لكل من يشكك في تسارع الانسر .... !! هل من مبارز ؟؟؟

**Ahmod** · 25-10-2011 01:43 AM

المشاركة الأصلية كتبت بواسطة dawns_mist

هاها .. عيوني يا أبو حميد ..
هدورلك على الفيديو القديم بتاعي .. أو هصورلك واحد جديد الأسبوع ده
ولا تزعل نفسك ..
بس والله انت لو جبتلي و من على النت أي فيديو عمري ما هقولك لأ ..
حتى الفيديو بتاعك اللي انت جيبتهولي و قولتلك دي 1500 مش 1300 حقيته و قولتلك تمام و موثوق و حقها ..
حتى الأوبترا اللي أنا عمري ما كسرت بيها 13 ثانية مع إني سوقتها كتير جدا .. لما واحد بيقولي 10 ثواني و اوتو كمان .. ماقولتش لأ ..
فانت ليه مش بتتقبل الفيديوهات بروح رياضيه ؟؟
و عموما والله علشان خاطرك ولو إني مش بيكون عندي وقت أطلع مخصوص و معايا واحد صاحبي يصور و الحركات دي .. بس هتصرف و اصورلك فيديو 9 ثواني إن شاء الله بكره او بعده .. خلال الأسبوع ده يعني إن شاء الله ..
و الهدف من الموضوع مش إننا نقيس عربياتنا و نقارنها ببعض .. إحنا بنقارن موديل بموديل .. و بناخد أفضل حاجة يعرف يعملها الموديل ده في أحسن ظروفه ..
يعني حتى لو عربيتي جابتهم في 25 ثانية .. هنفضل مع بعض مقتنعيين و مسلميين بتسارع البومه ..
و آخر فيديوهين أنا نزلتهم في آخر مشاركة بتوع 2 عرب على فكره اصحابنا ..

انا مش بشكك في كلام حضرتك على فكرة ابدا

بس انا مش بقبل او مش باخد بكلام فيديوهات اليو تيوب لسبب بسيط

ماينفعش اقارن عربية هنا في مصر بعربية برة مصر واقول اهي برة جايبة من 0-100 في 10 ثواني يبقى انا هنا عربيتي تجيب زيهم عشان نفس الماتور ونفس العربية

صحيح انه نفس الماتور ونفس العربية بس ماينفعش ابدا عربية في مصر بتستخدم بنزين مغشوش وقطع غيار مضروبة والمكنة متبهدلة والعربية مش بعيد يكون بقالها معاك مش اقل من 5 سنين وبتحطلها زيت مضروب وطرق المحروسة الجميلة مبوظة العفشة على الاخر

وتيجي تقارنها بتسارع عربية تانية بيتحطلها بنزين محترم وقطع غيار اصلية ومحترمة بيتعملها صيانتها في المعاد وزيوت وفلاتر على اعلى مستوى وطرق زي الفل وتلاقي العربية مابقالهاش اكتر من سنتين لانها لو قعدت اكتر من كدة بتترمي وبيشترو غيرها مالعربيات هناك برخص التراب

فالمقارنة من خلال فيديوهات اليو تيوب اللى متصورة برة مصر هتبقى صعبة وكل واحد هيقعد يدور على فيديوهات لعربيته جابت افضل تسارع وكل ماكانت العربية منتشرة اكتر كل ماكانت الفيديوهات اكتر والتعديلات اكتر

خاصا اننا كلامنا كله على فئة العربيات ال 1600 اللى منتشرة في مصر

عشان كدة بصراحة مش بعترف بالفيديوهات بتاعة برة لاني عارف ان العربيات هناك بتجيب ارقام غربية ممكن مانقدرش نوصلها هنا

**Hosam_Optrawy** · 25-10-2011 01:57 PM

المشاركة الأصلية كتبت بواسطة dawns_mist

بصراحه حاجة روعة .. أنا أول مرة أشوف أوبترا أوتو تعمل كده ..
انت متأكد إن دي أوتو ..؟؟
أنا سوقت الأوبترا كتير جدا جدا .. المانيوال سحبه حلو . لكن الأوتو كان سيء جدا جدا جدا جدا جدا جداااا .. أسوأ من الصيني والله ... يمكن أنا بقى اللي وقعت على عربيات وحشه ولا حاجة .. وبعدين أنا دورت على الأوبترا على النت عمري ما لاقيت حد بيكسر 11 ثانية أيا كان أوتو أو مانيوال .. !!!
عموما .. فيديو جميل .. و شغل ممتاز .. و باين عليها عربية حالتها فوق الوصف يعني ..

