:Y_hi_3[1]: :8941[1]: :satelite:
عرض للطباعة
الأسوأ عندى من خلع الحجاب اللى بحجابها وبتدى وصلة رقص بلدى بتقسيم مش فهمة ايه فليدة الحجاب اللى على راسها !! والموضة الآن فى المنصورة احضار راقصات للأفراح انا مش مصدقة ان حد عنده استعداد يشيل ذنوب كل المعازيم بالشكل ده لأ وذنوب اللى هيقلدوه كمان لأن اللى بيبتدى حاجة ناس هبلة بتخاف تبقى اقل منه وبتقلده
معلش فلى كلامم واقف فى زورى سامحونى عشان مشرقش
1=بطلوا نغمة بهدلته لما جابلها وعملها لأن مش مشكلتها ابدا ان سيادتك حالتك المادية ضعيفة ومتقدرش تجيب شقة ولو طلباتها كتير من وجهة نظرك ما تشوف غيرها على قدك مش انتو برضه اللى بتقولوا سيبها تعنس وجنب امها تونس والكلام المستفز ده
حضرتك الجواز فى الأسلام بيشترط قدرة مادية معينة انت بقى كافحت عشان تحققها متتجباش عالبنية دى مش مشكلتها خالص
2= انتو دايما تعيبوا عالبنات انهم مش بيضحوا طب وانتو بقى بتضحوا بايه لفوا كده فى مواضيعكو عالمنتدى هنا اللى انتو كاتبينها بايديكو وشوفوا ولما البنت تعرف ان اللى قدامها مش هيضحى باى حاجة لو شكلها اتغير او لو عيت او او تضحى ليه
المواضيع هنا واحد لقى واحدة من عيلة وجميلة واخلاق ومؤهل وثقافة وكل حاجة فيها مناسبة
وايه المشكلة اصل جمالها مش خارق لأ فعلا بتضحوا
واحد هنا كان بيسألكو عنده 32 ومتقدم لواحدة 30 هجوم ارض جو ازاى فرق السن سنتين بس امال هى تتجوز واحد عنده كام سنة يعنى امال لو واحدة اكبر ولسه صاحبتى متجوزة واحد اصغر منها ب 5 سنين راجل بجد ومهموش حد الأفكار دى عندكو هنا بس
لما واحد هنا عالمنتدى اجيب له عروسة 24 سنة وهو اكبر منها ب 3 سنين ومواصفاتها ممتازة يقوللى ايه اللى مقعدها لغاية دلوقتى من غير جواز لأ فعلا بتضحوا ونسيتوا ان الرسول قدوتكوا اتجوز واحدة اكبر منه ومش بقولكوا اعملوا كده على فكرة
بس انتو كمان مش بتتنازلوا عن حاجة فى المواصفات خالص انا ليا صاحبتى الأنتيم اتجوزت راجل بجد عارفين انا شايفاه راجل ليه لأن عندها بتر فى دراعها انتو مش بتبصوا للحاجات دى اصلا مع ان طول مانتو ماشيين فى الحياة هتلاقوا ست جنب جوزها المشلول او اللى من غير رجلين او اللى مبيخلفش ومبتحسسوش ان عنده اى مشكلة لكن هنا اصل جمالها مش خارق اصل الفرق بيننا سنتين بس كلام عجييييييييييييييب
لكن ان رجل يقف جنب مراته فقدت جمالها ولا صحتها حاجة نادرة جدا ولا يرضى يتجوز مطلقة او ارملة حتى لو هو نفسه سبق له الزواج لأ لازم بنت بنوت عشان يكيد الأولانية ويثبتلها انه جاب احسن منها
كل واحدة عارفة انها يوم ما تفقد جمالها او تطلع مبتخلفش او صحتها تروح 99% هتترمى فى الزبالة وجوزها هيشوف غيرها هى عارفة ده كويس
انا واحدة اعرفها جوزها كان عنده مشكلة كبيرة فى الخلفة استحملته 6 سنين وبعدين الدكتور مع العلاج عمل محاولة اتسبب انه فجر لها قناة فالوب وده قلل فرصة انجابها هى بنسبة النص وشوية وجوزها خف خالص اول حاجة عملها مستناش سنة واحدة من ال 6 سنين اتجوز فى السر عشان يخلف مع ان هى هتخلف عادى واتطلقت منه بعد كده وخلفت وعلى فكرة قبل ما تهجموا عليها متطلقتش عشان اتجوز وخدعها وكل ده لأ عشان لما اكتشفت انه اتجوز هى كانت معيشاه فى شقتها ببلاش فقالت من العدل انه يدفع لها ايجار للشقة زى التانية فرفض وقال لها بنتى اولى بكل قرش
ومن المواقف دى كتير لما البنات تسمع ده مفروض تقبل عالتضحية فعلا بنفس مفتوحة
