الموضوع: فلتر الهواء الجديد

صباح الخيرات عليكم جميعا.
عربيتي الأسكورت معايا من شهر 2010/8 ولما اشتريتها مغيرتش فلتر الهواء اللي كان راكب فيها برغم ان سيد خليل كان مصر انه يغيره ، بس انا مرضيتش اغيره وهو امام اصراري نفخه بالهواء بس. من يومين كنت بتكلم مع واحد صاحبي مهندس سيارات عن اهمية فلتر الهواء واني مغيرتوش من ساعة من جبت العربية فسألني عن معدل استهلاك البنزين فقولت له هي بتعمل في حدود 160 كيلو في الصفيحة فقال لي ده قليل على عربيتك باعتبار انها 1300 cc. ونصحني اغيره واشوف النتيجة.
النهارده اشتريت فلتر جديد من عند الصيرفي ب 50 جنيه صناعة الماني وركبته بنفسي وطلعت اجرب العربية بعد تغيير الفلتر. سحب العربية بأه ماشاء الله ممتاز فعلا وبشكل ملحوظ ، وخدت مشوار بالليل كده لغاية النادي الأهلي مدينة نصر ورجعت تاني وعند البيت مديت صباعي في الشكمان خدت لحسة. لقيت الشكمان نضيف ومفيهوش هباب !!!!!!!!!!!!.
هقيس معدل استهلاك العربية في البنزين واوافيكم بالنتيجة.

الفلاتر روح المتور بس احنا للاسف بنكسل ونستخسر نغيرها انا كمان عايز اغير فلتر الهواء من فترة ومكسل بس كلامك شجعني.