استفهام بخصوص الفرامل !!

**moh19227** · 13-11-2011 04:51 AM

بسم الله الرحمن الرحيم
ازيكوا عاملين ايه كل سنة وانتم طيبين
ندخل بقي ف الموضوع
الموضوع باختصار عن فرامل العربيه اكيد اي حد بيقرا الكلام دلوقتي هيتوقع الكلام عن ال ABS & EBD
لا انا بتكلم عن الفرامل العاديه

في البدايه احب اوضح نقطتين علشان نكون واضحين مع بعض

اول حاجه قوة الفرامل
قوة الفرامل بتختلف من عربيه للتانيه بس ازاي اقدر اقول ان العربيه دي فراملها اقوي من دي
فرامل العربيه بتعتمد علي حاجات كتير منها مثلا
* التكنولوجيا اللي اتصنعت بيها
* وزن العربيه
* نوع الكاوتش ونوع الطريق
وكلام تاني كتير لكن -- في اعتقادي -- قوة الفرامل اللي ممكن اقول بيها العربيه دي فراملها احسن من دي هيا المسافة التي تقطعها السيارة للتوقف من سرعة معينه بدون كسح
يعني مثلا لو العربيه ماشيه علي 100 مثلا هتحتاج كام متر علشان تتوقف من غير مالعجل يكلبش
يعني مثلا مثلا الانسر تقف في 40 متر والصني تقف في 38 والبورش تقف ف 34 كده يعني -- انا بقول مثلا --

وتاني حاجه احب اوضحها ان احنا هنقسم قوة الفرامل بمعني
10% ده انا بستخدم الفرامل بقوة 10 % منها -- ركز بقي يا معلم في اللي جاي --
و 99 % يعني اقوي قوة للفرامل بس من غير ما العجل يكلبش
100 % دي الفرااامل الكسح يعني اخر الفرامل والعجل يكلبش
وممكن تبص علي المشاركه دي فيها توضيح شويه
http://www.nilemotors.net/Nile/3873907364-post8.html

نيجي بقي للمهم والتركيز--> السؤال

لو عندنا 3 عربيات نفس النوع وكل حاجه وماشيين مثلا علي 100 جنب بعض وهوب فرامل
الاولي فرامل 99 % يعني اخر حاجه في الفرامل من غير كسح
والتانيه 100% يعني جاب اخر الفرامل وزاحف علي الارض
والتالته اداها 100% بس عنده ABS فاشتغل
انهي واحده في التلاته تقف الاول ؟!!!
والاجابه هتختلف لو الطريق ده عليه تراب او رمل مثلا ؟!!
اخر سؤال هو ممكن ال ABS ميشتغلش لو انا مثلا ماشي بسرعه كبيره والارض تحتي تراب او رمل مثلا ولا في اي حاله المفروض يشتغل ؟!!
وتعبتكوا معايا

وشكرااا مقدما

**moh19227** · 15-11-2011 04:56 AM

بسم الله ماشاء الله 38 مشاهده ومفيش حد رد :)
انا عارف ان الموضوع عاوز خبره شويه وواحد ساق كتير وجرب كتير بس معقوله محدش مره استخدم فرامل كسح ومره قرامل قويه بس من غير كسح وواحد ساق عربيه مفيهاش abs وساق بعديها عربيه فيها !!

**MMamdouh** · 15-11-2011 10:57 AM

المشاركة الأصلية كتبت بواسطة moh19227

لو عندنا 3 عربيات نفس النوع وكل حاجه وماشيين مثلا علي 100 جنب بعض وهوب فرامل
الاولي فرامل 99 % يعني اخر حاجه في الفرامل من غير كسح
والتانيه 100% يعني جاب اخر الفرامل وزاحف علي الارض
والتالته اداها 100% بس عنده ABS فاشتغل
انهي واحده في التلاته تقف الاول ؟!!!

العربية اللى بتفرمل 99% هتقف الاول... ثم العربية ال100% مع ABS ثم اخر واحدة اللى فراملها 100% بدون ABS

والاجابه هتختلف لو الطريق ده عليه تراب او رمل مثلا ؟!!

طبعا هتختلف ...