وعلى فكرة البنات فعلا بتضحى لأن شرعا المهر ليها ومش مفروض تجيب عفش خالص بس هى بتساعدك وبتجيب واحيانا اكتر منك
ففكرة التضحية عندكو بتتمحور حول توفير مسكن الزوجية والعفش والشبكة اللى هنعتبرها المهر اللى ربنا امر بيه!!!!!!!!!!!!!!!!!!! ودى حقوقها لو شايفها بتبالغ شوف غيرها بتطلب طلبات اقل محدش ضربك على ايدك
لكن سيادتك اتبهدلت فى دول الخليج عشان تجيب شقة تمليك باسمك ده لنفسك متخنقناش بقى
مش ذنبنا ان بابا مكانش غنى ومبناش ليك :)
فكرتوني باللذي مضي
ياااااااااااااااه يا ازميرالدا
دة انتي معبية اوي
بس انتي عندك حق في حاجات كتير
بس الموضوع نسبي
زي ما في بنات مفترية هيا واهاليها
في رجالة مفترية هيا واهاليها
مش هنتكلم في الشكليات الفرح والشبكة والمهر والفستان والكلام دة كله
هنتكلم في الاساسيات
في رجالة بتبقى شايفة انه كفاية عليهم انهم جابوا الشقة
وان العروسة دي يا بختها يا هناها انه رضي يتجوزها
عاوز العروسة تجيب كل حاجة وكمان ما يكتبلهاش قايمة
القايمة دي مش فرض
بس هيا عرف سائد بيضمن للبنت حقها ولو انها بتكون سبب خلاف وبتبوظ زيجات كتير
وبردو بيبخس حقها في المؤخر
مع ان الزوجة لو كرهت جوزها بعد ما بهدلها
بتقول يغور هوا وحاجته
انا اعرف واحدة اتقدملها واحد وكانت بتحبه لمدة 7 سنين
اهله شرطو انهم يكتبوا في عقد الجواز زي ما هيكتب لها مؤخر يكتب مقدم
عشان لو رفعت عليه خلع يضمن حقه
فكرة جهنمية ما تخطرش على بال حد
هو الموضوع أبسط من كده
اللي يتعامل يعامل ربنا سبحانه وتعالى
فيه علاقتين ما ينفعش فيهم التعامل بالمثل
علاقة الآباء والأبناء
وعلاقة الزوج والزوجة
العلاقتين دول فيهما العطاء بلا حدود وبلا مثليه
لو واحد أبوه عامله وحش هل يعاملة وحش ؟؟؟ أكيد لا طبعا
وكذلك لو الرجل او المرأة حد فيهم محتاج مساعدة لازم التاني يقف معاه مش بيفكر في المستقبل هل لو وقفت نفس الموقف هيعمل في كده ولا لأ ؟؟
يعمل اللي عليه ويسيبها على الله وربنا لا يفسد عمل المصلحين ولا يضيع أجر من أحسن عملا
البر لا يبلى والذنب لا ينسى والديان لا يموت
بعدين فيه أمثلة سيئة لأزواج وزوجات فيهم كل الندالة اللي خلقها ربنا
وفيه العكس
أنا أعرف إتنين هنا
واحد مصري زوجته اكتشفوا أن رحمها مش كامل ورغم ذلك رفض تماااااما إنه يتزوج عليها والراجل بنتعامل معاه قمة في الكرم والجود وواضح إنه رضى بقضاء الله ولا يذكر الموضوع نهاااائيا رغم كبر سنه
والثاني سوداني ربنا رزقه ببنت وماتت بعد الولادة مباشرة
وحاولوا يجيبوا ذرية تاني ربنا ما أرادش وزوجته كبرت وأصبحت عمليات أطفال الأنابيب والحاجات التانية غير مجدية معاها وأهله حاولوا يفاتحوه في الزواج مرة أخرى منعهم من التحدث في الأمر مرة أخرى نهاااائيا
موضوع السن فده شئ مهم جدا وفيه واحد ما يقدرش يتعايش مع واحدة أكبر منه أو قريبة منه في السن وممكن الزواج يكون فاشل
ولو رتبنا عوامل نجاح الزواج هنلاقي إن المادة آخر عامل فيهم والمرأة في إيدها تتغاضى ولو مؤقتا عن أمور مادية كثيرة
وده هيكون في مصلحتها أيضا لأن زي ما الرجل نفسه يتجوز فالمرأة نفسها تبقى عروسة وتفرح زي غيرها ( طبعا هتفرحلها يومين وبعد كده هيطلع على عنيها ههههههه )
الست المفروض تكون مهتمية بمظهرها ورشاقتها لأن المغريات كتيرة والشاب أو الرجل غصب عنه بيشاهد مناظر بتضغط على أعصابه
