السلام عليكم و رحمة الله و بركاته
أنا أخوكم أحمد حسن - معايا فولكس بيتل 1302 - 1972
من 3 سنين تقريبا إتعرفت على الأسطى الكبير و دكتور عفشة الفولكس الأسطى خالد رباب و اللى عرفنى عليه أخويا العزيز و صديقى الأستاذ أحمد الدغيدى.
وقتها كنت ضبطت بوش علبة الدركسيون و غيرت بيض مثلث و مسمارين سنتريليك للعفشة
و من ساعتها و الحمد لله رب العالمين و بسم الله ما شاء الله ماشتكيتش من العفشة .

و من شهر تقريباً قولت أعمل زيارة للأسطى خالد رباب و أطمن على العفشة بالمرة و كان معايا أخويا و صاحبى صبرى باشا لأنه كان عنده من فترة و ظبطله عفشة عربيته 1302 و علبة الدركسيون بتاعته.

و كالعادة عمل كشف شامل متقن للعفشة و قرر إنى محتاج أظبط علبة الدركسيون فقط و باقى العفشة زى الفل و بخير و الحمد لله.

المطلوب عمله فى علبة الدركسيون : هو عمل جلبتين لقاعدة البكرة عند الخراط و علبة شحم إيسو فقط و لكن للأسف بعد ما الأسطى خالد فك العلبة لقى البكرة بايظة خالص و لازم تتغير ... و الحمد لله ربنا كرمنى و لاقالى بكرة بحالة ممتازة و راح عملى الجلبتين عند الخراط و غسل علبة الدركسيون تمام مع البكرة و المشط و ركب البكرة و ملى العلبة شحم إيسو و قفل العلبة و ركبها مع الصليبة بعد التأكد من سلامتها .
و الحمد لله رب العالمين حسيت بفرق كبير جداً بعد تظبيط علبة الدركسيون من حيث النعومة و الخفة و بدون بوش يذكر.
العربية فى السفر و الجرى و المناورات و الملفات زى الحرير و الدركسيون ناعم و سلس و خفيف.

و دى بعض الصور أثناء الشغل


دكتور عفشة البيتل الأسطى خالد رباب

دى البكرة اللى كانت بايظة و باين فيها التآكل

ده المكان اللى بيركب فيه الصليبة اللى بتوصل لعلبة الدركسيون


دى علبة الدركسيون و راكب فيها مشط التوجيه



دى صورة العلبة بعد تجميعها و تركيب الصليبة فيها
بجد بشكر الأسطى خالد رباب كتير جداً على مهارته و خبرته
هو و إبنه المحترم جداً محمد