اولا السلام عليكم
ثانيا الحمدلله على كل اللى يجيبه ربنا
ثالثا نخش فى الموضوع

من كام يوم حسيت ان الفرده الشمال مش مظبوطة والعربية بتحدف شمال بشكل مش ملحوظ رحت ظبط نيتروجين كالعاده وتمام بس بردو حاسس بحاجة مش تمام‘‘‘‘المهم
امبارح بقى وانا رايح شغلى الساعة ستة ونص صباحا وفى طريقى من الشيخ زايد لشغلى وقبل الهايبر بشوية كنت ماشى على 160 وده العادى اللى متعود عليه وماشى تمام مفيش اى مشكلة وهديت عشان كلت كام غرزة وتقريبا وقتها كنت ماشى على 100 او 110 وقدامى عربية نص نقل فاخدت شمالها عادى بدرجتين شمال وحصلت المفجأة اللى اول مره تحصلى فى حياتى العربية لقيتها حدفت بطريقة مريبة شمال مع انى من النوع اللى بيسطر على الدركسيون كويس وعدلت يمين بدرجة خفيفة وافتكرت ان خلاص اتعدلت الغريب لقيتها حدفت يمين اوى لدرجة قريبة جدا من فقدان السيطرة رحت عادل شمال وهنا بقى كان الحدث انا ماعرفش ايه اللى حصل بالظبط بس حدفت شمال بزاوية حاده وهنا فقدت السيطرة تماما حسيت وانا بخبط فى الرصيف اللى فى نص الطريقين وحسيت انها بتتقلب واتشاهدت وغمضت عينى وسامع تكسير وحاجات بتنكسر بس واعى لكل اللى بيحصل لحد مالعربية وقفت الناس طبعا جريت عليا ونزلونى شفت المنظر بقى بعد مانزلت منظر مفيش اغرب من كده انا على نفس الطريق اللى كنت ماشى عليه بس اولا بقيت ادام الهايبر بالظبط بس من الناحية التانية وانت متجه للصحراوى مع انها وهى بتحدف كان فاضل على الهايبر شوية ثانيا العربية لقتها واقفة فى نص الطريق معدولة بس عكس العربيات ما ماشية ازاى مش عارف بسأل الناس ايه اللى حصل وكانت الصدمة قالولى انت اتقلبت اربع مرات هو انت كنت نايم وانا عمرى مابنعس حتى وانا سايق قلتلهم لا بس العربية حدفت اللى لمحته فى اللحظات دى ان العربية كل ازازها ومرايتها اتكسروا والسقف تقريبا مش نافع وشفت الكاوتشين اللى نحيتى على الجنط وشفت قايم مكسور واللى عرفتوا بعد كده ان البابين اليمين مش نافعين لكن الكابوت سليم باستثناء السربنتينة والرداتير ودا كان الكشف المبدأى على العربية....

 وفى النهاية الحمدلله على كل شئ وانا بردو بالرغم من انى كنت راكب المانى بس بردو السيراتوا عربية مش وحشة بس خفيفة جدا وانا سقت بيها على سرعات خيالة وقفلت بيها عداد واثبتت انها عربية تحترم لكن بردو خفيفة اوى فعايز اقول ان ماينفعش تطمن على الأخر وانت راكب حاجة غير الألمانى لأن هى دى الحقيقة اعمل اللى انت عايزه بس لازم تراعى انك راكب كورى او يابانى او او‘‘ لكن دا كان قدر فى الأول والأخر ومتهيألى ان الكاوتش دا كان سبب من الأسباب ‘‘‘وعلى فكره العربية لو مكانتش فعلا كويسه كانت اتلتت وانا جواها وعموما كل الناس اجمعت ان العناية الألهية هى اللى طلعتنى بكدمات وجروح بس والحمدلله على كل شئ.....ودى اخرة

i don't drive fast , i just fly slowly