التجربة الديهـيـومانـزريـة

**MoToRiZeR** · 20-05-2008 03:35 PM

بما ان انا كل يوم بنزل احرق في اعصابي و انا راكب الدائري كله و منابنيش غير وجع الدماغ .. قررت اعمل تجربة لمدة يوم واحد علي طريقة if you can't beat them, join them

بس عشان اعرف ايه الاختلاف .. نزلت من الصبح و انا مقرر .. شيلت غطا العربية و ركبت و طلعت :

- لم استخدم الإشارات نهائيا لحد ما رجعت دلوقت
- الكلاكس صديقي
- الفلاشر حبيبي
- مفيش أي التزام بأي سرعة من اللي خلقها ربنا .. فيه حرق عالغيارات كلها!
- بلطجة في السواقة .. لو حتة فاضية احشر نفسي فيها و خلاص مش مهم هعمل ايه بعد كدة
-غرررررز ! ده طبعا معروف
- لم أعير اهتماما لأي بني ادم علي الطريق و عاملت الجميع كجمادات اطير من بينها
- كسر عالناس الرخمة و تزنيق و اللي مش عاجبه رجاء خبط دماغه في الحيط

كنت عايز اعرف الناس اللي مش محترمة عالطريق وضعها ايه نفسيا .. لقيت انهم و الله حاجة زي الفل !

-لأول مرة الناس كلها بتوسعلي ! شايفين واحد اهبل جاي طاير في المرايا فا وسعوا
-الناس بطلت تتحنجل و هي بتعدي ادامي و تخليني اقف تماما ! ده كان فيه اتنين شباب بيعدوا عالدائري و بيني و بينهم بتاع 300 متر .. شافوني جاي طاير زي العبيط قاموا راجعين تاني .. دول لو كانوا امبارح كانوا خلوني ابطل العربية و انام شوية
- سبحان الله اما بقيت اغير الحارة بدون اشارة الموضوع بقي سهل جدا! الأول كنت ادي اشارة الاقي اللي ورايا فجأة قرر يشد حيله و يصمم يعدي مني .. دلوقت يلاقيني بكسر مرة واحدة يقوم مهدي !
- بدل ما اروح في ساعة روحت في 35 دقيقة !
- مشتمتش ولا اتعصبت خالص !

سبحان الله و الله في البلد دي اللي يعيش بلطجي يكسب فعلا!
بس للأسف دي تجربة يوم واحد .. من بكرة هرجع اروح في ساعة تاني عشان مش دماغي السكة دي

**Hussein_Ramdan** · 20-05-2008 03:43 PM

هو دة الكلام صح كدة على الطريق البقاء للقوى زاى قانون الغابة
وسلملى على البتنجان
والله انا قبل كدة كونت سايق فى شهر رمضان وفاضل على الفطار خمس دقائق وماشى فى امان الله لقيت واحد من بتوع عربيات الزبالة الجديدة راح كاسر عليا وجابلى الفابوس الى اودام ويبوصلى وبيضحك ونا ببصلو ولسة هقل ادبى طبعا مش شايف اودامى ونا بشتم لبست فى تاكسى اودامى والراجل طبعا كان هرب
الطرق فى مش عايزة سواق عايزة بليتشو عشان يعرف يتعامل معاها

**memo_hefnawy** · 20-05-2008 03:51 PM

مش لازم تبقى بلطجى عشان ترتاح

لكن لازم يبقى عندك أنياب و مخالب

يعنى ماتمشيش تزنق على كل الخلق لكن فى الوقت نفسه لما حد يزنقك طلع روحه

دى الطريقة إللى بسوق بيها بفترى و أنا سايق بس على المفتريين و بس

بمشى كثير بسرعه و غرز - بس بشرط ماتكونش غرز هاتزنق حد أو تسببله مشكله أو سرعه زايده عن حدها فى أماكن ماتنفعش

خليك جامد لكن مش مفترى :)

حركة الشباب إللى كانوا بيعدوا دى - خلى بالك منها ممكن أوى يستغبوا و واحد يعدى و التانى يرقص رايح جاى قدامك - آه مالوش ديه بس تبقى قابلنى لو عرفت تسوق كويس بعد ما تخبطه لأنه هايسيب ركبك و طبعا غير بهدله العربية (كابوت + زجاج أمامى + فانوس + ريداتير + إكصدام ) و إنت حظك
خلى بالك من الكلاب الضاله (البشر إللى بيعدوا الطريق) دوول والله الكلاب الضاله بتعدى أحسن منهم

**osama** · 20-05-2008 03:56 PM

الدائري دة الدائري دة جميل خلاص فية خلاصة الاهمال في مصر عد معاي
1 - الفواصل
2- مطبات
3- كشافات اضاءاة ديكو
4 النقل الثقيل يلزم الشمال والوسط وكلة حتة
5 يوجد كارو
6 يوجد توكتوك
7 تعدية الطريق
8 دخان من الحرائق علي الطريق
9 عدم الالتزام بالحرارة المرورية
كفاية كدة

**WalidAdel** · 20-05-2008 04:06 PM

يعني لو عملت بقي مزيج بين السواقه المحترمه و السوقه اللي سوقت بيها انهارده ممكن ترتاح و تقلل من السرعه شويه و حتحس انك مازلت شخص محترم
بمعني عايز تاخد غره عملت الاشاره اللي وراك حاول يقفلها عليك نفضله و خدها بردوا
انا قصدي مفيش داعي للاحترام علطوا الطريق او عدم الاحترام علي طول الطريق خلي في مزيج من الاثنين ممكن تقابل واحد محترم و انت ماشي عامله باحترام بردوا لقيت واحد فاتح صدره و ماشي و عامل العبيط فليتضخم الوحش بقي و اعمل اعبط منه
انا شخصياً ماشي كده في الدنيا و في كل حاجه في حياتي

**MeshoMicra** · 20-05-2008 04:22 PM

والله عندك حق

كل الكلام ال بتقولو ده والله صح ومزبوط 100 100

هيا الناس مش عايزه غير كده

بردو بتحصل معايا لما اكون واقف علي تقاطع واستني اي حد عندو زوق يقف يقولي اتفضل

مافيييييييييييييييييييييي يييييش

الواحد لازم يعمل بلطجي ويخش ببوز العربه في نص الشارع علشان يعرف يعدي نفسو

حاجه قرررف بجد مافيش نظام ابدا ولا حيكون في نظام في مصر

كلو بالدراع

**amr_elrashidy** · 20-05-2008 04:45 PM

المشاركة الأصلية كتبت بواسطة sss

مهما كان اللي الناس دول بيعملوه مينفعش برضه نقول عليهم كلاب ضالة
معلش لو حد غير حضرتك كان ممكن الواحد ميعلقش لكن حضرتك من "كبارات" المنتدى وقدوة محترمة
وبعدين قلت اكسب ثواب النصيحة في حد محترم بيقبل النصيحة لان فيه ناس كتير دلوقتي ما بتقبلهاش

جزاك الله كل خير...أكيد الراجل ميقصدش اهانة