فية بعض الظروف زى مثلا الاسفلت اللى على وشة طبقة رمل بيبقى زلق جدا و بالتالى الABS بيشتغل و يمنع العجلة من انها تقفش... انما العربية اللى مفيهاش ABS هتكسح الرمل اللى على وش الاسفلت و تمسك فى الاسفلت نفسة... بالتالى العربية الى عجلها قفش هتقف اسرع هنا من العربيتين التانيين لانها غيرت طبيعة سطح الطريق فى حين ان العربيتين التانيين بيفرملوا على الطريق و هو بنفس حالتة

نفس الكلام هيتكرر لو سطح الطريق علية طبقة طين

اخر سؤال هو ممكن ال ABS ميشتغلش لو انا مثلا ماشي بسرعه كبيره والارض تحتي تراب او رمل مثلا ولا في اي حاله المفروض يشتغل ؟!!

الABS بيشتغل لما عجلة من العجلات تقفش.... مش مهم انت ماشى بسرعة ولا براحة او انت على رمل او مية او اسفلت

MMamdouh

**Amr Axel** · 15-11-2011 07:39 PM

المشاركة الأصلية كتبت بواسطة mmamdouh

العربية اللى بتفرمل 99% هتقف الاول... ثم العربية ال100% مع abs ثم اخر واحدة اللى فراملها 100% بدون abs

طبعا هتختلف ...

فية بعض الظروف زى مثلا الاسفلت اللى على وشة طبقة رمل بيبقى زلق جدا و بالتالى الabs بيشتغل و يمنع العجلة من انها تقفش... انما العربية اللى مفيهاش abs هتكسح الرمل اللى على وش الاسفلت و تمسك فى الاسفلت نفسة... بالتالى العربية الى عجلها قفش هتقف اسرع هنا من العربيتين التانيين لانها غيرت طبيعة سطح الطريق فى حين ان العربيتين التانيين بيفرملوا على الطريق و هو بنفس حالتة

نفس الكلام هيتكرر لو سطح الطريق علية طبقة طين
الabs بيشتغل لما عجلة من العجلات تقفش.... مش مهم انت ماشى بسرعة ولا براحة او انت على رمل او مية او اسفلت

mmamdouh

+11111111

**moh19227** · 16-11-2011 02:00 AM

المشاركة الأصلية كتبت بواسطة makarhn

مسافة التوقف فى كل عربية تختلف عن الأخرى بسبب
نوع الفرامل المستخم وحجمها فمثلا سيارة 127 يوجد 2 ديسك فرامل من الأمام و فرامل درمز من الخلف فبتكون فراملها ضعيفة لأن الدرمز فرملة ضعيفة والدسكات أقوى منها بكتير
لكن 80 % من السيارات الجديدة الموجودة فى مصر بيكون فيها دسكات من الامام ودرمز من الخلف مع نظام فرامل servo
دى بتكون أقوى وفى عربيات بيكون عليها abs للservo علشان السيرفو مايقفش ودى بتكون أقوى وأقوى
وفى عربيات تكون فيها 4 دسكات مع servo abs
بتخلف أحجام الدسكات من عربية للتانية وكل ماكبر كل ما أحسن وفى دسكات متهوية علشان ما تسخنشventilated disc
وفى عربييات زى chevrolet caprice classicعربيتى فيها ventilated discو servo وabsوhydrolic brake بتكوت أٌقوى بكتير عن أى عربية فى أقل دوسة فرملة

ميرسي يا باشا علي الافادة الجميله ونورت الموضوع

**Ashraf_Ibrahim** · 16-11-2011 08:47 AM

الموضوع المتحكم في الامر دا اولا واخيرا هو مهاراتك الفرملية في استخدام الفرامل لو الفرامل بتاعتك عادية مفيهاش abs

لو الطريق أسفلت العربية اللي هتكسح 100% هتبقا اخر عربية تتوقف لأن الانغلاق التام للفرامل -الكسح يعني - بيزود من مدة التوقف ناهيك عن انعدام التحكم باتجاه العربية -ودي وظيفة ال abs -

