الموضوع: الحمد لله فردة الكاوتش باظت

السلام عليكم

امبارح كنت مروح بالليل وفجأه سمعت صوت الكاوتش عالي. انا كنت ماشي باراحه فوقفت فورا وبصيت على العجل لاقيت الفرده اليمين ورا على الارض. قمت مغيرها بالاستبن بسرعه ومبصيتش على الفرده كويس بعد ما فكيتها لأن الدنيا كانت بالليل وكان معايا مراتي والاولاد. رحت الصبح لتوكيل بردجستون علشان أصلح الفرده مجرد ما الراجل شافها قالي ما تنفعش ووراني جنب العجله وفيها خرم كبير نافد لجوه. طبعا أنا صعقت من الخرم لأني موش فاكر اني دوست على حاجه ولا خبط في حاجه. المهم قولت الحمد لله انها جات في العجله وسألته عندك ايه وبكام. قالي المقاس ده لألأسف خلصان من عندي. أنا عربيتي فلوينس E3 بجنوط 205 الفرده اللي راكيه جودير. سألته بكام طيب قالي البردجستون ب 860 والفيرستون ب 650. قولتله شكرا وقولت أشوف حد تاني لأني لازم أركب فرده بسرعه لأني مشاويري دائري ومحور. روحت عند واحد عند مقار كنت بجيب من عنده زمان (أيام السكودا الله يمسيها بالخير .... ) فلقيت عنده الجودير نفس اللي فيها اللي هيا EfficientGrip بس صناعه الماني وكانت ب 720 جنية, اللي فيها تقريبا تركي. قولتله توكل على الله وفعلا ركبتها ومليتها نيتروجين ومشيت من عند الراجل وقولت الحمد لله انها جات في الكاوتش والحمد لله اني كنت ماشي بالراحه موش على سرعه عاليه.

بس الواحد مستغرب هل الفرده ضعيفه ولا الواحد داس على حديده ولا حاجه بهدلت الفرده كده. اللي شاكك فيه يكون رصيف ولا حاجه وحديده بارزه منه. هبقي أبص كويس لما أعدي من الطريق ده تاني (دا إذا جالي قلب وعديت, المشكله ان طريق بيت حماتي فهروح يعني هروح)
بعد ما رجعت البيت دخلت على موقع جودير ولاقيت ان مواصفات الموديل ده ممتاز للاستخدامي لأنه موفر في البنزين و هادي الصوت وأخوكم الحمد لله ملوش في الجري ولا الشد.

صفحة الموديل على الانترنت Goodyear EfficientGrip | Goodyear Passenger Tyres

أنا قولت أفيد الشباب بالاسعار وربنا ما يكتبها على حد.

الحمدلله جاات في كوتش