أخيرًا امتلكت البيتلز 1302

**asaeed** · 13-11-2011 12:04 AM

المشاركة الأصلية كتبت بواسطة sharpvision

اولا مبروك على حضرتك العربيه وانا فعلا من عشاق العربيه دى وساعدت واحد صاحبى يشتري بيتلز ,, ثانيا بالنسبه للانذار بيتبرمج عليه وحدات ريموت تانيه ومتهيألى نوعه يفرق ( اشهر الانذارات اللى تنفع فيها البرمجه دى هى الوولف) شوف نوعه وروح بيه لواحد بيركب انذارات وياريت لو توكيل زى وولف

الله يبارك فيكم جميعًا أخواني
وربنا يبارك في عمركم..
بخصوص الإنذار... أنا دلوقتي بأظبط الكربراتير.. وبالفعل أنا جبت كربراتير كان عند واحد معرفة وأخذته منه على التجربة وبالفعل رحت لبتاع كربراتير ناحية الشارع الجديد بشبرا الخيمة وفك الكربراتير إللي كان فيها وركب الكربراتير إللي جبتهوله.. طبعًا بعد ما نضفه تنضيفة كويسة... ومشيت من عنده وكله تمام... لحد ما وصلت إمبابة...
وعند مدخل إمبابه... بطلت وحلفت ما تدور... وأدور في المرش طبعًا مش عايز يدور... بس الغريب في الموضوع بقى وإللي أنا عايز أعرفه ضروري...
لو جربت أدور 3 مرات مرش والعربية ما تدورش، الكهربا تضعف جدًاااااااااا بطريقة غريبة... والأغرب من ذلك... أول ما أذؤ ذأه بسيطة العربية تدور على طول...
طبعًا مع العلم أن البطارية كويسة والدليل على كده أن لما بأسيبها كذا يوم كانت بتدور على طول.....

بصراحة قلت في نفسي أنا كل ما أعمل حاجة تخرب حاجة تانية.. قمت طالع البيت اتغديت وبعد كده نزلت أشوف الحاج مصطفى (ميكانيكي فولكس) عند موقف إمبابة.. وبالفعل رحت له... وهناك بالفعل لما بطلت العربية علشان أركن وأنزل أشوفه وأشرح له إللي حصل.. قامت العربية ماضرتش قدامه.. ابنه محمد شاب شاطر بصراحة.. قام ظبط ليا الهوا والسلانسيه وظبط كهربة العربية.. والصوت بقى كويس جدًا بس برده عيب الدوارة لسه زي ما هو... بس محمد الميكانيكي لاحظ أني لما بأدور بأدوس بنزين فقال لي العربية مظبوطه وقال لي دور من غير ما تدوس بنزين.... أنا أعتقدت أن العربية بتشرق

المهم سألته على الموضوع ده... فكان رده أني أشوف دائرة الشحن للبطارية والدينامو... وطبعًا إحنا في العيد والكهربائية اليومين دول لسه مأجزين.... فربنا يساهل مستني لما أشوف عيب الدوارة دي من إيه بالضبط...

بس لو العربية فعلاً بتشرق لما بادوس بنزين... يبقى إيه العلاقة بين أنها تشرق وأن الكهربا توطى في العربية بعد كذا محاولة

أسف على الإطالة
تحياتي للجميع

**sharpvision** · 13-11-2011 02:50 PM

المشاركة الأصلية كتبت بواسطة asaeed

الله يبارك فيكم جميعًا أخواني
وربنا يبارك في عمركم..

لو العربية فعلاً بتشرق لما بادوس بنزين... يبقى إيه العلاقة بين أنها تشرق وأن الكهربا توطى في العربية بعد كذا محاولة

أسف على الإطالة
تحياتي للجميع

تمام كده يا استاذ عمرو ركز الاول على العيوب الاساسيه اللى بتواجهك ( ان شاء الله بسيطه ) وبعدين اخر حاجه فكر فيها هى الانذار بعد ما ترتاح :d -- بالنسبه لمشكلة الدواره ممكن فعلا تكون مشكلة شحن بتأثر على الشحنه اللى جوا البطاريه وتخليها تنام بسرعه بعد محاولات التدوير وحضرتك هتروح لكهربائى تقيس شحن الدينمو لو لقيته واطى او عالى يبقى الحل انك تغير كتاوت الشحن اللى هتلاقيه تحت الكنبه اللى ورا ( لو كان الدينمو عادى مش اكتفاير) او هيفك الدينمو يعملوا صيانه لو كان اكتفاير لان الكتاوت جواه وبالمره تقيس كثافة المحلول جوا البطاريه ,, نصيحه اخيره عاوز اقولها لحضرتك وهى ما تزهقش من العربيه وتقول كلها اعطال وعيوب - لما هاتهتم بيها وتلقّط الاعطال دى هيجى عليك وقت مش هتلاقى فيها حاجه بأمر الله لانها بالرغم من قطع غيارها الغاليه ( نسبيا ) بتبقى معمره ---اتشرفنا بحضرتك