طب لو الطريق عليه تراب مثلا ليه العربية اللي هتفرمل 99% بدون abs او اللي هتفرمل 100% بال abs مش هيقفوا الاول !
زي ما قال استاذ ممدوح عشان طبيعة الطريق وجود رمال على الطريق مثلا او الطريق الزلق بتغير من طبيعة الفرامل في حد ذاتها
العربية اللي هتفرمل 100% مع الكسح دي هتشيل طبقة الرمل او التراب دي وبالتالي هينكشف قدامها الجزء الصلب من الطريق اللي هو الاسفلت وبالتالي يكون قوة الاحتكاك اكتر
بس لو انت استخدمت الفرامل صح في حالة ال 99% بدون abs او ال 100% مع ال abs
الاولى هتتوقف بصورة مطلقة قبل التانية والفرامل في حالة الانغلاق هتكون اخر واحدة تتوقف

**MMamdouh** · 16-11-2011 01:10 PM

المشاركة الأصلية كتبت بواسطة makarhn

وفى عربيات بيكون عليها abs للservo علشان السيرفو مايقفش ودى بتكون أقوى وأقوى

الكلام دة مش مضبوط

الABS مبيزودش قوة الفرملة

MMamdouh

**MMamdouh** · 16-11-2011 01:23 PM

المشاركة الأصلية كتبت بواسطة moh19227

حضرتك تقصد ان العربيه اللي هتكسح 100% هتقف قبل العربيتين التانيين !

yes

طب لو كده مهو اولي انهي تقف الاول لو طريق اسفلت قبل العربيتين التانيين !
ولا انا فهمت حضرتك غلط !

لا يا باشا هناك فرق....

الكسح على اسفلت علية طين او رمل بيخللى الكاوتش يكنس الرمل او يغرز فى الطين لحد ما يوصل للاسفلت و الكاوتش يكلبش العربية

انما مع 99% او الABS مش حيحصل كنس ولا غرز فا الكاوتش هيفضل ماشى على طبقة الرمل او الطين و بالتالى التماسك هيبقى قليل جدا و العربية هتاخد مسافة عشان تقف

الكسح على اسفلت ناشف مش هيعمل حاجة غير تاكل الكاوتش و العربية مش هتقف... خللى بالك ان الفكرة الاساسية فى الفرملة هى تحويل الطاقة الحركية للعربية الى حرارة من خلال احتكاك اتيل باللطنابير... اذا كل ما قدرت تولد حرارة اكبر من الفرامل كل ما هتقف اسرع

المشكلة بقى مع الكسح على اسفلت ناشف ان مبيبقاش فيه احتكاك بين الطنابير و التيل لانهم قافشين على بعض... الاحتكاك بيحصل بين الكاوتش و الاسفلت و هنا بيحصل تحويل الطاقة الحركية لحرارة... بس الكاوتش بيتحرق على درجة حرارة اقل بكتير جدا من الحرارة اللى بيولدها احتكاك التيل بالطنابير بالتالى مقدار فقد الطاقة الحركية اللى بتتحول لحرارة اقل بكتير فى حالة الكسح بالتالى العربية بتفضل مندفعة مسافة كبيرة

اللى بيحصل فعليا ان الكاوتش بيسخن من الاحتكاك و بيتحرق عند درجة حرارة معينة (و دة اللى بيعمل الدخنة الفظيعة مع الفرملة) و الحرارة دى اقل بكتير جدا من حرارة احتكاك التيل بالطنابير و دة اللى بيفرق فى مسافة التوقف

انا معرفش درجات الحرارة تحديدا بس كمثال بسيط... انا مرة كنت راجع من مشوار متاخر و المفروض ادى العربية لوالدى عشان ينزل بيها مشوار تانى و كان لازم اغير التيل قبل ما اديهالة... طبعا جريت جامد مو حملت على الفرامل طول السكة و اول ما وصلت البيت فكيت العدلة و زقيت التيل بمفك... فردة التيل اللى وقعت على الارض سيحت الاسفلت...

طبعا مستحيل فردة كاوتش تقدر توصل للسخونة دى من غير ما تتحرق... و دة معناه ان فردة التيل حولت جزء كبير جدا من الطاقة الحركية للعربية الى حرارة عشان تقف فى اقل مسافة ممكنة

MMamdouh