اقتباس المشاركة الأصلية كتبت بواسطة marimmarum مشاهدة المشاركة
اولا شكرا علي مشاركتك بس اسمحلي اوضح نقطة
الشغل ممكن يسبب تقصير وممكن لا ,علي حسب الشخصية
انا كنت بقولها طالما الشغل محترم وكويس وميقصرش علي البيت في حاجة فخلاص لكن لو اثر مينفعش.
وانا عارف ان كدة كدة حتاخد اجازة علشان الوضع والرضاعة وكدة والاجازات دي,ممكن تطول فمش مشكلة استحمل شوية لحد ما تاخد اجازة طفل واستحمل علشان مش عايزها تكون زهقانة وهي في البيت لوحدها ولازم اراعي نفسيتها واجي علي نفسي شوية
لكن تعالي بقي,اقولك فين الطامة الكبري????
تدخل اهلها في شئون حياتنا بشكل فظيع ويارتهم بيدخلوا علشان المركب تمشي لاسف ادخلوا وخلوا المركب تتخرم وتبدا المية تعبيها من كل حتة ولو فضل الحال كدة حتغرق لا محالة
اقول لك على نقطة بسيطة
البنت اول ما بتتجوز بتبقى لسة مرتبطة اوي بأهلها وببيتها اللي عاشت واتربت فيه
وبتبقى محتفظة بحاجتها اللي كانت بتستعملها فيه
وبترتاح اكتر في السرير بتاعها في بيت باباها
وكمان اتعودت انها تشور مامتها وباباها في كل شئ وترجع لهم في كل الامور
وكمان حسب ارتباطها بامها وصحوبيتها ليها

انا اول ما اتجوزت كنت باحكي بعض حاجات لمامتي لكن طبعا مش كله لاني كدة كدة مكنتش باحكيلها حاجة قبل ما اتجوز
لكن لاحظت ان ممكن يتحاملو على زوجي ويبقوا زعلانين منه عشان زعلني
وانا بابقى بين نارين مش عاوزة ازعل جوزي ومش عاوزة ازعل اهلي
فكنت باطحن في النص عشان اصحح وجهات النظر
كنت ادافع عنه ادامهم والدتي تقول لي ما تدافعيش عنه
ادافع عنهم ادامه هوة يقول لي بتفضلي اهلك عليا
لان والدتي عاطفية جدا وطبعا هتنحاز لبنتها
عكس بابايا .. واقعي وكان بيغلطني لو كنت غلطانة

حابة افهمك ان الدنيا علمتني

بس
بعدها اخدت عهد على نفسي ما احكيش حاجة نهائيا
لحد الان
حتى لو زعلنا ولو حصل ايه
احط همي في نفسي
وباذن الله مكانش بيستمر ولا بيوسع

زوجتك بأذن الله الدنيا هتعملها وبعد كدة حبة حبة هتحس ان مالهاش الا جوزها وبيتها واولادها
امها وابوها تبرهم بس مالهمش دعوة بحياتها
وهتلاقيها من نفسها ما تقدرش تبات برة بيتها ابدا
دي سنة الحياة
صبر جميل
عارف ايه اللي دايما بيكبر المشاكل
لما الاتنين محدش فيهم بيتنازل عشان التاني
لكن لو كل واحد يتنازل مرة
المركب هتمشي

حاول معاها تاني بالتليفون واختار وقت يكون بالليل اوي مثلا وهما نايمين
عشان ما يبقاش في تاثير من حد عليها
تبعت لها رسالتين حلوين تفكرها بحاجة كويسة بينكو اوذكرى حلوة
بعيد عن العند
وبلاش عتاب في اي كلام

يمكن ربنا يهديها وتلين
وتبقى دي اخر محطة
تسيبها بعدها لضميرها
لحد ما ترجع لعقلها

وتبقى انت عملت اكتر من اللي عليك
اسفة اني طولت عليك