**asaeed** · 13-11-2011 06:55 PM

المشاركة الأصلية كتبت بواسطة sharpvision

تمام كده يا استاذ عمرو ركز الاول على العيوب الاساسيه اللى بتواجهك ( ان شاء الله بسيطه ) وبعدين اخر حاجه فكر فيها هى الانذار بعد ما ترتاح :d -- بالنسبه لمشكلة الدواره ممكن فعلا تكون مشكلة شحن بتأثر على الشحنه اللى جوا البطاريه وتخليها تنام بسرعه بعد محاولات التدوير وحضرتك هتروح لكهربائى تقيس شحن الدينمو لو لقيته واطى او عالى يبقى الحل انك تغير كتاوت الشحن اللى هتلاقيه تحت الكنبه اللى ورا ( لو كان الدينمو عادى مش اكتفاير) او هيفك الدينمو يعملوا صيانه لو كان اكتفاير لان الكتاوت جواه وبالمره تقيس كثافة المحلول جوا البطاريه ,, نصيحه اخيره عاوز اقولها لحضرتك وهى ما تزهقش من العربيه وتقول كلها اعطال وعيوب - لما هاتهتم بيها وتلقّط الاعطال دى هيجى عليك وقت مش هتلاقى فيها حاجه بأمر الله لانها بالرغم من قطع غيارها الغاليه ( نسبيا ) بتبقى معمره ---اتشرفنا بحضرتك:y_hi_3[1]:

ياباشا الشرف لي أنا

هو بالفعل الدينامو اكتفاير.. وربنا يساهل وتكون بسيطة وأنا بالفعل بكره هعمل إللي انت قلت عليه.. وبإذن الله هكتب إللي هيحصل.
وربنا يكرم وتبقى حاجة بسيطة...

**ahit** · 13-11-2011 08:44 PM

السلام عليكم و رحمة الله و بركاته

عمرو باشا
ألف مبروك - ربنا يديك خيرها و يكفيك شرها
أولاً : لازم تعمل زى ما قال محمد باشا سالم و تعمل سرفيس للعربية ( زيت و تاكيهات و بوجيهات و تراجع على الأبلتين و الكوندينسر و الفرامل و زيتها و تكشف على زيت الفتيس ).
ثانياً: الكربراتير القديم اللى كان راكب عندك صغير مش بتاع الماتور بتاعك و لو كان البيك بتاع السلانسية اللى بايظ فيه ممكن يتصلح كان صاحب العربية القديم عمله و ريح دماغه.
ثالثاً: بالنسبة للبيبان و الكوالين فيه واحد قريب من الملك الصالح بس أتأكد الأول من مكانه و أبقى أقولك عليه.
رابعاً: بالنسبة للإنذار زى ما قال الأخوة شوف نوعه و دور على التوكيل و هما هايوفقولك مفتاح أو أكترو هايشغلولك السنتر كمان.
خامساً : العربية ممكن تشرق لو إبرة البنزين مش مظبوطة أو الرداخ مش كويس.

و زى ما قولتلك ريح دماغك و روح لميكانيكى كويس على الأقل هايقولك العيب فين لو مش هايصلحه
و إطمن صدقنى إن شاء الله كلها حاجات بسيطة و تتحل و تستمتع بعربيتك زى ما بتتمنى

**ahit** · 13-11-2011 11:56 PM

إبقى طمنا يا عمرو إيه الخبار؟

**asaeed** · 14-11-2011 01:42 AM

المشاركة الأصلية كتبت بواسطة ahit

إبقى طمنا يا عمرو إيه الخبار؟

أبو حميد حبيبي
والله أنا في أشد الأسف على الدوشة إللي دوشتهالك واتصالاتي الكتير بك... لكن نعمل إيه.. إنت النجم والمرجع لينا، وبنستفاد منك كتيييييييير،
وأخويا وحبيبي أ/ محمد سالم... إللي برده دوشته... بس اعذروني يا جماعة الغريب أعمى ولو كان بصير... وأنا غريب على البيتلز...
بس هي مجرد أني أتمرمت شوية... وأبقى بعد كده عرفت النظام إيه...

أحمد باشا
هو بالفعل الكربراتير إللي كان راكب فيها كان فيه بك سلانسيه واحد.. أما إللي ركبته دلوقتي فيه 2 بكر سلانسيه... وأنا متوقع أنه يبقى كفائته كويسة بإذن الله...

أنا لسه جاي من شوية وحاولت أدور فيها زأ وبالفعل دارت والحمد لله فسبتها دايرة شوية لحد ما تشحن البطارية.. وبالفعل قمت بإبطالها بعد فترة ورجعت دورت تاني.. فدارت والحمد لله... بس ربنا يستر بكرة الصبح لما أدورها أعتقد أنها هتتزأ برده.. بس المهم أنها تدور... علشان أروح اكشف على الدينامو والبطارية وأقيس الشحن...

أدعولي يا رجالة أن البيتلز ماتخذلنيش وتدور وتستر معايا لحد ما أظبطها.. لحسن أنا مش حمل مصاريف بعد العيد...