اخيرا جبت الجوليت

**aliyehia** · 01-11-2011 12:24 AM

اخوانى الاعزاء اخيرا بقيت من ملاك الدايو بعد غيبه 3 سنوات من ساعه ما بعت اللانوس 99 الى كنت شاريها من الزيرو و بعتها لظروف و بعدها جبت عربيه كنت معجب بيها و انا صغير يعنى من حوالى 30 سنه و هى فيات 124 سبور مو 73 و اخيرا بعتها بعد ما استمتعت بامتلاكها 3 سنين و جبت جوليت مو 2004 و ده لانى من عشاق الدايو و خاصه الجوليت
العربيه و لله الحمد بيتى و مش متهانه و كانت ملك انسه من الزيرو و ربنا يسترها على الكل
المهم انا نويت انى اعرض اى مشاكل بتصادفنى علشان نلاقى ليها حل مع بعض
و المشكله الاولى الى لاحظتها ان ال rpm بينزل براحه قوى بين الغيارات يعنى من الاول للتانى بيفضل على ال 2 و ما يلحقش ينزل قبل ما ادى الغيار التانى و هكذا و لو استنيت شويه ينزل لفوق الواحد بسنه و يثبت فيا ترى ايه سبب المشكله و ازاى احلها
و شكرا

**ahmedezzat78** · 01-11-2011 12:42 AM

و هيفضل فوق الواحد بسنه طول ما العربيه بتتحرك و مع التوقف التام ينزل ل 850 و ده الطبيعى

**aliyehia** · 01-11-2011 01:14 AM

طيب و عادى ان ال rpm ينزل بالراحه قوى كده لان و انا بادوس دبرياج علشان انقل صوت الموتور بيعلى و غالبا بادى غيار قبل ما ينزل للواحد

**ahmedezzat78** · 01-11-2011 02:51 AM

ماهو ده يخلى النقل سلس و ما يبقاش فيه نخعه فى أول كل غيار

**minicooper20** · 01-11-2011 06:06 AM

مبروك بس ياترى حالتها ايه و سعرها كام يا فندم

**aliyehia** · 01-11-2011 08:35 AM

العربيه و ده فضل من ربنا سبحانه و تعالى بيتى و كانت ملك شابه من الزيرو بتروح بيها الجامعه و مشاوير خفافى و هى مو 2004 فابريقه دواخل و رشه حزام و عامله و لله الحمد 80000 كم و مافيش اى حاجه متزوده لها (يعنى جنوطها - الكاسيت و السماعات بتاعه الفابريقه-الاضاءه باللمبات العاديه مش زينون او لمبات الليدات) و ده مؤشر فى اعتقادى ان العربيه و لله الحمد بحاله كويسه
السعر 45000
و شكرا