شخصيا.

فى الاخر الضابط قعد يهدى الموضوع .. ويقول انتوا الاتنين شكلكوا محترم و انت فى ناس محترمين متكلمين عليك .. و هى برضه فى ناس متكلمين عليها .. و انتوا مش وش بهدله .. قالى انت تلفياتك بكام تقريبا .. قلت له ب 1000 جنية (الفانوس ب 800 جنية) قال لأخوها وانت .. قاله 3000 جنبية .. فبصيت له كده .. قلت له مانا ممكن أقول 10 الاف جنيه .. قال لى أصل العربية اتخبطت من تحت و بتاع.

المهم وافقت على التنازل .. وأنا ماشى بقول لها .. بغض النظر عن المحضر و كده .. حضرتك حاولى تتدربى على العربية شوية .. عشان المرة ده جت فى عربية .. ممكن تيجى فى طفل بعد كده .. قالت لى ما تيجى تعلمنى أحسن! .. و أخوها قال لى .. علىفكرة بسبب الموضوع ده العربية دى هتتسحب منها .. واضح طبعا انها لسه بتتعلم.

و الحمد لله على كل شىء .. و قدر الله و ما شاء فعل.