وقالوا مليون مرة إن طبيعة الرجل غير طبيعة المرأة وربنا بيعلمنا إنه ليس الذكر كالأنثى فمستحيل نفكر بعقلية المساواه ولكن المفروض نفكر بالعدل
المطلوب إن المرأة لو أعجبت ووافقت على الزواج من رجل إنها لا تكلفه أكثر مما يطيق وتحاول تكون البلسم اللي يخفف آلامه والدواء اللي يقلل مخاوفه من المستقبل
طبعا مش مطلوب منها ترضى بإمكانياته لو مش مناسبه لها لكن لو وافقت عليه وهي عارفه إمكانياته يبقى ما تضغطش عليه بقى - والشئ الطبيعي إن الشاب امكانياته مش هتبقى زي والدها حاليا لكن هتبقى زي إمكانيات والدها نسبيا لما اتقدم لمامتها
والعقل بقولنا ان الماديات بتيجي بعدين ويكفيها إنه يكون قد المسئولية ويعمل اللي عليه ويجتهد قدر الإمكان في العمل والسعي للرزق
والراجل لو أعجب فأكيد مش هيطلب منها إنها تغير وشها لكن كل اللي هيطلبه منها إنها بردو تجتهد وتهتم ببيتها وبنفسها وبأولادها وبرشاقتها وجمالها
وأكييييييييييد لا قدر الله لو أصيبت بمكروه نسبة 99% هيصبر عليها ويمكن نسبة 80% مش هيتجوز عليها ولو في السر
أنا عن نفسي صعب علي إني أتجوز على مراتي واحدة أحلى منها لكن لو فكرت اكيد هأتجوز واحدة مناسبه لها وهيبقى هدفي إني محتاج زوجة تانية مش جايب مربية لزوجتي الأولانية لأني فشلت في إقامة حياة صحية معها
وصعب علي جدا إني اتجوز علشان مراتي أصابها مكروه لا قدر الله - لكن فيه ناس تاني ما تتحملش وهتضطر تتجوز وده مش حرام
زي لو زوج قدر ربنا وأصيب بمرض منعه من إعطاء زوجته حقها الشرعي نهائي وللأبد في هذا الظرف هل نقول للزوجة وجب عليك أن تصبري - أكيد لا لأن ربنا اللي خلقنا اداها الحق في أن تطلق منه وتعيش مع زوج آخر يوفي لها إحتياجاتها ومش هيبقى عليها لا لوم ولا ذنب وبالعكس لو الرجل عاقل هيطلقها
وأنا أعرف رجالة اكتشفوا إنهم لا يستطيعون الخلفة وحاولت زوجاتهم البقاء معهم فرفضوا علشان ما يحرمش زوجته من تلبية غريزة الأمومة
الزواج والعشرة محتاج الراجل او الست يقدر التاني ويقدر ظروفه ويقيم شريكه في الحياه هل عامل اللي عليه تقريبا ولا مهمل في واجباته
لو عامل اللي عليه يبقى لا غبار في ذلك ولا لوم
وكل واحد يجط نفسه مكان الآخر ويحاول يحس بيه وهنلاقي الحياة فلة شمعة مولعة
على فكرة يا أختي الكريمة أنا قريت لك مشاركات كثيرة سابقة كلها تدور حول فكرة إن الي ما معهوش ما يلزموش ولا يدورله على واحدة تناسب إمكانياته
ودي فكرة في رأيي تتعارض نوعا ما مع ما يدعوا إليه الإسلام من التخفيف من المهور
فالدين لم يطلب من الرجل أن يقبل بإمرأة لا يقتنع بمواصفاتها ولم يعجب بشكلها وكذلك لم يطلب من المرأة أن توافق على زوج لا تتقبل شكله أو أسلوبه ولكنه أمر المرأة أن تقلل من طموحاتها المادية طالما أن نظرتها للمستقبل فيها أمل إن الشخص ده إن شاء الله مسئول وهيعمل اللي عليه
وكل سنة وانتوا بخير عيد الأضحى قرب ومحتاجين نشتري خروف العيد لو حد فيكم يعرف الكيلو بكام يبقى مشكووووووووور
.
اخو زوج اختي عدي الأربعين ومش بيخلف مع اني الدكتور قاله انك لو اتجوزت واحد تانيه ممكن تخلف ولو مراتك اتجوزت واحد تاني ممكن تخلف لكن انتو الأتنين مع بعض لا ومع ذلك رفضو يتجوز او يسيبو بعض
عمتي اتجوزت من 17 سنه ومخلفتش وجوزها داخ بيها وفي الأخر اتجوز واحد تانيه وفضلت عمتي عايشه معاهم في نفس البيت بمنتهي الأحترام مابينهم ومراته الجديده خلفت وسبحان الله بعد 17 سنه عمتي دلوقتي حامل