ايوه ياباشا متأكد انها اوتو واعتقد ال d باينه فى التابلوه , دى عربيتى على فكره

ودا الطبيعى بتاعها مش معدل فيها

حالة العربيه وقت الفيديو عامله 19 الف كم وشويه ومتغيرش فيها حاجه غير زيت وفلتر عند 5 الاف و 15 الف

المشاركة الأصلية كتبت بواسطة ahmod

بسم الله ماشاء الله اول مرة اعرف ان الاوبترا كدة

والله كنت فاكرها بطة

انا على كدة لازم اعملها مليون حساب لو فكرت اجري معاها

بس دي عربية حضرتك ؟ ولا فيديو من اليو تيوب ؟ ؟

ايوه ياباشا عربيتى

**Hosam_Optrawy** · 25-10-2011 08:57 PM

المشاركة الأصلية كتبت بواسطة dawns_mist

يا أوبتراتك يا عم حسام ... ماشي يا سيدي .. ربنا يباركلك فيها و يكفيك شرها و شر الطريق ..
بس الأوبترا لما سوقتها حسيت وزنها خفيف أوي .. صاحبها هو واحد صاحبي أوي أوي .. و كان بيشد فيها في يوم معايا كده بس بهزار يعني .. عماااااال يلبس في المطبات لإنه مش بيلحق يفرمل .. مع إنه حافظ الطريق .. بس قبل كل مطب .. عربيتي تقف بكل احترام و هدوء مع إني بكون شادد .. و عربيته تقعد تزحف كتير و برضه يلبس المطب .. و هكذا و هكذا ..
سوقتها منه علشان أشوف العيب فين .. لاقيتها فعلا خفيفة أوي أوي ..و تخوف أعتقد في الملفات ..
ولا انت إيه رأيك ...
انت باين عليك متمرس أوي في الأوبترا ..
عايز آخد منك رأي خبير في فرامل و وزن الأوبترا .. و إحساسك في الملفات على السرعات العالية ..

ربنا يخليك يامعلم

الاوبترا وزنها حوالى 1200 كيلو يعنى متوسطه ولا خفيفه ولا تقيله , اعتقد وزنها زى اللانسر تقريبا

بخصوص الفرامل فهى من وجهة نظرى كويسه جدا مع ان فى غيرى بيشتكى منها

بس انا شايف ان دا بيرجع لتقدير المسافه قبل الفرمله وطريقة الضغط على الفرامل , انا مش من النوع اللى بيكبس ويرزع رجله على الفرامل بادوس بالتدريج والحمد لله الفرامل اسعفتنى كتير وفى موقفين شبه بعض حصلولى واحد على الدائرى والتانى على اسكندريه الصحراوى

الاول كنت ماشى حوالى 140 او 150 مش فاكر بالظبط فى الحاره الشمال وتريلا ماشيه فى النص وفجأه وبدون مقدمات حدفت عليا بعد ما كنت خلاص هاعدى طبعا فرملت جامد وقولت بس العربيه هاتزحف منى او هاتحدف يا على التريلا يا على الحاجز الخرسانى بس الحمد لله هديت لحد سرعة 60 او 70 تقريبا وانا فى نفس الحاره ربنا ستر

التانى تقريبا نفس الموقف والسرعه وبرضه تريلا فى الظلام الحالك قرر يتنقل من الحاره اليمين للحاره الشمال يعنى قطع الطريق بالعرض عشان ياخد يوترن وماشى 20 كم مثلا وانا برضه فوق ال 100 وربنا ستر

بس بشكل عام فرامل اللانسر ماشاء الله احسن واقوى من الاوبترا

بخصوص الثبات فى الملفات فهو معقول وبتفرق برضه حسب الملف يعنى لو مش ملف حاد اوى ممكن لحد 120 , مع مراعاة ان الاوبترا لحد موديل 2010 بتنزل بجنوط 14 وكاوتش 185/65 ومن 2011 بقت جنوط 15 وكاوتش 195/55 فالثبات بقى احسن

واسف على الاطاله

**Hosam_Optrawy** · 25-10-2011 09:48 PM

المشاركة الأصلية كتبت بواسطة dawns_mist

لا يا باشا .. انت ماطلوتش ولا حاجة .. ده أنا عايز أسمع منك شرح مفصل .. لإنك أكتر واحد أنا شوفته فاهم و حافظ الأوبترا كويس كده ..
لإن كل اصحابي ماحدش عرف يجيب بيها الرقم القياسي ده في التسارع ..و كمان انت بتقول إنك حافظ فراملها .. و فيه ناس كتير برضه بتشتكي كتير من الفرامل .. و برضه بيشتكوا من إنهم بيحسوا إنها خفيفة و بيخافوا منها في الملفات على السرعات العالية ..
هو فعلا كل واحد و ليه ميكانيزمه مع عربيته بيعرف أزاي يخليها تعمل اللي هو عايزه .. و باين إنك فاهم عربيتك كويس ..
عموما شكرا على الشرح و المعلومات يا باشا .. و ألف شكر على المشاركات الحلوة في موضوعنا ده ..

