العربيه بتنتش نتشه غريبه

**ahmed_bq** · 20-10-2011 11:54 AM

العربيه اوتوماتيك 1600 موديل 2008 .. امبارح بالليل لقيتها بتنتش نتشه غريبه كده اول مره تحصلها وخصوصا على السرعات البطيئه .. والسحب مبقاش زي الاول .. ولما بمشي بيها شويه بتتظبط لواحدها مش عارف ليه بردو

وحاسس مجرد احساس مش اكيد ان صوت الموتور بقى عالي شويه عن الاول .. اعمل ايه؟

انا لسه مغير فلاتر وبوجيهات وفلتر زيت وبنزين وهوا وزيت موتور وفتيس من اسبوع كده ... والعربية كانت ماشاء الله تحفه مش عارف ايه اللي جرا

**mohammedabdallh** · 20-10-2011 12:13 PM

ممكن كدا يكون عيب بنزين يكون مخلوط واليومين دول مفيش بنزين اصلا
او الفلتر بس حضرتك بتقول انك لسه مغيره

**mohammedabdallh** · 20-10-2011 12:55 PM

طبعا لو البنزين مغشوش بيعمل اكتر من كدا ويسلام بقه لو مغشوش بسولا بتبقى مصيبه
على فكره انا ساعات ببقى داخل افول 92 الراجل الى على البنزينه يقول لا حط 80
بلاقيه كويس جدا مفيش فرق بمعنى ان كل البنزين بيتغش والدليل على كدا ساعات امون 80 للمتوسيكل بتاعى الاقى البنزين مرة لونه احمر ومره مسود شويه ومره ابيض والصح انه يكون ابيض
ربنا يسترها معانا من الغش

**mohammedabdallh** · 20-10-2011 02:12 PM

المشاركة الأصلية كتبت بواسطة ahmed_bq

معاك حق الغش بقى للركب :)
انا زوغت من الشغل وخطفت رجلي على الميكانيكي .. فتح وبص وشد مرتين تلاته كده بنزين وقالي دي وساخة بنزين مش اكتر .... قاللي كبر دماغك ولو مش عايز تكبرها هات منظف دورة البنزين والرشاشات اللي بيتحط في التنك ده رغم انه هوا نفسه مش مقتنع بيه

كويس انك عرفت المشكله فين
وعلشان تعرف الغش بيوصل لايه
انت بتحط بنزين 92 ومع ذلك مغشوش