مساء الخير على احلى منتدى واحلى ناس وسلام كبير لرجالة نيسان

اتأخرت عليكم صح ...

معلش انا استلمت تيدا 2011 من شهرين لون فضى فول اوبشن بلس من غير فتحة سقف
ومش عاوز اقولكو انا عملت اية فيها وبيها
اولا نتكلم عن ملاحظاتى على العربية :

فى الاول حسيت ان دواسة البنزين خفيفة قوى.

الفرامل قبل صيانة الخمس الاف كانت تقيلة حبتين

عموما انا اول ما استملت العربية نفذت تعليماتكم وتوجيهاتكم الكريمة بخصوص التليين والاستلام والذى منه والحمد لله العربية زى الفل

ردا على عدم الثبات بعد ال 140 انا سافرت بيها اسكندرية وجبت بيها 200 والعربية زى الفل (هاتش باك)
قبل صيانة الالف كان استهلاك البنزين هايل جداااااااا

بعد كده وطبعا مع زيادة السرعة فى المشى شوية بقى استهلاك البنزين عادى بالنسبة لعربية 1600 بس برضو اقل من العادى يعنى

بعدين ودا شئ هسال علية فى التوكيل حسيت ان العربية بقت بتستهلك بنزين زيادة شوية مش عارف لية

المهم يا ساداة يا كرام بالنسبة للمساحة مش عاوز اقولكوا انا عملت اية عشان اختبر تشيل قد اية العربية ماشاء الله تتحسد على الوسع من جوة مع انها (هاتشباك)

بالنسبة للصيانة :

انا جربت مركزين فى صيانة الالف عملتها عند يونايتد جروب الى فى العباسية دة بصارحة زى الفل بس فى حاجه واحدة العربية ما تحطش عليها فوطة حتى تتمسح ما عللينا

وال5000 عند السبع وبصراحة تسلم ايديهم ناس زى الفل وكمان بيقولوا ان اوتو ايجبت فتح مركز جديد هجربة فى ال10000 ان شاء الله واقولكوا اية الاخبار


نيجى للمشاكل :

انا نفسى اركب كروز كنترول وكمان جى بى اس وانذار للعربية قال اية يا اخوانا بيقولوا ضفيرة الكهربا بتهنججج هل يعقل هذا الكلام افيدونا!!!! ومش لاقى الكروز كنترول المهم حد من صحابى بيسافر برة هخلية يجبهولى بس اتطمن انه هيركب الاول

وكمان عاوز رايكوا اعملها فرش ولا اية هى من جوة اسود بس عاوز احافظ عليها ناس بتقولى فصل جلد تعرفوا حد كويس ؟؟؟؟

وختاما العربية ممتازة
فى حاجه بقى حد سمع ان فى مشكلة فى فرامل النيسان زى تيوتا الى اتسحبت لانى حصلت معايا مرة واحدة بس وانا بعدى مطب بس اخدتة بسرعة شوية لقيت الفرامل بترد كده عارفين لما تبقى فى ممانعة كده فى الفرامل ؟؟؟


حد يعرف نظام امان للعربيات بباسورد وكده عشان السرقة الى دايرة فى البلد يعنى اقفل العربية وتفصل خالص ما تتحركش من مكانها غير مل احط الباسورد