العفو وسعدت بالمشاركه معاك

**nice_bird** · 26-10-2011 10:40 PM

احلي حاجة في الانسر خاصة ال 1600 الاوتو الفتيس ال cvt ان الفتيس مفيهوش غيارت وبالتالي بيدي تسارع فظيع في اقل وقت ممكن انا شديت بعربيتي مع عربيات كتير هيا كيك داون واحدة وبلاقي الناس في المرايا وبكون انا وصلت 140 في 13-15 ثانية وطبعا مع الاخد في الاعتبار ان العربيات المانيوال فرق التسارع بيتوقف علي اللي سايق نفسة يعني في ناس بتجمع ب 128 لحد 140 وناس مبيعرفش تجمع نفس السرعة باللانوس لكن الاوتو لو نفس الحالة العربية الاشد تكسب

**Dawns_Mist** · 27-10-2011 01:51 AM

المشاركة الأصلية كتبت بواسطة bebo_mody_244

الشارك يكسب معنديش كلام تانى ههههههههههههههههه

والله يا باشا القرش دي إسم على مسمى فعلا .. بجد عربية محترمة جدا ، و تنافس مع الأوروبي كمان ..

المشاركة الأصلية كتبت بواسطة nice_bird

احلي حاجة في الانسر خاصة ال 1600 الاوتو الفتيس ال cvt ان الفتيس مفيهوش غيارت وبالتالي بيدي تسارع فظيع في اقل وقت ممكن انا شديت بعربيتي مع عربيات كتير هيا كيك داون واحدة وبلاقي الناس في المرايا وبكون انا وصلت 140 في 13-15 ثانية وطبعا مع الاخد في الاعتبار ان العربيات المانيوال فرق التسارع بيتوقف علي اللي سايق نفسة يعني في ناس بتجمع ب 128 لحد 140 وناس مبيعرفش تجمع نفس السرعة باللانوس لكن الاوتو لو نفس الحالة العربية الاشد تكسب

أخيرا حبايبي اللانسراويه بيأزروني في محنتي ..
فينك من زمان يا عم الحاج ..
الناس بتوع التويوتا ، و المازدا ، و كيا ، حتى الشيفروليه خلاص هياكلوا وشي ..
أخيرا لاقيت حد معايا في صفي ..
الحمد لله ..
فيتيس البومه cvt هو في رأيي أكتر شيء مميز فيها و متطور فعلا ..
و بصراحه تسارع البومه هو العامل الوحيد اللي البومه فيه تاخد فعلا 10 من 10 .. لإنها مثلا في الثبات لو اتقارنت بالمازدا و الهوندا هتاخد راتينج أقل شوية .. ولو اتقارنت في الراحة الداخلية مع الإلنترا أو الكروز برضه هتاخد ريتينج أقل .. و هكذا ..
فتسارع البومه بصراحه مستواه فعلا عالي جدا جدا .. و بينافس كل العربيات .. حتى لو فيه عربيات بتعديها أكيد هتكون بتعديها بصعوبة فعلا ..
طبعا كلامي كله مقتصر على فئة الـ 1600 الأوتو ...

عموما يا باشا .. شرفت الموضوع .. و نورت .. و ماتنسانيش بقى هنا لوحدي تاني لحسن أنا خايف آكل ضرب تاني أكتر من اللي أنا خدته ..

الموضوع: لكل من يشكك في تسارع الانسر .... !! هل من مبارز ؟؟؟

LinkBack

أدوات الموضوع

عرض

-

-

-

-

-

المواضيع المتشابهه

لكل من يشكك فى امان ومتانة الفورد

تسارع موتور الانسر ارجو دخول خبراء الانسر

شفوا ابراهيم عيسي وفجوره يشكك في البخاري

مقارنه بين تسارع الانسر والفيرنا

الكلمات الدلالية لهذا الموضوع

المفضلات

المفضلات

ضوابط المشاركة